Свет
Борел: Хамас ги користи болниците како жив штит, Израел да се воздржи

Европската унија го осуди користењето на болниците и цивилите од страна на Хамас како жив штит во Појасот Газа, повикувајќи го Израел да спроведе најголема можна воздржаност за да ги заштити цивилите во тековната војна.
„ЕУ го осудува користењето на болниците и цивилите од страна на Хамас како жив штит и е исклучително загрижена поради влошувањето на хуманитарната криза во Газа“, изјави шефот на европската дипломатија, Жозеп Борел.
„Војничките дејствија имаат сериозни последици за болниците и сериозно ги погодуваат цивилите и медицинскиот персонал“, предупреди тој, посочувајќи дека според меѓународното хуманитарно право – болниците, медицинската опрема и цивилите во болниците мора да бидат заштитени.
„Покрај тоа, болниците мора веднаш да бидат снабдени со најнеопходната медицинска опрема, а пациентите на кои им е потребна итна медицинска помош мора да бидат евакуирани во безбедни услови. Во оваа смисла, го повикуваме Израел да покаже најголема можна воздржаност за да се обезбеди заштита на цивили“, додаде тој. Повикот беше упатен додека беснеат борби околу болницата Ал Шифа, најголемата во Појасот Газа.
Заменик-министерот за здравство во владата на Хамас претходно изјави за АФП дека зградата за кардиологија во таа болница била целосно уништена во израелски воздушен напад. Израелската армија сè уште не го коментираше извештајот, а АФП не можеше да го потврди бомбардирањето, но барем еден сведок од болницата ги потврди нападите и штетата.
Израел негира дека намерно цели болници. Го обвинува Хамас дека ги користи овие згради и тунели под нив како скривалиште, што исламистичката милитантна група го негира. Во изјавата на Борел се повторува ставот на Брисел дека Израел има право да се брани во согласност со меѓународното и хуманитарното право.
Но, ЕУ се придружува на повиците за прекин на огнот во конфликтот и воспоставување хуманитарни коридори во Појасот Газа што е можно поскоро. Освен тоа, го повикува Хамас да ослободи повеќе од 240 заложници земени за време на неговиот напад на 7 октомври и нагласува дека е исклучително важно Меѓународниот комитет на Црвениот крст да има пристап до заложниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора планира да произведува дронови; САД: Покажуваат дека се сериозни

Црна Гора планира да започне со производство на беспилотни летала во соработка со американска компанија, а првата серија ќе биде донирана на Украина, објавија денес црногорските медиуми, повикувајќи се на „писмо за намери“ усвоено од владата во Подгорица кон крајот на мај.
Во тој документ, како што објави Радио Слободна Европа, црногорската влада наведува дека оваа иницијатива ќе ги подобри капацитетите на војската во однос на НАТО, ќе ги поддржи одбранбените потреби на Украина, како и позицијата на Црна Гора како сигурен снабдувач на најсовремена одбранбена опрема на глобалниот пазар.
Се нагласува дека договорот вреден 15 милиони долари ќе биде поддржан и од американската администрација предводена од претседателот Доналд Трамп. Писмото за намери усвоено од црногорската влада на 29 мај наскоро ќе го потпишат црногорскиот министер за економски развој Ник Ѓељошај и Роберт Џ. Донахју, директор на компанијата „Бај Лајт Профессионал ИТ Сервисиз ДОО“. Тоа ќе биде претходница на договорот што треба да се потпише во септември.
Договорот предвидува користење на компании од Црна Гора и регионот за тестирање на воздушни и подводни технологии на беспилотни системи. Исто така, се наведува дека владата на Црна Гора се согласува да ја донира првата серија беспилотни системи од рано производство и сродна одбранбена опрема на Украина.
Амбасадата на САД објави дека договорот, доколку биде одобрен, ќе промовира заедничка безбедност, стабилност и напредок и дека владата на САД ги охрабрува сите земји-партнери да инвестираат и да соработуваат со американските компании.
„Инвестирањето во одбранбени капацитети, како што се американските беспилотни воздушни системи, ја покажува сериозноста на Црна Гора во исполнувањето на своите обврски кон Алијансата во време кога бараме од Европа да преземе поголем товар за нејзината безбедност“, порачаа тие.
Европа
Естонија се повлекува од Конвенцијата за забрана на противпешадиски мини, стравува од Русија

Парламентот на Естонија денес гласаше за повлекување од Конвенцијата од Отава со која се забранува употребата на противпешадиски мини, поради загриженост за потенцијална воена закана од соседна Русија.
Осумдесет и еден од 101 пратеници го поддржаа предлогот, соопшти прес-службата.
Сите пет земји од Европската Унија и НАТО што граничат со Русија – Литванија, Латвија, Естонија, Полска и Финска – објавија планови за повлекување од меѓународниот договор поради воената закана што ја претставува нивниот многу поголем сосед.
Русија не е членка на Конвенцијата од Отава и користеше мини при инвазијата на Украина. Гласањето на Естонија следеше по гласањето на Латвија и Литванија, чии парламенти веќе го одобрија повлекувањето. Земјите ќе можат да складираат и распоредуваат мини шест месеци откако ќе ги известат другите членки на договорот и Обединетите нации за нивната одлука. Ниту една од петте земји сè уште не го сторила тоа.
Регион
Европската комисија не се откажува од рудникот за литиум во Србија, тој се појави на новата листа

Европската комисија денес објави список од 13 стратешки проекти во областа на критичните суровини во трети земји, вклучувајќи го и проектот Јадар во западна Србија, кој предизвика силни протести и спротивставување во таа земја.
Списокот на стратешки проекти во областа на критичните суровини во трети земји вклучува проекти во Канада, Гренланд, Казахстан, Норвешка, Србија, Украина, Замбија, Нова Каледонија, Мадагаскар, Малави, Јужна Африка и Обединетото Кралство.
Според проценката на Комисијата, избраните проекти, од кои повеќето се однесуваат на суровини неопходни за производство на електрични возила и батерии, како што се литиум, никел, кобалт, манган и графит, бараат вкупно 5,5 милијарди евра капитални инвестиции за да започнат со работа.
На листата е вклучен и проектот Јадар во долината на реката Јадар во западна Србија, кој предизвика широко распространето негодување и отпор поради страв од загрозување на здравјето на луѓето и животната средина.
На почетокот на 2022 година, српската влада го поништи усвоениот просторен план за рудникот во долината на реката Јадар и го запре проектот. Сепак, во јули минатата година, повторно донесе одлука со која му дозволи на британско-австралискиот рударски гигант „Рио Тинто“ да го рестартира својот проект за рударство на литиум.
Избраните стратешки проекти ќе добијат поддршка од Комисијата, земјите-членки и финансиските институции во форма на полесен пристап до финансирање. Комисијата, исто така, ќе ја зајакне соработката со трети земји за да се обезбеди развој на овие проекти, особено преку стратешки партнерства што веќе се воспоставени со некои од земјите.