Свет
„Боингот“ на „Лајонер“ паднал поради пропусти во конструкцијата на авионот и необучени пилоти

Одборот за безбедност на сообраќајот на Индонезија го објави конечниот извештај за авионската несреќа што се случи минатата година, а во која загинаа 189 патници и членови на екипажот. Истрагата открила дека авионот на компанијата „Лајонер“ паднал поради комбинација на пропусти во конструкцијата на авионот, проблеми со обуката на екипажот и неадекватно одржување на авионот.
Во извештајот се наведува дека „боингот“ на летот од главниот град на Индонезија, Џакарта, до островот Суматра, изгубил висина затоа што на пилотите не им било кажано колку бргу мора да реагираат во случај на дефект на автоматизираниот систем за контрола на летот на моделот „737 макс“.
Авионот падна во Јаванското Море, само една минута по полетувањето на 29 октомври 2018 година.
Одборот навел дека автоматизираниот систем за управување МЦАС се водел од само еден сензор за движењето на носот на леталото, а пред несреќата тој сензор на екипажот му испраќал погрешни информации, автоматски бутајќи го носот на авионот надолу.
Извештајот идентификувал и разни погрешни потези на екипажот пред падот.
Претседателот и директор на „Боинг“, Денис Мојленбург, рекол дека компанијата ги разгледува препораките на Одборот и работи на зголемување на безбедноста на авионите од серијата „737 макс“ за да спречи во иднина да се повторат условите за управување со леталото кои се случиле пред оваа несреќа.
Тој рекол дека тој модел на авион и неговиот софтвер се под надзор на властите, испитувања и анализи кои се без преседан во светот. Тоа опфаќа стотина сесии симулирани летови и пробни летови на самите авиони, регулаторни анализи на илјадници документи, други анализи на властите и независни експерти, како и опсежни барања за сертификација.
Во март годинава, авион од истиот модел на „Боинг“ се урна во Етиопија при шти загинаа 157 луѓе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.