Свет
Бела куќа: Се уште нема договор меѓу Израел и Хамас

Израел и Хамас се уште не постигнале договор за привремен прекин на огнот, изјави синоќа портпаролот на Белата куќа, одговарајќи на извештајот на „Вашингтон пост“ дека е постигнат договор. САД продолжуваат да работат на постигнување договор меѓу двете страни, рече портпаролот. Друг американски функционер потврди дека не е постигнат договор.
„Вашингтон пост“ вчера објави дека меѓу Израел и Хамас со посредство на Катар е постигнат договор за петдневен прекин на огнот во замена за ослободување на 50 или повеќе заложници.
„Сè уште нема договор, но продолжуваме да работиме напорно за да постигнеме таков“, рече во соопштението Адриен Вотсон, портпаролка на Советот за национална безбедност на Белата куќа.
Израел вети дека ќе го уништи Хамас по дивеењето на милитантната група во Израел на 7 октомври, во кое нејзините борци убија 1.200 луѓе и зедоа 240 заложници, според израелските податоци. Како што конфликтот влезе во седмата недела, властите во Појасот Газа, управуван од Хамас, соопштија дека бројот на загинати се искачи на 12.300, вклучувајќи 5.000 деца.
Израел соопшти дека се подготвува да ја прошири својата офанзива против милитантите на Хамас во јужниот дел на Газа, откако во воздушните напади загинаа десетици Палестинци, вклучително и цивили кои наводно се засолниле во две училишта.
Што објави „Вашингтон пост“
„Вашингтон пост“ објави дека Израел, САД и Хамас постигнале пробен договор за ослободување на десетици жени и деца држени како заложници во Газа во замена за петдневен прекин на огнот. Како дел од деталниот договор на шест страници, сите страни ќе ги замрзнат борбените операции најмалку пет дена, додека „почетните 50 или повеќе заложници се ослободуваат во помали групи на секои 24 часа“, објави Пост.
Весникот наведува дека копнениот систем за надзор ќе ги следи движењата на теренот за да помогне во одржувањето на прекинот на огнот, кој исто така има за цел да дозволи значителна количина хуманитарна помош.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Фото) Аеродромот во Загреб затворен за сообраќај – мал авион слета надвор од пистата

Аеродромот „Фрањо Туѓман“ во Загреб денеска попладне беше затворен за сообраќај поради инцидент со приватен авион кој се излизгал од пистата, пишува Индекс.
Инцидентот се случил околу 15:21 часот, при слетување на приватен авион од типот Cessna 525.
Леталото проклизнало и завршило на тревната површина покрај пистата.
Според информации од авиокомпанијата, авионот бил празен и во инцидентот нема повредени.
Во моментот се преземаат мерки за отстранување на леталото од пистата, а аеродромот останува затворен до понатамошно известување.
Од Аеродромот „Фрањо Туѓман“ се извинија на патниците за доцнењата на пристигнувачките и поаѓачките летови и најавија дека јавноста ќе биде навремено информирана кога сообраќајот повторно ќе биде воспоставен.
Свет
Масовни протести во Шпанија против корупција

Повеќе од десетици илјади луѓе се собраа денес во Мадрид на демонстрации организирани од главната конзервативна опозициска партија, против владата на социјалистичкиот премиер Педро Санчез, обвинувајќи ја за корупција.
Демонстрантите се собраа на Шпанскиот плоштад во центарот на главниот град, велејќи му на Санчез да „поднесе оставка“.
Народната партија го свика собирот откако протечените аудио снимки наводно покажуваат дека член на Социјалистичката партија води кампања за клевета против полициска единица што истражува обвинувања за корупција, во која наводно се вклучени сопругата, братот и поранешната десна рака на Педро Санчез.
Социјалистичката членка ги негираше обвинувањата, кажувајќи им на новинарите дека спроведувала истражување за книгата и дека не работи во име на партијата или на Педро Санчез, а потоа ја напуштила Социјалистичката партија.
Лидерот на Народната партија, Алберто Нуњез Феихо, ја обвини владата за „мафијашки практики“ во аферата, тврдејќи дека Санчез е во центарот на повеќе корупциски скандали.
Народната партија процени дека повеќе од 100.000 луѓе присуствувале на денешниот митинг под слоганот „Мафија или демократија“.
Владин претставник во Мадрид процени дека на демонстрациите имало помеѓу 45.000 и 50.000 луѓе.
Свет
Тропската бура Барбара се формираше покрај брегот на Мексико

Тропската бура Барбара се формираше покрај југозападниот брег на Мексико, соопшти Националниот центар за урагани во Мајами рано утрово. Не се издадени предупредувања за крајбрежна опасност.
Брзината на ветерот беше околу 75 километри на час со повремени силни налети. Се очекува бурата да прерасне во ураган во понеделник.
Во делови од мексиканските држави Гереро, Мичоакан, Колима и Халиско можни се обилни врнежи од дожд од 5 до 10 сантиметри, а на некои места и до 15 сантиметри. Врнежите од дожд можат да доведат до поплави и лизгање на земјиштето.