Европа
Борис Џонсон се заканува дека нема да плати за брегзит

Борис Џонсон изјави дека доколку стане следниот премиер на Велика Британија, нема да плати ги 40-те милијарди евра на коишто Тереза Мај се согласи за напуштање на Европската Унија, освен ако Брисел не понуди подобри услови за брегзит.
Во интервју за весникот „Сандеј тајмс“, Џонсон рече дека средствата ќе бидат задржани додека Британија не добие поголема јасност.
Неговите коментари наводно предизвикале остри реакции во Франција. Според „Ројтерс“, извор близок до францускиот претседател Емануел Макрон рекол дека ако Велика Британија не успеала да ја плати „сметката“ за брегзит, тоа би било еднакво на неисплаќање на државниот долг.
Во исто време, ривалот на Џонсон, Мајкл Гов, рече дека е подготвен да побара продолжување на крајниот рок од 31 октомври за Британија да ја напушти Европската Унија.
„Сметам дека треба да заминеме пред 31 октомври, но ако ни требаат неколку дополнителни денови или недели за да излеземе од Европската Унија, тоа е мора да се направи“.
Министерот за внатрешни работи, Сајид Џавид, уште еден од единаесетте кандидати за наследување на Меј рече дека е подготвен и за брегзит без договор, само за да не се пропушти крајниот рок, но само во краен случај.
„Ќе сторам сé што е во наша моќ да излеземе на 31 октомври, а тоа за мене, секако, значи дека сакам договор“, рече тој. „Ќе сторам сé што можам за да склучам договор, но ако морам да изберам помеѓу никаков договор и ненапуштање на унијата, би избрал брегзит без договор“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски: 100.000 западни компоненти пронајдени во руски ракети и дронови

Украинскиот претседател Володимир Зеленски изјави дека повеќе од 100.000 компоненти произведени во Западот се пронајдени во беспилотни летала и ракети лансирани од Русија во Украина ноќта од саботата кон неделата. Наодите го потврдуваат континуираното присуство на западната технологија во руското оружје и покрај годините санкции.
Руските сили лансираа околу 500 беспилотни летала и повеќе од 50 ракети во голем напад врз Украина, насочен кон населени места низ целата земја, вклучително и оние далеку од линиите на фронтот. Најмалку шест лица беа убиени во нападот, вклучувајќи цело семејство од четири члена, а 18 други беа повредени.
Според Зеленски, беспилотните летала за напад содржеле 100.688 компоненти произведени во странство.
Околу 1.500 компоненти произведени во странство се пронајдени во ракетите Искандер, 192 во балистичките ракети Кинжал и 405 во крстосувачките ракети Калибр, објави Киев Индепендент.
Се вели дека овие компоненти се произведени од компании со седиште во САД, Кина, Тајван, Велика Британија, Германија, Швајцарија, Јапонија, Јужна Кореја и Холандија.
Зеленски истакна дека украинските партнери веќе имаат детални информации за секоја компанија и секој производ што е вклучен. Тој додаде дека Киев работи и на нови санкции насочени кон поединци и субјекти што ѝ помагаат на Русија.
„Од клучно значење е да се запре секоја шема што ги заобиколува санкциите, бидејќи Русија ги користи сите нив за да продолжи со убивањето. Светот има моќ да го спречи тоа“, рече тој.
фото: принтскрин
Европа
Орбан: Зеленски ја користи својата вообичаена тактика, но унгарскиот народ одлучи

Унгарскиот премиер Виктор Орбан го обвини украинскиот претседател Володимир Зеленски за „користење на неговата вообичаена тактика на морална уцена“.
„Се испостави дека претседателот Зеленски сака да одлучи што е најдобро за Унгарците. Тој повторно ја користи својата вообичаена тактика на морална уцена за да ги принуди земјите да ги поддржат неговите воени напори.
Почитуван господине претседателе, со сето должно почитување, Унгарија нема морална обврска да го поддржи пристапувањето на Украина во ЕУ. Ниту една земја никогаш не влегла во ЕУ преку уцена – и тоа нема да се случи ниту овој пат.
Договорот за ЕУ не остава простор за двосмисленост: членството се одлучува едногласно од земјите-членки. Унгарскиот народ одлучи. Тие со огромно мнозинство рекоа „не“ на членството на Украина во ЕУ на референдум. Ако сакате да го промените тоа, медиумската кампања што ја водите против Унгарија веројатно не е најдобриот начин да се добијат пријатели“, напиша Орбан на Икс.
Зеленски вчера на прес-конференција со холандскиот премиер Дик Шуф изјави дека Украина ќе стане членка на ЕУ без оглед на ставот на Орбан. „Украина ќе биде во ЕУ, со или без Орбан, бидејќи тоа е избор на украинскиот народ“, нагласи Зеленски.
фото: принтскрин
Европа
Мерц: Путин води хибридна војна против Германија, сака да нè заплаши

Германскиот канцелар Фридрих Мерц го обвини рускиот претседател Владимир Путин дека води „хибридна војна“ во Германија.
„Тој води информациска војна против нас. Тој води воена борба против Украина, а таа војна е насочена и против нас“, изјави Мерц за германската телевизија ntv.
Мерц тврди дека рускиот претседател сака да го преврти европскиот политички поредок наопаку. „И затоа ја поддржуваме Украина“, објасни Мерц, додавајќи дека е во интерес на Германија да го брани својот политички поредок и отворените, либерални општества во Европа.
На прашањето дали Путин води војна против Германија, Мерц рече: „Тој води хибридна војна против нас“.
Осврнувајќи се на зголемениот број инциденти со беспилотни летала во Германија и низ цела Европа, Мерц рече: „Ја знаеме заканата“, додавајќи дека Путин сака да заплаши и да всади страв.
„Нема да бидеме заплашени и исто така ефикасно ќе се браниме од оваа закана“, рече Мерц.
На прашањето дали размислувал да се јави на Путин, Мерц рече дека „секако го разгледува тоа“.
Тој додаде: „Можам само да видам дека секој обид да разговарам со него во моментов завршува со уште понасилни напади врз Украина“.
фото: принтскрин