Американскиот претседател Доналд Трамп на јавноста и ја покажа новата „златна карта“ вредна пет милиони долари со сопствен лик, која ќе им овозможи на побогатите мигранти да добијат зелена карта, односно постојан престој во Соединетите Американски Држави.

„За пет милиони долари, ова може да биде ваше“, им рече Трамп на новинарите во претседателскиот авион.

🚨Update: Trump unveils $5 million ‘gold card’ for rich migrants emblazoned with his image!! 🇺🇸🇺🇸🇺🇸pic.twitter.com/B53Lf0igf9

— US Homeland Security News (@defense_civil25) April 3, 2025

„Знаете ли што е оваа картичка? Тоа е златна карта, картата на Трамп“, додаде американскиот претседател.

Трамп изјавил дека тој самиот е првиот клиент на картичката, како и дека повеќе копии ќе бидат достапни за помалку од две недели, пренесува „Њузвик“.

Програмата „златна карта“ ќе им овозможи на поединците кои инвестираат 5 милиони долари во американски компании да останат во САД, заменувајќи ја постоечката виза EB-5.

Поддржувачите на оваа мерка на Трамп тврдат дека САД на овој начин би можел да собере значителен капитал, додека критичарите сметаат дека приоритет на Вашингтон треба да биде привлекување квалификувани таленти.

„Златната карта“ е дел од пошироките напори за замена на сегашната имигрантска виза за инвеститори EB-5 со нова програма која дава американско државјанство на странски инвеститори во американски фирми.

Според тековната програма EB-5, апликантите мора да платат помеѓу 100.000 и 200.000 американски долари како такси на Службите за државјанство и имиграција на САД (USCIS), да инвестираат помеѓу 800.000 и 1 милион американски долари и да отворат најмалку 10 работни места за американски работници.

Германската министерка за Европа и климатски прашања Ана Лирман требаше да одржи средба во Бања Лука со претставници на Партијата за демократски напредок (ПДП), но средбата беше откажана во последен момент, пишува „Klix.ba“.

Според потпретседателот на ПДП, Игор Црнадак, причина за откажувањето на состанокот е одлуката на Владата на Република Српска да ја прогласи министерката за персона нон грата, поради што таа ја напушта земјата.

Претседателот на Република Српска, Милорад Додик, се огласи по повод средбата и ја повика полицијата да ја спроведе министерката. „Како и секој непожелен посетител, германската министерка Ана Лирман дојде во Бања Лука скришум да се сретне со своите пулени во подрумот“, рече Додик.

Како што пишува „Клик“, тој додаде дека очекува полицијата на Република Српска наскоро да ја испрати министерката. Додик, кој веќе е санкциониран од Германија и има забрана за влез во земјата, ја критикуваше и Германија, прашувајќи „во што западна некогаш моќната Германија“.

Шефот на италијанската дипломатија Антонио Тајани денеска изјави дека Балканот е од фундаментално значење, дека треба да се работи на стабилноста во регионот и да се забрза пристапот на балканските земји во Европската унија, порачувајќи дека Италија ќе помогне во тоа.

Тој рече дека разговарал со Кристијан Шмит и посочил дека постои одредена загриженост за тоа што се случува во Република Српска, пренесе италијанската агенција „Нова“.

„Веруваме дека оваа тензија може да се намали“, рече Тајани.

Според него, Балканот е од фундаментално значење и, како што наведе, „не смее да и се дозволи на Русија да ја искористува ситуацијата во регионот бидејќи има обид и од Кина да има поголемо присуство таму“.

„Ние, сепак, треба да обезбедиме балканските земји да го забрзаат пристапот кон Европската унија. Ќе им помогнеме во тоа. Италија е актер во оваа акција – како што знаете, ја создадовме Балканската група за пријателство, ние сме многу активни и сите балкански земји ми се заблагодарија што ја поддржав потребата да се забрза нивниот пристап“, посочи тој.

Тајани рече и дека на дводневниот состанок на министрите за надворешни работи на НАТО, што се одржа вчера и денеска во Брисел, ја повторил потребата од зајакнување на европската одбранбена индустрија, но не исклучувајќи ги договорите со земјите кои не се дел од Европската унија.

„Мислам на Соединетите Американски Држави, Обединетото Кралство, Турција, Јапонија“, прецизира Тајани, пренесе агенцијата „Нова“.

Тој додаде дека Италија работи на зајакнување на европската безбедност, но кога станува збор за одбранбената индустрија, како што рече, „мора да бидеме отворени за соработка со другите, а не само со европската соработка, бидејќи во спротивно постои ризик од ограничување на пазарот и преземање премногу протекционистички пристап“.

Тајани изјави дека на состанокот на министрите за надворешни работи на НАТО многу се зборувало за трансатлантските односи, како и дека биле реафирмирани позициите за украинското прашање.

Шефот на италијанската дипломатија рече и дека американскиот државен секретар Марко Рубио ги информирал сојузниците за напредокот на разговорите, кои се подготовки за постигнување договор за прекин на огнот во Украина, што покажало дека постои трансатлантска кохезија и по ова прашање.

Тајани се осврна и на прашањето за американските царини, посочувајќи дека не е во ред да се отвори ваков тип на конфронтација, како и дека би било погрешно да се реагира со царинска војна.

Според Тајани, реакцијата мора секогаш да биде обмислена, интелигентна и не смее да предизвикува ескалација, а на американските царини мора да се реагира со голема смиреност и без брзање, пренесува Танјуг.

„Разговараме со компаниите, разговараме со сите експерти, заедно со Европејците оценуваме што да правиме и каква треба да биде содржината на секоја акција во однос на санкциите воведени за алуминиумот и неговите деривати. Повторувам: ние сме Европа и постапуваме во согласност со нашите интереси“, рече тој.