Свет
Бајден го зголеми водството пред Трамп, покажуваат новите анкети

Нови две анкети објавени во средата покажуваат дека Џо Бајден го зголеми водството пред актуелниот претседател Доналд Трамп на нешто повеќе од 100 дена пред изборите во ноември, пренесува „Њујорк тајмс“.
Анкетата на „Вол Стрит журнал“/„Ен-би-си њуз“ покажува дека 51 отсто од гласачите рекле дека би гласале за Бајден ако изборите се одржат сега, а 40 отсто го поддржуваат Трамп. Предноста на Бајден над претседателот се искачи на 11 процентни поени од 7 процентни поени минатиот месец.
Но, анкетата на „Вол Стрит журнал“ исто така покажа дека 54 отсто од анкетираните го одобруваат работењето на Трамп во економијата, што е рекордно високо ниво во анкетата и покрај економскиот пад предизвикан од пандемијата на коронавирус.
Анкетата на универзитетот „Квинипијак“, во меѓувреме, покажа дека Бајден го оствари своето најголемо водство годинава пред Трамп. Регистрираните гласачи го поддржуваат Бајден пред Трамп со 52 наспроти 37 отсто. Ова се споредува со анкетата од 18 јуни на „Кју“, според која Бајден има предност од 49-41 отсто. Од март, водството на Бајден се движи од 8 до 11 процентни поени во анкетите на „Кју“.
Анкетите, исто така, покажаа пад во процентот на одобрување на работата на врховниот командант.
Анкетата на „Вол Стрит журнал“ покажа дека вкупниот рејтинг за одобрување на работа на Трамп паднал за 3 процентни поени во текот на минатиот месец. Четириесет и два отсто од гласачите го одобриле работењето на Трамп, со 56 отсто неодобрување – неговиот најнизок рејтинг за одобрување на работата од април 2018 година.
Во анкетата на „Кју“, 60 отсто од гласачите не ја одобруваат работата на Трамп, додека 36 отсто ја одобруваат, што претставува пад од 6 поени во однос на минатиот месец. Во таа анкета на 18 јуни, 55 отсто не ја одобруваат работата на Трамп, а 42 отсто ја одобруваа.
Анкетата на „Вол Стрит журнал“/ „Ен-би-си њуз“ анкетираше 900 регистрирани гласачи од 9 јули до 12 јули и е со маргина на грешка од плус/ минус 3,2 процентни поени. Анкетата на „Квинипијак“ анкетираше 1.273 самоидентификувани регистрирани гласачи на национално ниво од 9 до 13 јули и е со магрина на грешка од плус/ минус 2,8 процентни поени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Невреме во Црна Гора: Сè беше забелено

Невремето што денес ја погоди околината на Колашин во Црна Гора донесе неочекувани сцени за првиот дел од август, сè е покриено како со бела покривка, пишуваат медиумите во регионот.
Сепак, според написите, не станува збор за снег, туку за град што падна низ целата област.
Според проценките, на некои места слојот на град достигнува и до 15 сантиметри.
Овој августовски пејзаж е вистинска реткост во овој дел и не се памети во поновата историја, пренесуваат медиумите.
Дел од скијачките патеки исто така беше покриен со град, а невремето предизвика значителни штети на планинските патишта, што претставува дополнителен предизвик за локалните жители и туристите.
Фото: принтскрин
Свет
Орбан: Не ја признаваме пресудата против Додик

Унгарија не ја признава конечната пресуда на Апелациониот совет на Судот на Босна и Херцеговина, со која беше потврдена првостепената одлука од февруари оваа година, објави премиерот на таа земја, Виктор Орбан.
„Унгарија не ја признава судската пресуда против претседателот Милорад Додик. Обидите на супервизорите назначени од ЕУ да го отстранат поради спротивставување на нивната глобалистичка агенда се неприфатливи. Тој е легитимен, избран лидер на Република Српска – ние цврсто се спротивставуваме на мешањето на Брисел во суверените прашања. Ништо не може да биде над волјата на народот“, напиша Орбан на социјалната мрежа Икс.
Медиумите во регионот потсетуваат дека Апелациониот оддел на Судот на Босна и Херцеговина во петокот ја потврди првостепената пресуда против претседателот на Република Српска, Милорад Додик, со која тој беше осуден на една година затвор и шестгодишна забрана за политичка активност поради непочитување на одлуките на Кристијан Шмит.
Свет
(Видео) Пукање во Лос Анџелес: има загинати и повредени

Најмалку две лица се убиени, а шест се ранети денес во пукање за време на забава по музички фестивал во центарот на Лос Анџелес, објавија властите.
Полицијата изјави дека едно лице осомничено за пукањето е уапсено.
LOS ANGELES MASS SHOOTING: Mass shooting after Hard Summer Music Festival afterparty in Inglewood, LA. 2 killed, 6 injured. pic.twitter.com/Rgra9sY59O
— Breaking911 (@Breaking911) August 4, 2025
Забавата беше промовирана на социјалните мрежи како неофицијална забава по фестивалот „Hard Summer”, викенд фестивал на техно музика што се одржува во Холивуд Парк, објави АП.
Нема информации за мотивот на нападот.
Полицијата објави дека отворила истрага.