Свет
Британија: Путин изгубил 16 генерали на бојното поле од почетокот на војната

Рускиот претседател Владимир Путин изгубил 16 генерали на бојното поле од почетокот на војната против Украина, според британското Министерство за одбрана, пишува HuffPost.
Британското Министерство за одбрана (МО) вели, како што пренесува медиумот, дека оваа загуба сериозно го нарушила синџирот на команда и контрола во некои делови од руската војска.
Во извештај на социјалната мрежа X, објавен за време на викендот, МО истакнува дека двајца високи генерали биле убиени во 2025 година, а вкупно пет во последните 12 месеци.
„Загубата на толку многу високи офицери веројатно го нарушила синџирот на команда и контрола во делови од руските вооружени сили. Ова веројатно придонело за тактичките и оперативните тешкотии на Русија за време на конфликтот“, вели МО.
Најновата жртва е генерал-мајорот Михаил Гудков, кој почина по украинскиот напад врз руска командна позиција на 2 јули во регионот Курск во западна Русија.
Според Министерството за одбрана, Гудков веројатно ги предводел обидите на поморските пешадиски единици да воспостават тампон зона во украинскиот Сумски регион. Напредокот на Русија во регионот е забавен од украинските контранапади и значителните руски загуби.
Министерството за одбрана претходно објави дека бројот на руски воени жртви надминал еден милион од почетокот на инвазијата во февруари 2022 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан: Трамп „ја изеде за појадок“ фон дер Лајен

Унгарскиот премиер, Виктор Орбан, коментирајќи го трговскиот договор меѓу ЕУ и САД, живописно оцени дека тоа не е договор, туку дека американскиот претседател Доналд Трамп „ја изел претседателката на Европската комисија Урсула фон дер Лајен за појадок“, објави унгарската новинска агенција МТИ.
Орбан во онлајн емисија наречена „Борбен час“ изјави дека однапред го очекувал овој исход, со оглед на тоа што американскиот претседател е „тешкаш“ за разлика од претседателката на Европската комисија, која е „лесна“.
„Позицијата на американскиот претседател беше многу постабилна, додека позицијата на претседателката на Комисијата отсекогаш беше покревка“, додаде тој.
САД неодамна склучија сличен договор со Обединетото Кралство, кој е „многу подобар од овој“, смета Орбан. Тој додаде дека европскиот договор тешко дека ќе може да се претстави како успех.
Свет
Медведев: Трамп ја „разгали“ Европа

Заменик-претседателот на Советот за безбедност на Русија, Дмитриј Медведев, на Телеграм го коментираше трговскиот договор што ЕУ го потпиша со Америка.
Во текстот „Трамп ја разгали Европа“, Медведев вели дека овој вид договор има целосно антируска природа.
„Мора да се признае дека, и покрај неговите екстремни противречности во неговите изјави и постапки, Доналд Трамп е доста доследен во едно нешто – тој брутално ги турка економските интереси на својата земја.
Сегашниот „договор“ со Европската Унија: е целосно понижувачки за Европејците, бидејќи му користи само на САД – ја укинува заштитата на европскиот пазар и ги прави тарифите за американските стоки бесмислени; создава огромни дополнителни трошоци за индустријата и земјоделството во многу земји од ЕУ поради плаќање за скапи американски енергетски производи; пренасочува моќен тек на инвестиции од Европа кон САД;
И секако, „договорот“ има исклучително антируска природа, бидејќи забранува купување на нашата нафта и гас. Но, додека за Трамп тоа е првенствено бизнис, за една изнемоштена старица по име Европа – тоа е дел од неонацистичката идеологија која ја напаѓа благосостојбата на сопствените граѓани.
Може да се изрази само сочувство кон обичните Европејци. Најдоброто нешто за нив сега би било да започнат напад врз Брисел, со цел да ги обесат сите комесари на ЕУ на јарболите на земјите од ЕУ – вклучувајќи ја, секако, и лутата баба Урсула. Секако, нема да помогне, но барем ќе биде забавно“, објави Медведев.
Фото: принтскрин
Свет
Мерц: Со договорот со САД, успеавме да спречиме трговски конфликт

Германскиот канцелар Фридрих Мерц и ирскиот премиер Мајкл Мартин го поздравија договорот за царини меѓу ЕУ и САД, велејќи дека е избегната трговска војна што ќе ги погодеше економиите на двете земји, објавија светските агенции.
Договорот беше постигнат за време на вчерашниот состанок меѓу американскиот претседател Доналд Трамп и претседателката на Европската комисија Урсула фон дер Лајен и значи царини од 15 проценти за речиси целиот европски извоз во САД.
Ирска, со голема фармацевтска индустрија, беше на првата линија на нападот заедно со Германија, за која САД се главен пазар за автомобили, челик и машински алати.
Европските земји не се сите подеднакво изложени на американскиот пазар и затоа не би ги претрпеле истите последици доколку претседателот Доналд Трамп ги исполни своите закани за воведување царини од 30 проценти на Европската унија (ЕУ).
„Со договорот, успеавме да спречиме трговски конфликт што силно ќе ја погодеше извозно ориентираната германска економија“, рече Мерц.
Ова особено се однесува на автомобилската индустрија, каде што сегашните царини од 27,5% се речиси преполовени, додаде тој, како што објави германската новинска агенција ДПА.
Мерц нагласи дека е добро што се избегнува непотребна ескалација во трансатлантските трговски односи.
„Единството на Европската унија и напорната работа на преговарачите се исплатија“, тврди тој.