Свет
Бунт во руски затвор: затвореници со ножеви ги нападнале чуварите и зеле заложници

Во затворот во градот Суровикин во регионот на Волгоград некои затвореници ги нападнаа затворските чувари и затворската управа и зедоа заложници, соопшти Руската федерална агенција за извршување затворски санкции.
Затвореници на седницата на дисциплинската комисија со ножеви ги нападнале вработените во затворот и ги зеле како заложници. Руските медиуми јавуваат дека е можно да има жртви меѓу чуварите и управата.
Одредени канали наведуваат дека се работи за затвореници кои се членови на терористичката организација Исламска држава. Засега нема потврда за оваа информација.
Според руските медиуми, ранет е шефот на полициската станица, како и уште три лица. Ранетите, според неофицијални руски медиуми, се префрлени во болница.
Наводно, имам од Волгоград бил ангажиран да преговара со киднаперите. Наводно, киднаперите бараат хеликоптер и два милиона долари. За тоа пишуваат телеграмски канали поврзани со руската полиција. Нема официјални потврди за оваа информација.
Руските медиуми јавуваат дека специјална антитерористичка единица пристигнала пред затворот и се подготвува за операција за ослободување. Во затворот има приближно 1.230 затвореници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Поради тајфунот Буалој илјадници луѓе се евакуирани во Виетнам и на југот на Кина

Виетнам денеска ги затвори аеродромите и евакуираше илјадници луѓе во областите што потенцијално би можеле да бидат погодени од сè посилниот тајфун Буалој, кој се движи кон земјата од Филипините, каде што предизвика најмалку десет смртни случаи и разорни поплави.
Се очекува тајфунот со брзина на ветер од 133 километри на час да стигне до централниот дел од Виетнам во текот на денот, соопшти Виетнамската национална метеоролошка агенција.
„Ова е брзо движечка бура, речиси двојно поголема од просечната брзина, со висок интензитет и широка област на влијание. Способна е истовремено да предизвика повеќе природни катастрофи, вклучувајќи силни ветрови, обилни дождови, поплави, лизгање на земјиштето и крајбрежни поплави“, се вели во соопштението на метеоролошката агенција.
Властите во централната покраина Ха Тин започнаа со евакуација на повеќе од 15.000 луѓе, соопшти виетнамската Влада, додавајќи дека илјадници војници се во состојба на готовност за да му пружат помош на населението. Виетнам ги прекина операциите на четири крајбрежни аеродроми, вклучувајќи го и меѓународниот аеродром Дананг, и ги прилагоди времињата на полетување на неколку авиони, соопшти Управата за цивилно воздухопловство на Виетнам. Обилните дождови веќе предизвикаа поплави во Хуе и Куанг Три, соопшти виетнамската Влада.
Кинескиот град Сања во јужната островска покраина Хајнан е исто така ставен во состојба на зголемена готовност, бидејќи тајфунот Буалој, 20-тиот тајфун оваа година, се приближува кон јужниот дел од островот, соопшти кинеската покраинска метеоролошка опсерваторија.
Свет
Русија изврши масовен ракетен и беспилотен напад врз Киев и други украински градови, има многу жртви

Ноќеска Русија изврши масовен ракетен и беспилотен напад врз Киев и други украински градови, користејќи тешки бомбардери. Воздушна тревога беше прогласена низ целата земја, дури и во региони далеку од линијата на фронтот.
Украинскиот заменик-министер за надворешни работи Андриј Сибиха објави дека Русија употребила стотици беспилотни летала и ракети во овој напад. Според извештаите на украинските медиуми, пет руски бомбардери Ту-95 полетале од аеродромот Олења во регионот Мурманск околу 1:45 часот по локално време. Недолго потоа, околу 2:25 часот, Воената администрација на градот Киев предупреди за лансирањето на авионот МиГ-31К, што предизвика тревога низ целата земја.
Украинските воздухопловни сили дополнително во 3:52 часот наутро известија за веројатното полетување на бомбардерот Ту-95 од воздухопловната база Енгелс. Во текот на ноќта, бројни украински региони беа под закана од роеви беспилотни летала од типот „Шахед“, а експлозии беа регистрирани во Киев, Киевската област, Запорожје, Хмелницката област и Суми.
Најголема штета е регистрирана во Киев и Запорожје. Во главниот град, делумно е уништена петкатна зграда, а оштетена е станбена инфраструктура во неколку градски области, потврди началникот на воената администрација на Киев, Тимур Ткаченко. Оштетени се и нестанбени згради и паркирани автомобили. Градоначалникот на Киев, Виталиј Кличко, извести дека најмалку пет лица се повредени и хоспитализирани.
„Ракети сè уште паѓаат врз градот“, рече тој, апелирајќи до граѓаните да останат во засолништа. Пожари избувнаа во неколку куќи и згради во близина на Киев. Во градот Фастив, пет работници беа повредени во пекарница која се запали за време на нападот. Во Запорожје, регионалниот центар на делумно окупираната област, руските сили нападнаа цивилна инфраструктура, изјави гувернерот Иван Федоров.
Девет куќи, 14 станбени згради, едно училиште и неколку производствени погони беа оштетени. Пет лица беа повредени во два напади во текот на ноќта.
Свет
Затворската казна за Саркози ја подели земјата околу тоа како судиите се справуваат со случаите на политички криминал

Затворската казна изречена на поранешниот француски претседател Никола Саркози ја подели земјата околу тоа како судиите се справуваат со случаите на политички криминал, додека лидерката на крајната десница Марин Ле Пен се подготвува да се обиде да ја поништи пресудата за проневера и да се кандидира за претседател во 2027 година, објави Ројтерс.
Парискиот суд ја шокираше политичката сцена во четвртокот кога на Саркози му изрече казна затвор од пет години затвор за криминален заговор во врска со обидот за собирање средства за кампања во Либија, објави агенцијата.
Саркози ќе биде и првиот претседател на Франција по Втората светска војна, кој ќе биде затворен.