Свет
Астронаут на НАСА се врати на Земјата откога го собори рекордот, без претходен план за тоа

Астронаутот на НАСА, Франциско Рубио, конечно, се врати на Земјата чувствувајќи ја гравитацијата на планетата првпат по повеќе од една година.
Рубио и неговите двајца руски колеги, астронаутите Сергеј Прокопјев и Дмитриј Петелин, паднаа со падобран во Казахстан со руската капсула „Сојуз МС-23“ во средата во 17.17 часот по локално време.
Пристигнувањето на екипажот го означи крајот на неочекувано долгото патување за Рубио, кој требаше да помине само шест месеци на Меѓународната вселенска станица. Наместо тоа, тој поминал вкупно 371 ден во вселената. Неговото патување беше продолжено кога откри истекување на течноста за ладење за време на неговиот лет додека беше закотвен во орбиталната станица.
Престојот на Рубио постави нов рекорд за најдолг временски период поминат во микрогравитација од американски астронаут. Тој стана и првиот Американец што помина цела календарска година во орбитата.
Ова беше негово прво патување во вселената откога беше избран за Астронаутскиот корпус на НАСА во 2017 година, а на почетокот на мисијата тој стана првиот астронаут по потекло од Салвадор, кој отпатува до ниската орбита на Земјата.
Во неодамнешното интервју за Си-ен-ен, Рубио рече дека ако знаел оти неговиот престој на Вселенската станица ќе биде двојно подолг од првично планираниот, тој нагласи дека, веројатно, ќе ја одбиел задачата пред да почне со обука.
„И тоа е само поради семејните работи што се случија минатата година. И кога би знаел дека ќе морам да ги пропуштам тие многу важни настани, ќе морав само да кажам: благодарам, но не, благодарам“, рече тој тогаш.
Рубио, кој има четири деца, се очекува да го почне своето патување кон дома од местото за слетување на вселенското летало „Сојуз“ во близина на градот Џезказган, Казахстан. Тие првин ќе летаат до Караганда, која се наоѓа на околу 530 километри североисточно од Џезказган, пред да се качат на летот за Хјустон.
Севкупно, Рубио и неговите членови на екипажот патувале 253,3 милиони километри, според НАСА.
Рубио го надмина претходниот рекорд за најдолг престој во вселената на американски астронаут од 355 дена, што го постави Марк Ванде Хеи од НАСА во 2022 година.
Покојниот руски космонаут Валериј Полјаков, кој помина 437 континуирани дена во орбитата на руската вселенска станица „Мир“ од јануари 1994 до март 1995 година го држи светскиот рекорд за најдолг престој во вселената.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Европа разгледува воена тампон зона на украинска територија, објави „Политико“

Европа размислува да поддржи воспоставување тампон зона широка 40 километри на украинска територија како дел од напорите за завршување на војната, објави вчера „Политико“, повикувајќи се на неименувани европски дипломати.
Според нив, европските лидери ја разгледуваат идејата како една од опциите за прекин на огнот или како дел од повоениот договор меѓу украинските и руските сили. Вашингтон во моментов не е вклучен во овие дискусии, велат изворите.
Разговорите за тампон зоната доаѓаат во време кога американскиот претседател Доналд Трамп ги интензивира напорите за постигнување мировен договор. Трамп се сретна со рускиот претседател Владимир Путин на Алјаска на 15 август, а неколку дена подоцна во Белата куќа со украинскиот претседател Володимир Зеленски и европските лидери.
„Сите се обидуваат да дејствуваат што е можно побрзо по прашањето за безбедносните гаранции за да не се предомисли Трамп“, рече еден европски функционер. Предлогот, велат дипломатите, веројатно би вклучувал територијални отстапки од Украина, но не е јасно дали Киев е воопшто отворен за таков план.
Некои европски земји изразија загриженост дека тампон-зоната би можела да направи повеќе штета отколку корист и да ги изложи украинските градови на уште поголем ризик од руски напади. „Не е многу разумно против противник кој не преговара со добра намера“, рече еден од дипломатите, кој зборуваше под услов да остане анонимен.
Во исто време, источните членки на НАТО, вклучително и Полска, се загрижени дека испраќањето голем број војници во Украина би можело да го ослаби присуството на алијансата на исток и да ги направи ранливи на потенцијален руски напад.
Се очекува француските и британските војници да го формираат ‘рбетот на мировните сили, а Париз и Лондон ги охрабруваат другите сојузници да обезбедат воена опрема. Се проценува дека помеѓу 4.000 и 60.000 мировници би можеле да бидат распоредени во Украина за да го следат спроведувањето на мировниот договор. Нивната задача не би била само да патролираат во демилитаризираната зона, туку и да обучуваат украински војници.
Иако Соединетите Американски Држави изјавија дека нема да испраќаат свои мировни трупи, тие изразија подготвеност да обезбедат техничка поддршка. „Сите чекаат лидерите на политиката на Министерството за одбрана да разјаснат колку далеку се спремни да одат, а им дозволуваат на Европејците да ги покажат своите карти“, додаде еден европски функционер.
Додека дипломатските напори продолжуваат, шефот на претседателската администрација, Андриј Јермак, и секретарот на Советот за одбрана, Рустем Умеров, патуваат во Њујорк оваа недела за да разговараат за безбедносните гаранции.
Кремљ постојано го доведува во прашање легитимитетот на Зеленски, а рускиот министер за надворешни работи Сергеј Лавров на 24 август изјави дека Москва нема да го прифати потписот на Зеленски на никакви правни документи, пренесува медиумот.
Фото: принтскрин
Свет
Калас: Имаме 30 дена за дипломатско решение за иранската нуклеарна криза

Западните земји сега имаат 30 дена да најдат дипломатско решение за иранската нуклеарна криза, изјави денес високата претставничка на Европската Унија за надворешна политика и безбедност, Каја Калас.
„Влегуваме во нова фаза од 30 дена, кои навистина мора да ги искористиме за да најдеме дипломатски решенија“, изјави Каја Калас пред почетокот на состанокот на ЕУ во Копенхаген, еден ден откако Европејците одлучија да покренат механизам што повторно ќе воведе меѓународни санкции против Иран во рок од еден месец.
Тоа барање ќе биде разгледано денес од Советот за безбедност на ОН, пренесува Бета-АФП.
Фото: принтскрин
Европа
САД одобрија продажба на оружје на Украина во вредност од 825 милиони долари

Американскиот Стејт департмент одобри продажба на оружје на Украина, чија вредност се проценува на 825 милиони долари, објави Агенцијата за соработка во одбраната и безбедноста на САД (DSCA).
Пакетот вклучува ракети со долг дострел и соодветна опрема што ги побара Киев.
Како што е вообичаено со продажбата на странско оружје, агенцијата соопшти дека Конгресот е известен.
Американските власти велат дека продажбата ќе ги зајакне безбедносните капацитети на Украина и ќе придонесе за нејзината способност да се соочи со сегашните и идните закани, како и да спроведува мисии за самоодбрана и регионална стабилност.
Се вели дека купувањето е финансиски поддржано од САД, Данска, Холандија и Норвешка.
Објавата доаѓа откако Русија изврши повеќе од 600 ракетни и беспилотни напади во среда навечер, што е нејзина најтешко бомбардирање од крајот на јули, и покрај неделите дипломатски напори за прекин на конфликтот.
фото: принтскрин