Свет
Бремените жени пиеле лек против мачнини, а раѓале деца со малформации, Австралија им се извини

Австралија ќе упати национално извинување до сите граѓани погодени од трагедијата со „талидомид“, изјави во понеделникот премиерот Ентони Албанез, повеќе од половина век по раѓањето на децата со вродени дефекти бидејќи нивните мајки пиеле таблети против утринска мачнина.
„Талидомидот“ беше активна состојка во седативот кој беше широко дистрибуиран кај многу мајки во светот во раните 60-ти. Подоцна беше откриено дека предизвикува малформации на екстремитетите, цртите на лицето и внатрешните органи кај неродените деца.
„Трагедијата со ‘талидомид’ е темно поглавје во историјата на нашата нација и светот. Преживеаните, нивните семејства, пријателите и старателите со години храбро и уверено се залагаат за ова извинување. Овој момент е долгоочекуваното национално признание за сето она што го претрпеле и се бореле“, изјави Албанез.
Скандалот со „талидомидот“ предизвика ревизија на режимите за тестирање лекови во светот, но исто така го подигна профилот на американската Администрација за храна и лекови, која беше сама во своето цврсто одбивање да го одобри лекот, иако тој беше дистрибуиран во САД. Британската влада им се извини на жртвите во 2010 година. Се проценува дека „талидомидот“, кој го разви германската компанија „Груентал“, уби 80.000 деца во целиот свет уште пред да се родат, а уште 20.000 се родени со вродени дефекти.
Австралијка, која е родена без раце и нозе бидејќи мајка ѝ пиела „талидомид“, добила милионска спогодба во 2012 година од Diageo Plc, локалниот дистрибутер. Во 2010 година Diageo се согласи да плати 50 милиони австралиски долари на 45 жртви во Австралија и Нов Зеланд. Албанез ќе се извини и во парламентот на 29 ноември. Австралиската влада регистрирала 146 преживеани, иако точниот број на заболени не е познат.
„Со ова извинување ќе им оддадеме признание на сите оние бебиња што загинаа и нивните ужалени семејства, како и на оние што преживеаја, но чии животи беа отежнати од дејството на оваа страшна дрога“, рече Албанез.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Приведени 77 лица по протестите, 48 полицајци повредени, Вучиќ вети дека нема помилување за насилство

Претседателот на Србија, Александар Вучиќ, денеска порача дека нема да потпише никакво помилување или аболиција за оние кои учествувале во насилствата по студентските протести во Белград. Тој најави дека ќе следуваат нови апсења, бидејќи, како што рече, сѐ уште се врши идентификација на осомничените.
„Ова не е крај, лицата се идентификуваат, на тоа работи БИА“, изјави Вучиќ, додавајќи дека Србија не може да се победи со насилство: „Неа не можете да ја победите со насилства, таа не запре и нема да застане“.
Тој оцени дека повиците на крајот од протестот, особено изјавата „имате зелено светло“, претставуваат директен повик за граѓански конфликти и напади врз полицијата.
„Ги повикувам надлежните обвинителства да си ја работат својата работа, да не се преправаат дека се неспособни и наивни. Доаѓа време на одговорност, почитувани граѓани“, додаде Вучиќ.
На заедничката прес-конференција, министерот за внатрешни работи Ивица Дачиќ информираше дека по протестот се приведени 77 лица, од кои 38 се задржани, а меѓу нив има и едно малолетно лице.
„Против 35 лица ќе бидат поднесени кривични пријави, а против 26 лица ќе се води прекршочна постапка“, изјави Дачиќ, додавајќи дека се повредени 48 полицајци, од кои еден со тешки повреди на главата, а уништена е и значителна количина заштитна опрема.
Премиерот на Србија, Ѓуро Мацут, остро го осуди насилството и побара сите страни да се воздржат од дополнително разгорување на тензиите.
„Србија е демократско општество во кое мислењата мора да се изразуваат на мирен и цивилизиран начин, без загрозување на безбедноста на граѓаните и јавниот ред и мир“, изјави Мацут.
Тој им се заблагодари на припадниците на полицијата и безбедносните служби за брзата и професионална интервенција.
Своја реакција имаше и претседателката на српското Собрание, Ана Брнабиќ, која обвини дека студентите на протестот упатиле повик за граѓанска војна.
„Блокаторите не го завршија својот митинг на Видовден со зборовите ‘Да живее Србија’, туку со морничав повик за убивање на Србија – монструозен и отворен повик за граѓанска војна. Памти Србијо“, напиша таа на мрежата Икс.
Блокадери свој скуп на Видовдан нису завршили речима – Живела Србија. Завршили су језивим позивом на убиство Србије, монструозним и отвореним позивом на грађански рат. Памти Србијо. pic.twitter.com/IiOiU3A0Kl
— Ana Brnabic (@anabrnabic) June 28, 2025
Свет
Италијанец снимал деца на Истра со камери скриени во пенкала

Истарската полиција заврши кривична истрага против 67-годишен италијански државјанин, осомничен за сериозно кривично дело поврзано со злоупотреба на техничка опрема и нарушување на приватноста на малолетни лица.
Според соопштението на Полициската управа на Истра, инцидентот се случил на 26 јуни, околу 15 часот, кога гостин во туристички објект забележал лице како недозволено снима малолетници. Лицето било задржано до пристигнување на полициски службеници, кои веднаш постапиле согласно законските надлежности.
По судска наредба, биле извршени претреси на неколку уреди со скриени камери, вклучувајќи техничка опрема со интегрирани снимачки механизми, мемориски уреди, мобилен телефон и возилото на осомничениот. Полициската управа информира дека се пронајдени материјали кои ќе бидат предмет на понатамошна истрага.
Осомничениот е уапсен и вечерта на 27 јуни предаден во притворската единица на Полициската управа на Истра со поднесена кривична пријава.
Свет
Лавров: Западот повторно се обидува да ѝ нанесе стратешки пораз на Русија, нема да успее

Западот никогаш не успеал и никогаш нема да успее да ѝ нанесе стратешки пораз на Русија, изјави шефот на руската дипломатија Сергеј Лавров на средбата со министерот за надворешни работи на Киргистан, Јенбек Кулубаев.
„Сведоци сме на невидена конфронтација меѓу нашата земја и колективниот Запад, кој повторно одлучи да војува против нас и да ѝ нанесе стратешки пораз на Русија, користејќи го нацистичкиот режим во Киев како овен за удар. Западот никогаш не успеал во ова, а нема да успее ниту овој пат“, порача Лавров, пренесе рускиот весник „Известија“.
Тој ја потенцираше важноста на стратешките и блиски врски со Киргистан, наведувајќи дека Русија ги цени односите со оваа пријателска земја во сите сфери.
Лавров додаде дека, и покрај санкциите и, како што рече, нелегитимниот притисок од Западот, трговијата меѓу Русија и Киргистан бележи раст, а се продлабочува и соработката во хуманитарната, образовната и меѓународната сфера.