Свет
Бројот на заразени со Ковид-19 во Јапонија за еден ден за првпат надмина 10.000 лица
Бројот на новозаразени со коронаворус во Јапонија за првпат надмина 10.000 лица, објавија јапонските гласила, откако градските власти во Токио претходно објавија рекордно висок број од 3.865 инфекции во главниот град.
Во исто време, јапонската влада ја разгледува можноста за прогласување вонредна состојба во Осака и три други префектури околу Токио, објави новинската агенција Кјодо, повикувајќи се на градските власти.
Главниот советник на јапонската влада за коронавирус предупреди во четвртокот за можно преоптоварување на здравствениот систем со оглед на брзото зголемување на бројот на заразени.
„Ако не се сподели свеста за кризата, порано или подоцна притисокот врз здравствениот систем ќе стане посериозен“, предупреди Шигеру Оми на состанокот на комитетот во парламентот.
„Освен вакцинација, нема многу други начини да се намали инфекцијата“, рече Оми, коментирајќи го брзото ширење на делта-сојот.
Други фактори што овозможуваат зголемување на бројот на заразени, покрај делта-сојот, се и сезоната на празници и Олимпијадата.
Гувернерката на Токио, Јурико Коике, ги повика младите луѓе да се вакцинираат, да останат во своите домови и да ги почитуваат мерките против коронавирусот.
„Активностите на младите луѓе се клучни (во контролата на инфекцијата)“, рече таа.
„Зголемувањето на инфекциите нема никаква врска со Олимписките игри“, рече Коике.
Јапонски професор по психологија од Универзитетот Цукуба за јапонска телевизија изјави дека среде веселото олимписко расположение и успехот на јапонските спортисти, многу луѓе повеќе не го сфаќаат коронавирусот сериозно.
Тие гледаат дека очигледно не е проблем што луѓето од целиот свет доаѓаат на натпреварите и сега веруваат дека коронавирусот „не е голема работа“.
Со оглед на четвртата вонредна состојба во Токио, се појавува ефектот на навика и ефектот на мерките за коронавирус исчезнува, вели професорот.
Според него, особено помладите Јапонци биле критикувани дека биле надвор и пиеле на улица ноќе по затворањето на рестораните каде што не се дозволува алкохол.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
„Масовно уништување“: Газа на првиот ден од прекинот на огнот
Снимка со беспилотно летало од северна Газа, направена за Си-ен-ен на првиот ден од прекинот на огнот, го покажува огромниот размер на уништувањето предизвикано од петнаесетмесечната војна, пренесува медиумот.
Претседателот на Европскиот совет, Антонио Коста, исто така ги поздрави прекинот на огнот во Газа и почетокот на ослободувањето на преостанатите заложници што ги држеше Хамас.
„Олеснување е, конечно, да се видат ослободени првите заложници и пристигнувањето на хуманитарната помош, примирјето да стапи во сила во Газа“, рече Кошта во објавата на платформата Х.
Тој рече дека „договорот ја носи потребната трошка надеж во регионот“.
„Сите страни мора да се придржуваат до него. Мирот е единствениот пат напред“, додаде Кошта.
Генералниот секретар на Обединетите нации, Антонио Гутереш, исто така го поздрави почетокот на спроведувањето на договорот за прекин на огнот и ослободувањето на заложниците во Газа во објава на мрежата Х.
„Ние сме подготвени да ја поддржиме оваа имплементација и да ја зголемиме испораката на постојана хуманитарна помош до Палестинците, кои продолжуваат да страдаат. Императив е овој прекин на огнот да ги отстрани значајните безбедносни и политички пречки за испораката на помошта“, рече Гутереш.
Свет
Светски економски форум во Давос: Трамп и вештачката интелигенција во фокусот
Светската политичка и економска елита денеска се собира во швајцарскиот зимски центар Давос на годишниот Светски економски форум (СЕФ).
На годинешниот собир ќе присуствуваат речиси 900 извршни директори и 60 претседатели и премиери.
Лидерските говори ќе почнат утре по денешното официјалното отворање на конференцијата.
Официјалната програма вклучува разговори и панели за сајбер-криминал, вештачка интелигенција и технолошки промени со мотото „Соработка за интелигентна доба“.
Но, набљудувачите веруваат дека годинешниот состанок повеќе од сè ќе биде преокупиран со враќањето на Доналд Трамп во Белата куќа и прашањата за неговите потези во неговиот втор претседателски мандат.
Трамп претходно најави дека ќе воведе царини за увоз од Кина и други големи трговски партнери, од кои повеќето ќе бидат претставени на СЕФ.
Трамп беше првиот американски претседател кој лично присуствуваше на форумот за време на својот мандат. В четврток 78-годишниот Трамп повторно ќе зборува во Давос, но преку видеоврска.
Украинскиот претседател Володимир Зеленски се очекува да зборува утре, истиот ден со германскиот канцелар Олаф Шолц.
Свет
Поранешен советник на Трамп: Украина може да стане реприза на Виетнам
Ситуацијата во Украина може да стане реприза на војната во Виетнам за новоизбраниот американски претседател Доналд Трамп доколку тој навреме не престане да го поддржува Киев, изјави Стив Банон, поранешен главен стратег на Белата куќа и поранешен советник на Трамп.
Бенон предупреди дека Трамп ризикува дополнително да ги вовлече САД во конфликтот во Украина доколку не се откаже од поддршката за Киев. Тој ја спореди сегашната ситуација со времето на поранешниот претседател Ричард Никсон, кој се обиде и не успеа да ја извлече земјата од виетнамската војна.
„Ако не внимаваме, ова ќе стане – Трамповиот Виетнам. Токму тоа му се случи на Ричард Никсон. Како резултат на тоа тој стана одговорен и тоа стана негова војна, а не на неговиот претходник Линдон Џонсон“, изјави Банон за американските медиуми.
Тој посочи дека специјалниот претставник на новоизбраниот претседател за Украина, Кит Келог, не е во право кога вели дека конфликтот може да се прекине додека се задржува американската поддршка за Киев. Тој верува дека вовлекувањето на САД во воен конфликт не е во американските интереси „бидејќи е невозможно да се победи“.