Европа
Белорусија: Ќе учествуваме во руските нуклеарни вежби

Белорусија денеска објави дека нејзината војска учествува во втората фаза од вежбите за распоредување руско тактичко нуклеарно оружје, кое го нареди рускиот претседател Владимир Путин.
Првата фаза од вежбите се одржа во јужна Русија минатиот месец, во она што нуклеарните аналитичари го опишаа како предупредувачки знак на Путин за да го одврати Западот поактивно да влезе во војната во Украина.
Белорускиот министер за одбрана, генерал Виктор Хренин, рече дека вежбите се активна мерка за „да ја зголемиме нашата подготвеност да користиме таканаречено оружје за возвраќање“.
„Сега, повеќе од кога било досега, ние сме решени да одговориме на какви било закани за нашата земја и за сојузот на Русија и Белорусија“, рече тој.
Тој не кажа каде се одржуваат вежбите и за каков тип на оружје станува збор. Белорусија дели граница со три земји членки на НАТО – Полска, Литванија и Латвија.
„Ние немаме цел да создаваме никакви тензии во прашањата за регионалната безбедност. Ние не проектираме значителни воени закани за трети земји или некој друг“, додаде Хренин.
„Ние сме мирна земја, не се закануваме и не бараме конфликт со никого, но својот барут ќе го чуваме сув!“
Путин и белорускиот лидер Александар Лукашенко минатата година најавија дека Русија ќе префрли дел од своето тактичко нуклеарно оружје во Белорусија.
Станува збор за бојни глави наменети да се користат на бојното поле за разлика од стратешкото оружје со долг дострел, кое служи за уништување цели непријателски градови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.