Свет
Бајден денеска оди во Полска, но нема да оди во Украина
Американскиот претседател Џо Бајден денеска ќе ја посети Полска за да ја одбележи првата годишнина од руската инвазија на соседна Украина, најголемиот конфликт во Европа по Втората светска војна, додека се очекуваат пролетни офанзиви од двете страни.
Украинскиот претседател Володимир Зеленски вчера изјави дека Русија претрпела исклучително големи загуби во близина на градот Вуледар во источната провинција Донбас за кој Москва тврди дека го анектира во септември.
„Ситуацијата е многу комплицирана. И ние се бориме. Ги победуваме окупаторите и ѝ нанесуваме исклучително големи загуби на Русија“, рече Зеленски во својата ноќна видеопорака.
Украинските власти апелираа до членовите на американскиот Конгрес да ја притиснат администрацијата на Бајден да испрати борбени авиони „Ф-16“ во Киев велејќи дека тие ќе ја подобрат способноста на Украина да гаѓа руски ракетни единици со ракети од американско производство, изјавија американски конгресмени.
Украинските власти, вклучително и министерот за надворешни работи, Дмитро Кулеба, лобираа кон крајот на минатата недела на маргините на Минхенската безбедносна конференција во разговорите со демократите и републиканците од Сенатот и Претставничкиот дом.
Бајден рече „не“ минатиот месец на прашањето дали ќе го одобри барањето на Украина за авиони „Ф-16“, произведени од „Локхид Мартин“.
Говорејќи во неделата, претставниците на неговата администрација рекоа дека САД треба да се фокусираат на испраќање оружје што може веднаш да се користи на бојното поле наместо борбени авиони за кои е потребна опсежна обука, но не ја исклучуваат можноста за испраќање „Ф-16“.
„Дискусиите ќе продолжат во следните неколку недели и месеци“, изјави американската амбасадорка во Обединетите нации, Линда Томас-Гринфилд, за Си-ен-ен.
Полскиот премиер Матеуш Моравјецки синоќа изјави дека за време на неговата посета меѓу 20 и 22 февруари со Бајден ќе разговара за можното зголемување на бројот на американски војници во Полска, кои исто така ќе останат таму подолг временски период.
„Ние сме во процес на преговори со администрацијата на претседателот Бајден за да го направиме нивното (војничко) присуство потрајно и да го зголемиме“, изјави Моравјецки.
Бајден минатиот јуни рече дека САД ќе основаат нова постојана воена база во Полска како одговор на руските закани.
Американскиот претседател ќе се сретне и со полскиот претседател Анджеј Дуда со кого ќе разговара за Украина и со други лидери од регионот, но тој не планира да оди во Украина, соопшти Белата куќа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Прослава на улиците на Техеран поради нападот врз Израел
Стотици Иранци излегоа на улиците на Техеран за да го прослават нападот во кој беа истрелани речиси 200 проектили кон Израел.
Свет
Советникoт за национална безбедност на САД: Нападот беше поразен и неефикасен
Американскиот советник за национална безбедност, Џејк Саливан, одржа прес-конференција во Белата куќа.
Тој потврди дека Соединетите Држави соработуваат со Израел за да го проценат влијанието на нападот и повтори дека во овој момент се знае дека никој не е убиен.
„Накратко, овој напад се чини дека е поразен и неефикасен“, нагласи тој.
Како што нагласи, нападот претставува значајна ескалација од страна на Иран.
„Подеднакво е значајно што успеавме да зачекориме напред со Израел и да создадеме ситуација во која никој не е убиен во Израел колку што знаеме во моментов“, додаде тој.
Потврди дека Белата куќа јасно ставила до знаење дека ќе има последици за овој напад.
Претставник на американското Министерство за одбрана изјави дека разурнувачите на американската морнарица во Средоземното Море пресретнале ирански балистички ракети за време на нападот врз Израел.
Американски разурнувачи учествуваа и во пресретнувањето на ирански балистички ракети и беспилотни летала на 13 април, соборувајќи неколку проектили лансирани кон Израел.
Свет
Мексико официјално ја доби својата прва жена претседател во историјата
Поранешната градоначалничка на Мексико Сити, Клаудија Шејнбаум, денеска официјално стана првата жена претседател на Мексико од независноста на земјата во 1821 година, наследувајќи го популарниот Андрес Мануел Лопез Обрадор на таа позиција.
Шејнбаум, климатски научник со еврејско потекло, положи заклетва пред претставници и сенатори во Мексиканскиот конгрес.
Во јуни таа победи на изборите со речиси 60 отсто од гласовите, откако излезе пред владејачката левичарска партија Движење за национална обнова (Морена) и сојузниците.
Тие имаат и удобно мнозинство во парламентот, што им овозможува да го променат Уставот без поддршка од опозицијата. На инаугурацијата пристигнаа бразилскиот претседател Луис Инасио Лула да Силва и првата дама на САД Џил Бајден.
Поранешната градоначалника на Мексико Сити ја превзема функцијата од нејзиниот ментор, Андрес Мануел Лопез Обрадор, кој ја воведе во политиката во 2000 година како заменик за еколошки прашања во градското собрание на мексиканската престолнина.
Веднаш по победата таа најави дека нејзината влада ќе биде фискално одговорна и ќе ја почитува автономијата на централната банка. Најави и дека ќе ја зајакне безбедноста на земјата, но не кажа како ќе го направи тоа по најнасилните избори во модерната мексиканска историја, пред кои беа убиени 38 кандидати.
Аналитичарите тврдат дека организираните криминални групи го зајакнале и го прошириле своето влијание за време на мандатот на Лопез Обрадор.
Ја удвои минималната плата, ја намали сиромаштијата, за време на неговиот мандат зајакна пезото, а невработеноста се намали, што го направи исклучително популарен, напиша Ројтерс.
Тој беше многу присутен во кампањата за овие избори, обидувајќи се да ги прикаже како референдум за неговото политичко наследство. Шејнбаум ги отфрли тврдењата на критичарите дека таа ќе биде негова „марионета“, иако најави дека ќе продолжи со многу од неговите политики.