Свет
Близнаци пронајдени мртви во кутија за играчки на Флорида
Близнаци на возраст од 4 години биле пронајдени мртви во кутија за играчки во семејниот дом во Џексонвил, Флорида. Мајка им Сејди Мајерс на „Фејсбук“ напишала дека близнаците Аурора и Келан на 25 август се разбудиле среде ноќ за да си играат, а потоа заспале во кутијата, пренесува Ен-би-си.
„Некогаш за време на спиењето еден од нив сигурно се мрднал или удрил во кутијата и тоа предизвикало затворање на капакот на оваа стара кутија од кедрово дрво“, напиша Мајерс на „Фејсбук“. „Полека останале без кислород и за неколку часа и умреле“, додаде таа.
Мајерс рече дека следното утро таа, нејзиниот сопруг и нивните две најстари деца сфатиле дека близнаците не се во своите кревети и тогаш нивниот постар брат ги нашол во кутијата, пренесуваат американските медиуми.
Four-year-old Florida twins suffocate to death in toy chest, leaving family shattered https://t.co/MGIqLIfDLV pic.twitter.com/odFw4Z9KRF
— New York Post (@nypost) September 5, 2023
„Знаев дека нешто не е во ред, но исто така бргу сфатив дека е предоцна“, напиша Мајерс.
„За мене нема смисла и никогаш нема… Се надевам дека ова спознавање помага на некој начин и се надевам дека веднаш ќе ја уништите ваквата кутија доколку ја имате дома“, додаде таа.
„Секогаш внимавав децата да не се заклучат внатре, но, за жал, кутијата е херметички затворена и да не е заклучена“, опиша мајката.
The adored twins had woken up in the early hours to play before pulling toys out of a wooden chest and snuggling up next to each other inside of it. https://t.co/8fiPnoGuVS
— Sky News Australia (@SkyNewsAust) September 5, 2023
Поручник на шерифот во Џексонвил изјави дека децата биле во несвест кога полицијата и брзата помош пристигнале на местото на настанот, но и покрај обидите за реанимација, тие биле прогласени за мртви.
„Во овој момент не знаеме дали ова е несреќа или злосторство“, изјави поручникот за Ен-би-си.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
ЕУ: Веќе нема ризик од кршење на владеењето на правото во Полска
Европската комисија денеска објави дека планира да ја затвори постапката против Полска до крајот на мај, бидејќи веќе не постои ризик од сериозно кршење на владеењето на правото.
Потпретседателката на Комисијата за вредности и транспарентност, Вера Јоурова, изјави дека полските власти покажале решителност да ги исправат неправилностите во областа на правдата, дека признале дека има проблем во таа област, дека се подготвени да го елиминираат, дека европското законодавство има приоритет пред националното законодавство и дека се обврзале дека ќе ги спроведуваат одлуките на Судот на правдата на Европската унија и Европскиот суд за човекови права поврзани со владеењето на правото, вклучително и независноста на судството.
„Мислам дека во случајот со Полска веќе нема очигледен ризик од сериозно кршење на владеењето на правото“, рече Јоурова и најави дека по дискусијата на состанокот на министрите за европски прашања во вторник овој месец, ќе предложи до Комисијата да ја затвори постапката.
Таа додаде дека приговор на ваквата оценка има само унгарскиот министер за правда Јанош Бока, кој обвинува дека Комисијата во овој случај се води од политички причини, а не од реални промени во полското правосудство.
Во текот на осумте години на власт, претходната полска влада предводена од националистичката партија Право и Правда спроведе низа реформи во судството, со што се доведе во прашање поделбата на власта и независноста на судството, како и слободата на медиумите. Поради ова, Полска беше блокирана од милијарди евра кои и беа наменети во европскиот буџет.
Новата полска влада предводена од премиерот Доналд Туск, која ја презеде функцијата во декември минатата година, најави дека ќе обезбеди повторно воспоставување на независноста на судството и ќе го поништи она што претходната влада го направи во таа област.
Слична постапка се води и против Унгарија, чија влада со години е во конфликт со европските институции и другите членки на ЕУ за почитување на владеењето на правото во таа земја.
Свет
Поддршката за Бајден на најниско ниво во последните две години
Поддршката за американскиот претседател Џо Бајден падна на најниско ниво во речиси две години овој месец, што одговара на најнискиот процент од неговиот мандат, покажа денеска објавената анкета на Ројтерс и Ипсос.
Истражувањето покажа дека само 36 отсто од Американците го одобруваат настапот на Бајден, што е намалување од 38 отсто во април.
Ова е враќање на најниското ниво на поддршка за демократски претседател во јули 2022 година, половина година пред Бајден да се соочи со републиканскиот кандидат Доналд Трамп на изборите на 5 ноември.
Поранешниот претседател Трамп има мала предност пред актуелниот претседател во клучните држави за кои се верува дека ќе го одредат победникот.
Друга анкета на Ројтерс и Ипсос, исто така, покажа дека многу демократи не се согласуваат со одговорот на Бајден на израелската офанзива на Појасот Газа, што дополнително ги загрозува неговите изгледи на ноемвриските избори.
Европа
Илјадници бегаат од руската офанзива во регионот Харков
Во борбите за вториот по големина град во Украина досега се раселени околу 14.000 луѓе, покажуваат податоците на Светската здравствена организација (СЗО), пренесува Би-би-си.
Руските сили неодамна започнаа летна офанзива, заземајќи неколку села на североисточната граница на Украина во близина на градот Харков додека се обидуваат да ја пробијат ослабената линија на фронтот на Украина.
Регионалниот лидер на Харков изјави дека седум лица се повредени во ноќните напади на руски беспилотни летала врз градот. Во меѓувреме, најмалку едно лице загина во напад на украинско беспилотно летало над границата со Белгород, јавуваат руските медиуми.
Говорејќи на брифинг со новинарите, Јарно Хабихт од СЗО рече дека 14.000 луѓе избегале од борбите во областа, но 189.000 луѓе кои останале во близина на границата со Русија се соочиле со „значителни ризици поради борбите“.
Украина сè уште контролира околу 60 отсто од Вовчанск, пограничниот град во центарот на неодамнешните борби, изјави заменик-гувернерот Роман Семенука за националната телевизија во понеделникот.
Друг украински воен функционер изјави за АФП дека борбите во Харков „остануваат тешки и динамично се менуваат“.