Свет
Би-би-си денеска слави 100 години постоење

Глобалниот медиумски гигант, Британската радиодифузна корпорација (Би-би-си), денеска ја прославува својата 100-годишнина со поглед на славното минато, но и неизвесна иднина.
Би-би-си се етаблира како еден од највидливите и најпочитувани светски брендови во Британија со својата оригинална мисија да „информира, едуцира и забавува“.
Телевизиската компанија секоја недела допира до 492 милиона луѓе во светот, според годишниот извештај на корпорацијата за 2021/2022 година.
Светскиот сервис емитува на 41 јазик за речиси 364 милиони луѓе неделно во целиот свет.
„Веќе еден век Би-би-си беше светилник на веродостојни вести и програми во целиот свет, како и дел од структурата на Обединетото Кралство и една од нејзините клучни институции“, рече генералниот директор на Би-би-си, Тим Дејви, за оваа историска годишнина.
Речиси на седум милиони луѓе секој ден им почнува слушајќи ја програмата „Денес“ на „Би-би-си Радио 4“, која често ја поставува политичката агенда.
Strictly Come Dancing“, кој ги спојува познатите личности со професионални танчари во сала за бал, ги привлекува гледачите на екраните веќе 20 години и е најозборуваната програма на телевизија. Сериите, како Peaky Blinders, Fleabag и Killing Eve, се популарни во целиот свет.
Но, стогодишнината на Би-би-си доаѓа во неизвесно време, со драстично намалување на буџетот и промени во навиките за гледање поттикнати од дигиталната револуција, па се поставуваат прашања за неговата иднина.
Во јануари владата објави дека ќе ја замрзне ТВ-таксата на Би-би-си на две години. Годишната наплата за домаќинствата со телевизор сега е 159 фунти.
Претседателот на Би-би-си, Ричард Шарп, вети дека Би-би-си „ќе информира, едуцира и забавува уште еден век“.
„Би-би-си денес има сто години – време за славење, но и за прифаќање на иднината“, рече Шарп.
„Верувам дека најдобрите денови се пред нас. Секогаш иновираме, менувавме и се приспособуваме“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Гардијан“: ЕУ е гигант што се однесува како глушец пред САД

Европската Унија е колос кој за себе мисли дека е глушец и во преговорите за царините со американскиот претседател Доналд Трамп, наместо решително да одговори на неговиот блеф, одлучи дека е подобро превентивно да го потопи сопствениот чамец, само за да не го ниша, пишува денес британски „Гардијан“.
„Зошто ЕУ се задоволува само со грицкање на периферијата на моќта? Ќе има ли некогаш толку самопочит како Кина, која му се спротивставуваше на Трамп со царина по царина сè додека не се повлече“, прашува „Гардијан“.
Медиумот проценува дека ЕУ би можела да го оспори блефот на Трамп бидејќи има многу поголема моќ против неговата политика од Кина.
Со овој инструмент, според проценката на весникот, таа би можела целосно да го запре производството на напредни полупроводници во САД со забрана на извозот, да го уништи „технолошкиот непријател“ од Силиконската долина со даноци и забрани за влез на пазарот и укинување на заштитата на интелектуалната сопственост и сериозно да го наруши снабдувањето со лекови на САД.
„Дали би ескалирало? Нема сомнение дека би ескалирало. Но, како послаб технолошки играч, ЕУ сигурно би имала помалку да изгуби, а повеќе да добие. Покрај тоа, Европејците го мразат Трамп и веројатно би се обединиле во случај на целосна царинска војна, додека Американците, од кои половина исто така го мразат Трамп, не би се обединиле“, оценува весникот.
Европа, пишува весникот, е подготвена да го прифати „шокантното однесување на САД што ги поместува границите, но не и своите“, објавува Бета.
„Предавањето на барањата на Трамп е однесување на ентитет кој продолжува да верува дека САД се своеглав пријател на кој треба да му се угоди, да му се ласка и да се плаши, додека во исто време САД под водство на Трамп ја гледаат Европа и ја третираат како слаба, наивна работа која треба да се манипулира и експлоатира“, пишува весникот, додавајќи дека треба да се очекува дека Трамп и неговите слични ќе дојдат со нова рунда уцени и барања.
„Гардијан“ пишува дека, дури и ако на Европа не ѝ се допаднало, светот се променил и дека во овој нов свет, Русија, Кина и САД сакаат да се вратат на идеологијата на зоните на интереси и да го заменат владеењето на правото со владеењето на посилниот.
„ЕУ останува единствената значајна сила која посакува свет кој се придржува до владеењето на правото. Ова не значи дека е единствениот таков актер, таа е во друштво на Велика Британија, Австралија, Нов Зеланд, Јужна Кореја и, кога станува збор за климата, голем број други земји, потенцијално предводени од Бразил“, се наведува во текстот.
Фото: принтскрин
Свет
Сијарто: Украина не припаѓа на цивилизираните земји

Украина нема место во Европската Унија бидејќи не припаѓа на цивилизираните земји, изјави министерот за надворешни работи на Унгарија, Петер Сијарто, во врска со одбивањето на украинските власти да го истражат убиството на Унгарецот Јожеф Шебестјен од украинскиот регион Закарпатска за време на присилна мобилизација.
„Во Украина присилното повикување на воена служба е државен инструмент. Таква земја нема место во Европската Унија и не припаѓа на цивилизираните земји“, рече Сијарто во емисијата „Воинствениот час“ на јутјуб-платформата, пренесува „Спутник“.
Според министерот, доколку нешто слично се случеше во нормална и цивилизирана земја, виновниците одамна ќе беа казнети.
Раководството на Европската Унија молчи и во врска со убиството на 45-годишен жител на градот Берегово, кој, покрај украинското, имаше и унгарско државјанство, рече Сијарто.
„На овој начин Брисел признава дека го поддржува и одобрува ова, како и дека сето ова се случува со негова премолчена согласност и тивка поддршка“, додаде Сијарто.
Фото: принтскрин
Свет
Зеленски: Русија нападна гасен објект во Одеса, сакаат да нè загрозат пред зимата

Русија нападна гасен објект во јужна Украина во регионот Одеса поткопувајќи ги подготовките за зимата, изјави денес претседателот Володимир Зеленски.
Тој рече дека гасната инфраструктура била нападната во селото Новосилске на границата со Романија, каде што се наоѓа интерконекторот „Орловка“, преку кој Украина добива гас преку трансбалканската рута.
„Ова беше намерен удар врз нашите подготовки за грејната сезона, апсолутно циничен како и секој руски удар врз енергетскиот сектор“, напиша Зеленски на „Телеграм“.
Украина се соочува со сериозен недостиг на гас по серијата разорни руски ракетни напади оваа година, кои значително го намалија домашното производство на гас.
Русија негира дека таргетирала цивили од почетокот на нејзината целосна инвазија на Украина, но тврди дека инфраструктурата, како што се енергетските системи, е легитимна цел бидејќи помага во воените напори на Украина, анализираат медиумите.
Порано денес, гувернерот на јужниот регион Одеса пријави напад врз гасната инфраструктура и главниот гасовод велејќи дека се работи на пумпање гас од гасоводот. Украинските енергетски претставници не кажаа дали интерконекторот е оштетен и дали гасот ќе продолжи да тече.
Фото: принтскрин