Европа
„Билд“: Берлински проповедник го радикализира терористот што сакаше да нападне на концертот на Тејлор Свифт

Австриската полиција вчера пријави планови за напад на концертот на Тејлор Свифт, откако 19-годишник со македонски корени признал се и детално опишал како имал намера да го изврши нападот. Заедно со него уапсени се и 17-годишник кој има хрватско-турски корени и 15-годишник со турски корени.
19-годишниот терорист планирал да се убие себеси и голем број луѓе кои ќе го слушаат концертот на Тејлор Свифт пред стадионот. Се проценува дека пред стадионот би имало околу дваесет илјади луѓе. 17-годишникот е уапсен од полицијата пред стадионот, но неговиот адвокат тврди дека нема никаква врска со тероризам, ниту пак планира да нападне.
Германскиот Билд денеска пишува дека 19-годишниот, кој пред околу еден месец се заколна на Исламската држава, бил радикализиран преку Интернет и дека го радикализирал берлинскиот проповедник на омраза Абул Бараа, чие вистинско име е Ахмад Армих. Билд се повикува на извори од тајните служби.
До 2020 година Бараа беше во џамијата Ас-Сахаба во Берлин, во која полицијата во 2018 година изврши рација под сомнение за финансирање тероризам и која сега е затворена.
Билд потсетува дека Бараа одржувал врски преку џамијата со водачите на исламистичката сцена и, во некои случаи, со насилниот џихадистички салафизам. По затворањето на џамијата, тој најголемиот дел од своите активности ги префрли на Интернет, на социјалните мрежи преку кои допира до илјадници следбеници.
Германската канцеларија за заштита на Уставот веќе предупреди за него: „Затворањето на неговата берлинска џамија и пандемијата на корона доведоа до поголем ангажман на социјалните мрежи. Таму неговата реторика и неговиот стил на презентација се особено популарни меѓу младите“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.