Свет
Бројот на загинати во земјотресот во Мјанмар се искачи на 1.644 лица

Бројот на загинати од разорниот земјотрес што го погоди Мјанмар во петокот, се искачи на 1.644 лица.
Според првичните проценки на мјанмарската опозициска Влада на национално единство (НУГ), земјотресот со јачина од 7,7 степени според Рихтеровата скала оштетил најмалку 2.900 згради, 30 патишта и седум мостови.
„Поради значителна штета, аеродромите во Најпитав и Мандалеј се привремено затворени“, соопшти НУГ, група составена од членови на избраната влада која беше соборена од војската во 2021 година, со што започна граѓанска војна.
Контролна кула на аеродромот во Најпитав, планираниот главен град на Мјанмар, се урна, изјави извор за Ројтерс.
Американскиот геолошки институт предвидува дека бројот на загинати во Мјанмар би можел да надмине 10.000, додека економската штета би можела да биде поголема од годишниот БДП на земјата.
Највисокиот генерал на воената хунта во петокот упати редок апел за меѓународна помош, а голем број земји веќе почнаа да и помагаат на погодената земја од Југоисточна Азија.
Русија, Индија, Малезија и Сингапур испраќаат авиони со хуманитарна помош и спасувачки тимови, а Јужна Кореја најави дека преку меѓународни организации ќе обезбеди првична хуманитарна помош во Мјанмар од два милиони долари.
Блокот на земји од Југоисточна Азија, АСЕАН, во саботата објави дека ја препознава итната потреба од хуманитарна помош за Мјанмар по големиот земјотрес и е подготвен да ги поддржи напорите за закрепнување.
Соединетите Американски Држави, кои имаат тензични односи со војската на Мјанмар и ги санкционираа нивните функционери, вклучително и шефот на воената хунта, Мин Аунг Хлаинг, најавија дека ќе пружат одредена помош.
Кинеските спасувачки тимови пристигнаа и во трговскиот центар на земјата, Јангон. Кинескиот претседател Си Џинпинг телефонски разговарал со лидерот на хунтата, соопшти кинеската амбасада. Џинпинг најави 13,77 милиони евра помош, која ќе вклучува шатори, ќебиња и комплети за прва помош.
Првата помош од Индија пристигна и во Мјанмар, јавува агенцијата „ДПА“. Вклучува 15 тони залихи, во кои покрај основните потреби има и генератори и тимови за пребарување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Очекувам да се сретнам со Доналд Трамп во следните два месеци

Српскиот претседател Александар Вучиќ изјави дека се надева дека ќе се сретне со американскиот претседател Доналд Трамп во следните два месеци.
„Очекувам да ја имам таа средба. Тој е премногу зафатен, секогаш е можно нешто да се смени, датумот се уште не е одреден, но знаете дека јас сум многу внимателен кога зборувам за тоа. Тоа би било огромна чест за нашата Србија и верувам дека е изводливо“, изјави Вучиќ.
Зборувајќи за вчерашниот телефонски разговор со францускиот претседател Емануел Макрон, како и за нивната средба во април, Вучиќ рече дека секогаш имаат неколку важни теми за разговор.
„Вчера поминавме низ неколку важни теми. Понекогаш разговараме ненадејно. Како што оди по државен протокол, тоа е закажано и се чека пет до седум дена“, рече Вучиќ.
Свет
Белата куќа: Секоја земја која неправедно се однесува кон САД ќе биде цел на дополнителни царини

Секоја земја што неправедно се однесува кон САД треба да очекува дека ќе биде цел на дополнителни царини, соопшти денеска Белата куќа, два дена пред американскиот претседател Доналд Трамп да ги објави, како што рече, сеопфатните, реципрочни царини.
„Секоја земја што се однесуваше неправедно со американскиот народ треба да очекува да добие царина во среда како реципрочна мерка“, им рече на новинарите портпаролката на Белата куќа Каролин Левит, одбивајќи да даде дополнителни детали, според Ројтерс.
На прашањето дали ќе има исклучоци за земјоделците, таа рече дека „во овој момент нема исклучоци“.
Свет
Силен земјотрес ја погоди Индонезија, се стравува од повредени

Земјотрес со јачина од 6 степени според Рихтеровата скала е регистриран во 17:54 часот во Индонезија.
Според достапните податоци, епицентарот на земјотресот бил лоциран во областа со географски координати на географска ширина -10,1246 и географска должина 119,0393.
Хипоцентарот на земјотресот, според Европско-медитеранскиот сеизмолошки центар, се наоѓал на длабочина од приближно 37 километри под површината на земјата во близина на островот Сумба.
Засега нема извештаи за материјална штета или повредени, а надлежните служби ја следат состојбата.
Во Мјанмар минатата недела беше регистриран разорен земјотрес со јачина од 7,7 степени.