Свет
Белата куќа: Нормализацијата на односите меѓу Саудиска Арабија и Израел ќе биде долг процес
Белата куќа објави дека подобрувањето на врските меѓу Израел и Саудиска Арабија ќе биде во фокусот на претстојната посета на американскиот претседател Џозеф Бајден на Блискиот Исток, но дека нормализирањето на односите ќе биде долг процес.
В среда Бајден ќе ги посети Израел и Западниот Брег, а в петок ќе отпатува за Саудиска Арабија, јавуваат американските гласила.
Израелските власти се надеваат дека ќе ги подобрат односите со Саудиска Арабија за време на посетата, но американскиот советник за национална безбедност, Џејк Саливан, ги омаловажи надежите за пресврт, пишуваат медиумите.
„Секое нормализација ќе биде долг процес“, им рече Саливан на новинарите во понеделникот.
Бајден ќе биде првиот американски претседател што директно ќе отпатува од Израел во Саудиска Арабија, истакнуваат израелските медиуми.
Тој го опиша овој лет во авторската статија објавена во „Вашингтон пост“ како мал симбол на одмрзнувањето на врските меѓу Израел и арапскиот свет и чекор кон нормализација.
Саливан рече дека самиот директен лет е значаен и необичен чекор и вети дека може да се случи поголема интеграција.
Израелскиот министер за одбрана, Бени Ганц, неодамна изрази надеж дека за време на посетата на Бајден може да се постигне напредок во напорите за изградба на регионален воен сојуз против Иран, во кој ќе биде вклучена и Саудиска Арабија.
Ганц зборуваше за напорите предводени од САД за воспоставување регионален пакт за противвоздушна одбрана меѓу Израел и неговите арапски сојузници во регионот против заканата од ирански беспилотни летала и ракети.
Алијансата, наводно, ќе ги вклучи ОАЕ, Египет, Јордан, Бахреин, Саудиска Арабија и Катар.
Тој смета дека посетата на Бајден ќе биде можност да се забрзаат овие напори, објавија светските агенции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.