Свет
Бесент: Царините, намалувањата на даноците и дерегулацијата на Трамп ќе доведат до инвестиции во Америка

Американскиот министер за финансии Скот Бесeнт денес изјави дека планот на претседателот Доналд Трамп, кој вклучува царини, намалување на даноците и дерегулација, ќе има ефект врз поттикнување на долгорочни инвестиции во американската економија.
Тој додаде дека американските финансиски пазари се стабилни и ќе издржат какви било краткорочни турбуленции, објави Ројтерс.
Бесент ги бранеше царините на Трамп и нагласи дека републиканскиот закон за даноци се разгледува во Конгресот, истакнувајќи дека многу делови од намалувањата на даноците ќе станат трајни, вклучително и одбивањето за мали бизниси.
„Главните компоненти на економската агенда на Трамп – трговијата, намалувањето на даноците и дерегулацијата, претставуваат меѓусебно поврзани делови од моторот дизајниран да поттикнува долгорочни инвестиции во американската економија“, рече Бесент, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шпанија сака ембарго на оружје за Израел: „Која е алтернативата, убивање Палестинци?“

Шпанија повикува на меѓународно ембарго на оружје против израелската влада за да се стави крај на војната и хуманитарната катастрофа во Појасот Газа.
„Сите мора да се согласиме за заедничко ембарго за оружје“, изјави министерот за надворешни работи Хозе Мануел Албарес пред новинарите на почетокот на состаноците на министрите од таканаречената Мадридска група во шпанската престолнина.
„Последното нешто што му треба на Блискиот Исток во моментов е оружје.“
Албарес повика на „итна суспензија“ на договорот за партнерство на Европската Унија со Израел, мерка што моментално ја разгледува Брисел, и наметнување на целни санкции против поединци „кои го попречуваат решението за две држави“.
Доколку е потребно, треба да се воведат санкции и против израелскиот премиер Бенјамин Нетанјаху, рече Албарес.
„Ништо што се дискутира овде не е насочено против Државата Израел“, нагласи водечкиот шпански дипломат. Но, тој исто така рече дека „Палестинците имаат точно исти права на мир и безбедност како и Израелците“.
Нема алтернатива на решението со две држави за постигнување траен и праведен мир, рече Албарес.
Во интервју за Франс Инфо, министерот рече: „Која е алтернативата? Да се убијат сите Палестинци? Да се однесат, не знам каде, на Месечината? Или да им се даде израелско државјанство?“
Шпанската влада е една од најкритичните влади во Европа во врска со израелската војна во Газа.
Во септември минатата година, го организираше првиот состанок на Мадридската група.
Учесниците се високи претставници од околу 20 земји од Европа и арапскиот свет, како и од Бразил, и се среќаваат по втор пат.
Од почетокот на војната, израелската армија убила повеќе од 53.900 Палестинци и ранила повеќе од 122.700.
Свет
Воз во Русија налета на експлозив поставен под шините

Во рускиот Белгородски регион воз налета на експлозивна направа, предизвикувајќи експлозија, објави гувернерот Вјачеслав Гладков на својот канал Телеграм.
„Според прелиминарните информации, возот налетал на експлозивна направа поставена под шините“, напиша тој.
Повредени нема, но оштетена е контактната мрежа на железничката пруга.
Железничкиот сообраќај е привремено во прекин. Сите служби за итни случаи се на терен.
Свет
Трамп бара имиња на странските студенти кои студираат на „Харвард“: Сакаме да знаеме од каде се

Американскиот претседател, Доналд Трамп, изјави дека неговата администрација сака имиња и земји на сите странци кои студираат на Харвард, сугерирајќи дека странските земји, особено оние кои се непријателски настроени кон САД, треба да придонесат за финансирање на образованието на нивните студенти.
„Зошто Харвард не соопшти дека речиси 31 отсто од нивните студенти се од странски земји, и додека некои од нив воопшто не се пријателски расположени кон Соединетите држави, тие не плаќаат ништо за образованието на своите студенти, ниту пак имаат намера да го направат тоа“, напиша Трамп на „Тру соушал“.
Тој истакна дека неговата администрација сака да знае кои се и од каде се странските студенти и додаде дека Харвард „не е многу отворен“.
„Ги сакаме тие имиња и земји“, рече Трамп.
Според податоците на Харвард, во оваа учебна година 27 отсто од студентите доаѓаат од странство, а најмногу се од Кина, Канада, Индија, Јужна Кореја и Велика Британија.
Во учебната 2024-2025 година на Харвард беа запишани 6.793 студенти на додипломски и магистерски студии од 147 земји.
Странските студенти немаат право на какво било федерално финансирање, според делот за финансиска помош на веб-страницата на Харвард, додавајќи дека колеџот има свои пари за стипендии, кои се достапни за странски студенти.