Свет
Белешките на мртвите севернокорејски војници откриваат ужасна тактика: „Човечката мамка треба да биде на 7 метри од дронот“

Рачно напишаните белешки пронајдени покрај телата на загинатите севернокорејски војници убиени на бојното поле во областа Курск во Русија откриваат ужасна тактика во која војниците на Пјонгјанг се користат како мамка за соборување на украинските беспилотни летала.
Украинските сили за специјални операции пронашле белешки во кои војниците опишале смртоносни тактики и ја изразиле својата љубов кон својот лидер Ким Џонг-ун и копнежот да се вратат во својата татковина, пишува британски „Телеграф“.
На еден од цртежите од пронајдената тетратка се гледа како војник излегува за да го привлече вниманието на дрон, а неговите двајца другари чекаат да го соборат.
„Кога мамката стои, дронот ќе застане и ќе биде соборен“, напишал војникот во своите белешки.
Детаљно е опишано како човечката мамка треба да стои на седум метри од украинскиот дрон, кој потоа ќе биде неутрализиран со прецизен удар.
Воените набљудувачи и украинските команданти велат дека севернокорејските војници не се обучени за модерно војување и дека Русите ги користат како топовско месо испраќајќи ги пеш преку отворени полиња, без артилериска поддршка, за да ја тестираат украинската одбрана, додека се придружувани од мали групи руски специјални сили.
Речиси 4.000 Севернокорејци веќе се убиени или повредени, изјави во четвртокот украинскиот претседател, Володимир Зеленски. Американските власти проценуваат дека само во последната недела од декември биле убиени повеќе од 1.000 војници од Пјонгјанг.
Рачно напишаниот дневник, кој беше пронајден на 21 декември, му припаѓал на млад војник што загинал на фронтот заедно со двајца сонародници, соопштија украинските специјални сили.
Неколку дена претходно украинските сили заробија двајца севернокорејски војници, кои рекоа дека мислеле оти биле испратени во Украина на обука, а не во вистинска борба.
Зеленски му ги понуди заробените војници на Пјонгјанг во замена за украинските воени затвореници, кои се држат во Русија, додавајќи дека Киев сигурно ќе зароби повеќе севернокорејски војници во иднина.
Многу од илјадниците севернокорејски регрути испратени во Русија во октомври сѐ уште биле тинејџери. Паднатиот војник, чиј дневник бил пронајден на бојното поле во руската област Курск, опишал како му недостигале родителите и како го прославил роденденот на својот колега.
„Копнеам по мојата татковина откога ја напуштив топлата прегратка на моите драги татко и мајка, а овде во Русија го славам роденденот на мојот најблизок другар Сонг Џи Мионг“, напишал војникот.
Неговиот дневник покажува и како младиот регрут бил длабоко индоктриниран и целосно лојален на севернокорејскиот диктатор Ким Џонг-Ун.
„Дури и по цена на мојот живот, без двоумење, ќе ги извршувам наредбите на врховниот командант“, напишал младиот човек.
Според договорот за заемна воена помош, потпишан со Владимир Путин минатиот јуни, Ким испрати речиси 12.000 регрути да им помогнат на руските сили да ги протераат украинските војници од регионот Курск.
Во замена за војници и резерви ракети и артилериски гранати Путин наводно ѝ испраќа гориво на Северна Кореја и му помага на Ким да лансира шпионски сателити.
Руските воени блогери велат дека војниците на Кремљ се обидуваат да ги истуркаат преостанатите украински воени единици од регионот Курск пред Доналд Трамп да положи заклетва како американски претседател на 20 јануари по што би можел да се обиде да наметне мировен договор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Полска ја затвора вратата; „Не им верувајте на Путин и Лукашенко, тие ве лажат“

Полскиот премиер Доналд Туск денеска најави „информативна кампања“ во седумте земји од кои доаѓаат повеќето мигранти за да ги спречат да влезат во Полска преку Белорусија.
Поради оваа миграција, која, по Варшава, беше оркестрирана од Минск и Москва, на крајот на март, Полска го ограничи правото на азил на странците по пристигнувањето на границата со Белорусија.
Туск исто така рече дека „илјадници војници, граничари и полицајци, камери и дронови го следат секој метар од границата 24 часа на ден“.
Туск не прецизираше во кои земји ќе се одвива „информативната кампања“ што ја најави.
Најголем дел од мигрантите кои сакаат да влезат во Полска се од Блискиот Исток и Африка.
„Нашата порака ќе биде едноставна: полската граница е затворена! Не им верувајте на шверцерите, не верувајте му на белорускиот претседател Лукашенко, не му верувајте на Путин! Ве лажат кога велат дека ова е патот до Европа. Тоа не е точно! рече Туск.
Според полските граничари, повеќе од 30.000 луѓе се обиделе илегално да ја преминат границата со Белорусија во 2024 година.
Полска постави метална гранична ограда висока пет метри со софистицирани уреди за надзор и распореди илјадници војници по неа.
Регион
Младо момче пропадна низ отвор на лифт во Сараево

На Природно-математичкиот факултет во Сараево денеска млад човек паднал низ отворот од лифтот, пренесува Radiosarajevo.ba.
„Денеска во 13 часот и 44 минути пријавена е оваа несреќа. Млад човек се обидел да излезе од лифтот и паднал низ отворот“, изјавиле од противпожарната бригада на Сараево.
Пожарникарите за две до три минути биле на местото на несреќата и го ослободиле, а момчето било при свест.
Откако пожарникарите го извлекле младиот човек, брзата помош дошла да го пренесе во болница.
Не е познато според написите, дали младиот човек е потешко повреден.
Свет
Хотелите во Британија сo заканa дека ќе избркаат стотици баратели на азил

Хотели во Велика Британија се закануваат со бркање на стотици баратели на азил откако не ја добиле договорената исплата од сместувачката компанија „Stay Belvedere Hotels“ (SBHL), објавија британските медиуми.
Хотелите, претежно во лондонската област, најавија дека минатиот месец требало да добијат исплати од СБХЛ за сместување на баратели на азил, објави британски „Телеграф“.
Британското Министерство за внатрешни работи минатиот месец го отповика договорот на SBHL поради наводни неправилности.
Се проценува дека моментално има околу 38.000 баратели на азил сместени во хотели во Велика Британија.
Британското Министерство за внатрешни работи одвојува 5,5 милиони фунти дневно за нивно сместување, пренесува Танјуг.