Свет
Британски медиуми: Кралицата за две секунди го одбила барањето на принцот Хари
Британската Кралица Елизабета Втора не дозволи нејзиниот внук, принцот Хари да го положи венецот на церемонијата по повод Денот на сеќавање во ноември, а британските медиуми сега пишуваат дека таа наводно таа одлука ја донела за само две секунди.
Претставници на Бакингемската палата го спречија војводата од Сасекс да учествува на церемонијата, што го означува придонесот на британските војници во двете светски војни, но сега „Метро“ наведува дека интервенирала и самата кралица.
Според „Дејли меил“, таа го одбила барањето на Хари затоа што смета дека тој треба или да биде „внатре или надвор“ од кралската „институција“ и дека тој не може да избере.
Принцот и неговата сопруга Меган Маркл одлучија да не се враќаат од нивниот дом во Лос Анџелес на службата по повод Денот на сеќавање во ноември, поради пандемијата на коронарниот вирус. Наместо тоа, положија венец на гробовите на двајца војници на Комонвелтот на гробиштата во Лос Анџелес.
Хари, кој помина 10 години во војска, учествуваше на церемониите по повод Денот на сеќавањето 11 години. Оваа година венецот го положија принцовите Вилијам и Чарлс, а Хари сакаше да положи венец на негово име, што не беше прифатено.
Во тоа време, официјалните лица изјавија дека кралицата не знае за тоа, но сега извор изјави за Дејли Меил дека церемонијата на Денот на сеќавање е еден од најважните датуми во календарот на кралицата и дека таму ништо не се прави без нејзино знаење.
“Луѓето жалеа за реакцијата на Бакингемската палата на барањето на Хари. Но, тоа всушност беше одлука на кралицата”, рече изворот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Грција во состојба на готовност поради можност за грабежи на музеи
Поради грабежот на Лувр во Париз и можноста за сличен инцидент во еден од бројните и важни музеи во Грција, надлежните органи се во состојба на висока готовност.
Според весникот „Катимерини“, грчките министерства за внатрешни работи и култура планираат да го доверат чувањето на музеите, а можеби и на некои археолошки локалитети, на грчката полиција.
Според надлежните службеници кои разговараа со новинарите на весникот под услов да не бидат именувани, почнувајќи од следниот март, не само цивили вработени во Министерството за култура, како што беше случај досега, туку и униформирани полицајци ќе учествуваат во чувањето на културните богатства од непроценлива вредност. 300 специјални чувари кои наскоро ќе бидат интегрирани во грчките полициски сили ќе учествуваат во оперативниот план.
Надлежниот извор објаснува дека Министерството за внатрешни работи претходно планирало вработување на 600 нови специјални чувари со цел зајакнување на полициските служби. Сепак, по одлуката на владата и според една верзија, по препорака на Министерството за култура, беше одлучено вкупниот број на специјални стражари кои ќе се приклучат на полициските сили да се зголеми на 900, така што 300 од нив ќе бидат распоредени да чуваат музеи и археолошки локалитети. Нови специјални стражари ќе се приклучат на полицијата во периодот февруари-март.
Во Грција, грабеж сличен на оној во Лувр се случи во 2012 година, кога сторителот успеа да провали во Националната галерија и да украде три уметнички дела од голема вредност, меѓу кои имаше и слика од Пикасо. Истата година кога се случи грабежот во Галеријата, беше забележан и грабежот на Музејот на историјата на Олимписките игри во Стара Олимпија. Овој случај го открија и полицајците на Службата за безбедност во Патра, кои ја презедоа истрагата.
Фото: принтскрин
Регион
Рама: Фактот што Србија не го признава Косово е суштински проблем на регионот
Албанскиот премиер Еди Рама, на Форумот за мир во Париз изјави дека непризнавањето на Косово од страна на Србија е „суштински проблем“ на регионот.
Рама рече дека Балканот мора да избере помеѓу поделба и соработка.
„Косово е проблем затоа што за нас е земја со свои права. Но, за Србија или за другите земји – не е. Тоа е голем проблем. Или ќе продолжиме да гледаме наназад, да разгоруваме тензии и негативна енергија и да нанесуваме штета на себе и на нашата економија – ние сме мали пазари – или да бидеме заедно. Другата алтернатива беше да не се согласуваме и да не соработуваме“, рече Рама, пренесува Koha.net.
Тој додаде дека денес Европа се соочува со истите предизвици што некогаш го карактеризираа балканскиот регион.
„Европа стана многу балканизирана. Мислам дека Франција е исто така многу балканизирана – тие не можат да донесат буџет. Погледнете ја Британија, таму е уште полошо. Сега ние сме добрите, затоа им велам: склучете мир, не заканувајте се, разговарајте, затоа што доаѓаме од пеколот и ние сме гласници на мирот“, нагласи Рама.
Рама изјави дека Албанија, без оглед на тоа дали другите ја слушаат или не, ќе продолжи да работи за регионална стабилност.
„Ако светот стане подобро место, ќе кажеме дека сме ја завршиле нашата работа. Ќе добиеме место во рајот како Албанци“, рече тој со насмевка, според медиумот.
Албанскиот премиер ги оцени односите со Италија и улогата на Европската Унија.
„Италијанците се Албанци облечени во Версаче. Имате премиер – исклучителна и фасцинантна жена. Таа не е висока, но верувајте ми, кога зборува, таа е повисока и од мене. ЕУ е најголемиот политички проект што човештвото некогаш го доживеало“, рече Рама.
На крајот од своето обраќање, Рама истакна дека членството на Албанија во Европската Унија е историски благослов.
Фото: принтскрин
Свет
Москва: Европа го блокира мирот и поттикнува војна во Украина
Неонацистичкиот режим во Киев продолжува со нападите врз цивилни објекти, тероризирајќи го мирното население на Русија, изјави Марија Захарова, портпаролка на Министерството за надворешни работи на Русија, на денешниот брифинг за медиумите.
Таа истакна дека во текот на изминатата недела, како резултат на украинските напади, 113 руски граѓани претрпеле последици, од кои 19 биле убиени – меѓу нив и едно дете. 94 лица биле повредени, вклучувајќи десет деца.
Захарова изјави дека руските повици за мирно решавање на украинската криза со елиминирање на нејзините причини наидуваат на сè поголемо разбирање меѓу странските лидери и политичари, и дека претставниците на земјите од Глобалниот Југ и Исток континуирано покажуваат поддршка за Москва.
„Во исто време, се слушаат оправдани критики против земјите од ЕУ, кои го спречуваат процесот на преговори и со сета своја сила поттикнуваат понатамошна ескалација на конфликтот“, додаде таа.
Како што наведува, таков став неодамна изрази, меѓу другите, премиерот на Унгарија Виктор Орбан, членката на Претставничкиот дом на Конгресот од редовите на републиканците Ана Паулина Луна и многу други.

