Црна Гора вчера вечер затвори три преговарачки поглавја, со што двојно го зголеми бројот на затворени поглавја во пристапните преговори кои беа отворени во 2012 година.

На меѓувладината конференција за пристапување, Црна Гора ги затвори преговорите во три поглавја – право за интелектуална сопственост, информатичко општество и медиуми и претприемништво и индустриска политика.

Црногорскиот премиер Милојко Спајиќ на прес-конференцијата изрази надеж дека Црна Гора ќе успее да ги затвори сите преостанати поглавја во следните две години.

Ова е голем потег за Црна Гора со оглед на тоа што досега затвори само три поглавја, а последното беше затворено уште во јуни 2017 година. Црна Гора аплицираше за членство во ЕУ уште во 2008 година, а пристапните преговори ги отвори во јуни 2012 година. Досега ги отвори сите преговарачки поглавја, а од вчера има вкупно шест затворени поглавја.

Комесарката за проширување Марта Кос вети поддршка во напорите за затворање на преостанатите поглавја. „Денешната меѓувладина конференција е доказ дека проширувањето е процес заснован на заслуги“, рече Кос.

За затворање технички беше подготвено уште едно поглавје, Надворешна, безбедносна и одбранбена политика, но Хрватска одби да се согласи со тоа.

Шефот на хрватската дипломатија Гордан Грлиќ Радман изјави дека ова не е блокада и дека Хрватска силно ја поддржува Црна Гора сите овие години, од моментот кога ги започна преговорите со ЕУ. Но, има одредени прашања кои не се од билатерален карактер, хуманитарни и цивилизациски прашања, кои се универзални, додаде хрватскиот министер.

Минатиот месец Хрватска испрати нон-пејпер (неформален дипломатски документ) до Црна Гора, во кој бара решавање на неколку отворени прашања кои ги нарушуваат меѓусебните односи на двете земји. Во тој документ, според дипломатски извори, се наведува дека двете земји треба да ги решат прашањата за сопственоста на училишниот брод Јадран, меѓусебната демаркација, гонењето на воените злосторства, потрагата по исчезнати лица, како и прашањето за името на градскиот базен во Котор, кој го носи името на поранешниот ватерполист Зоран Гопчевиќ, за кого Хрватска тврди дека бил чувар во логорот Морињ.

Новоизбраниот американски претседател Доналд Трамп изјави на прес-конференција во неговата резиденција во Мар-а-Лаго, Флорида дека има намера да стапи во контакт и да разговара со Владимир Путин, како дел од напорите да се запре војната во Украина.

Тој посочи дека и Володимир Зеленски треба да се подготви за склучување мировен договор.

Трамп вели и дека бројот на жртви од двете страни е многу поголем отколку што се тврди во јавноста.

„Луѓето се убиваат на ниво што никој досега не го видел. Тоа се многу рамни области и единственото нешто што може да го запре куршумот е тело, човечко тело. Бројот на војници кои умираат од двете страни е астрономски“, изјави Доналд Трамп, новоизбраниот американски претседател.

Министерството за надворешни работи на Русија соопшти дека Сиријците треба да одлучат за нивната иднина и повика на „инклузивна“ влада која ќе ги земе предвид различните етнички и верски интереси на земјата.

Во соопштението на Министерството се наведува дека Москва внимателно ја следи ситуацијата повеќе од една недела по падот на претседателот Башар ал Асад, кого Москва долго време го поддржува, и како што ситуацијата се смирува под командантот Ахмед ал Шара.

„Ние веруваме дека патот кон одржлива нормализација на ситуацијата во Сирија лежи во создавање инклузивен дијалог меѓу Сиријците, кој се заснова на постигнување национален договор и напредување во сложениот процес на барање политичко решение“, се вели во соопштението.

„За Русија е важно иднината на Сирија да ја одредат самите Сиријци. Веруваме дека децениското пријателство и взаемно почитување меѓу народите на нашите земји ќе продолжат конструктивно да се развиваат“, се додава.

Тие истакнаа дека со векови муслиманите живеат рамо до рамо со христијаните во Сирија.

Кремљ објави дека се уште не се донесени конечни одлуки за иднината на руските воени бази во Сирија и дека е во контакт со властите во таа земја.

Четворица сириски функционери изјавија за време на викендот дека Русија ги повлекува своите војници од фронтот во северна Сирија и од позициите во Алавитски планини, но не ги напушта своите две главни бази.

Асад, кој доби азил во Русија, ја даде својата прва изјава откако беше соборен, велејќи дека бил евакуиран од базата Хмејмим на 8 декември бидејќи била нападната со беспилотни летала, откако го напуштил Дамаск тоа утро додека бунтовничките борци се приближувале.