Свет
Бебе починало поради лоша организација на итните служби во Португалија
Единаесетмесечно бебе во Португалија починало откако чекало шест часа да биде префрлено од една во друга болница. Имено, бебето чекало да биде префрлено од болницата Протимао во болницата Фаро, кои се оддалечени 50 минути возење една од друга. Примарната дијагноза била дека бебето има бронхитис, а потоа било откриено дека има тешка инфекција на крвта, односно септикемија.
Според истрагата која била спроведена, страшната трагедија се случила поради недостиг на стручен кадар кој би обезбедил превоз. Поради ова, во целиот случај морало да се вклучи и хеликоптер, но реакцијата доцнела, пишува „Мирор“.
Во првите извештаи на лекарите, кои подоцна ги побиле раководителите на болницата, било наведено дека детето починало откако шест часа чекало да биде префрлено во друга болница.
Португалскиот дневен весник „Кореио да Манха“ објави дека лекарите првично барале трансфер во болницата Санта Круз во Лисабон, главната кардиолошка болница, пред да биде донесена одлуката бебето да се пренесе со хеликоптер во болницата Фаро.
Портпаролот на португалскиот национален институт за итни медицински услуги, агенција на Министерството за здравство, изјави дека постапката за патување со хеликоптер е започната бидејќи состојбата на бебето нагло се влошила.
Шефот на португалскиот синдикат на болнички техничари, Руи Лазаро, истакна дека медицинскиот персонал морал да биде поажурен и да излезе со друго решение.
„Тие навистина не ги разгледаа опциите што ги имаа“, рече тој.
Наведено е дека срцето на детето застанало поради воспаление предизвикано од бактериски инфекции.
Болнички извори изјавија дека на бебето му биле дадени антибиотици откако му бил дијагностициран бронхитис и прогнозата била добра, но во болницата било откриено дека боледува од септикемија.
Синдикатот изјави дека ова не е првпат службите за итни случаи да не можат навреме да реагираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.