Свет
Британски експерти: Колективен имунитет е невозможен, да се прекине со масовното тестирање

Делта-сојот на коронавирусот ги намали сите шанси за постигнување колективен имунитет, заклучија британските експерти, меѓу кои е вклучен шефот на тимот за развој на „Оксфордската вакцина“, која е произведена од „Астразенека“.
Покрај тоа, тие повикаа да се прекине масовното тестирање за да може Велика Британија да почне да живее со ковид, пренесува „Телеграф“.
Истражувачите заклучија пред британскиот парламентарен комитет дека е дојдено време да се прифати фактот дека не постои начин да се запре ширењето на вирусот кај целата популација и дека следењето на луѓето со благи симптоми не помогнало.
Професорот Ендрју Полард, кој го предводеше тимот за вакцини во Оксфорд, рече дека е јасно дека делта-сојот може да ги инфицира и вакцинираните луѓе, што го прави невозможно да се постигне колективен имунитет, дури и со висока покриеност за вакцинација.
Појавата на експертите следеше откако германската канцеларка Ангела Меркел беше прва во Европа што објави прекин на бесплатните тестови во Германија на 11 октомври, со цел да ги охрабри граѓаните да се вакцинираат.
Британското Министерство за здравство вчера потврди дека повеќе од три четвртини од возрасните ги примиле двете дози на вакцината и пресметале дека вакцинацијата спречила 60.000 смртни случаи и 66.900 хоспитализации.
Но, експертите веруваат дека ништо нема да го спречи ширењето на вирусот.
„Секој што сè уште не е вакциниран, ќе се сретне со вирусот во одреден момент. Нема ништо што ќе го спречи преносот на вирусот, така што мислам дека сме во ситуација кога е невозможно да се постигне колективен имунитет и мислам дека нова варијанта ќе се појави од која вакцинираните уште полесно ќе можат да се заразат“, рече Полард.
До неодамна, многумина се надеваа дека зголемувањето на бројот на вакцинирани во Британија ќе создаде некаков имунитет што ќе го заштити населението. Сепак, анализата на Англискиот институт за јавно здравје (PHE) покажа дека кога вакцинираните луѓе се заразуваат, тие можат да бидат исто толку заразни како и невакцинираните луѓе.
„Концептот на колективен имунитет е неостварлив затоа што знаеме дека инфекцијата ќе се прошири на невакцинираната популација, а неодамнешните податоци сугерираат дека две дози од вакцината најверојатно ќе заштитат само 50 проценти од преносот“, вели Пол Хантер, професор по медицина во Универзитетот во Источна Англија и експерт за заразни болести.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шпанија со закон го забранува извозот на оружје во Израел: „Сакаме да се стави крај на геноцидот во Газа“

Шпанските пратеници денес гласаа за закон со кој се воведува ембарго за извоз на оружје во Израел, мерка што долго време ја заговараше социјалистичкиот премиер Педро Санчез за „запирање на геноцидот“ во Газа.
„За“ гласаа 178 пратеници, а 169 беа против. Малцинската влада на социјалистичкиот премиер конечно ја доби поддршката од четири пратеници од крајно левичарската партија Подемос, која не откри како ќе гласа до денеска наутро.
Шпанското ембарго е на сила од октомври 2023 година, но социјалистичката влада сакаше да ја „зацврсти правно“ одлуката.
Санчез го објави тоа на 8 септември, по што израелската влада реагираше жестоко, но Израел го повлече својот амбасадор од Шпанија во 2024 година, откако Мадрид ја призна Палестина.
Регион
Вучиќ: Турција сонува повторно да ја обнови Отоманската Империја

По пристигнувањето на турските беспилотни летала во Приштина, имаше остра реакција од српскиот претседател Александар Вучиќ, кој ја обвини Турција дека сонува за обнова на Отоманската Империја. Со овој потег, Србија премина од „златно доба“ во односите со Турција и пријателството со Ердоган на отворени политички тензии за само една година, пишува N1.
Косовскиот премиер Албин Курти претходно објави на Фејсбук дека пристигнале беспилотните летала, додавајќи дека десетици безбедносни сили веќе се обучени да ги користат.
Курти објасни дека договорот со турската компанија Бајкар бил потпишан во декември минатата година, а дроновите биле испорачани три месеци пред предвидениот рок. Тој нагласи дека Косово „продолжува да ја зајакнува ударната моќ на својата армија“ со модерна технологија.
Реагирајќи на веста, Вучиќ остро го осуди потегот на Турција, велејќи дека е „ужасен“ и дека тоа „јасно покажува дека Турција не сака стабилност на Западен Балкан“.
„Згрозен сум од однесувањето на Турција и грубото кршење на Повелбата на ОН и Резолуцијата 1244 на Советот за безбедност на ОН, како и од континуираното вооружување на властите во Приштина. Сега е сосема јасно дека Турција не сака стабилност на Западен Балкан и дека сонува за оживување на Отоманската империја. Србија е мала земја, но ние добро ја разбравме пораката“, рече Александар Вучиќ.
Реагираше и владината Канцеларија за Косово и Метохија, а нејзиниот директор Петар Петковиќ ја повтори оценката на Вучиќ дека Србија „ја разбрала пораката“ и дека „не е случајно“ што беспилотните летала биле доставени во Косово три месеци пред предвиденото.
Турција го направи ова, смета Петковиќ, „само неколку дена пред локалните избори“, со цел да му ја обезбеди на премиерот на Приштина „потребната поддршка пред изборите на 12 октомври, за да може да продолжи да го тероризира српскиот народ“.
Петковиќ рече дека Белград „ќе продолжи одговорно да го зачувува мирот и стабилноста, и покрај вооружените сојузи што се создаваат на штета на мирот и претставуваат директна закана“.
Фото: ЕПА
Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.