Свет
Вадефул: Германија ќе ѝ помогне на Украина да произведува повеќе оружје со побрзо темпо

Целта на Германија е да ѝ помогне на Украина да произведува повеќе оружје со побрзо темпо, во време кога таа земја се обидува да ја зајакне својата позиција во мировните преговори со Русија, изјави денес во Киев шефот на германската дипломатија, Јохан Вадефул.
„Веруваме дека наша задача е да ѝ помогнеме на Украина за да може посилно да преговара“, рече Вадефул за време на посетата на Киев, во придружба на претставници на германската индустрија за специјални намени.
Руската инвазија на Украина не покажува знаци на смирување. Украина нема доволно оружје ниту војници на фронтот, а меѓународната помош е клучна за нејзиниот отпор кон значително поголемата руска армија и економија. Германија е најголемиот воен спонзор на Украина по САД, чија понатамошна поддршка е доведена во прашање, анализираат медиумите.
На заедничката прес-конференција со украинскиот министер за надворешни работи Андриј Сибих, Вадефул рече дека прокламираната подготвеност на Путин за преговори е „само фасада засега“.
„Сакаме да изградиме нови заеднички вложувања за самата Украина да може да произведува побрзо и повеќе за сопствена одбрана, бидејќи вашите потреби се огромни. Нашата соработка во производството на оружје е вистински адут – тоа е логично продолжение на нашата испорака на опрема. Можеме да имаме заедничка корист од тоа – со вашето богатство на идеи и вашето искуство, ќе станеме подобри“, рече Вадефул, кој ќе разговара и со претседателот на Украина, Володимир Зеленски.
Вадефул го посети Киев помалку од 48 часа откако Русија го започна, според украинските власти, најголемиот воздушен напад врз Украина од почетокот на инвазијата во февруари 2022 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Зеленски би можел да учествува на средбата Трамп-Путин, тврдат Американците

Американскиот амбасадор во НАТО, Метју Витакер, синоќа изјави дека украинскиот претседател Володимир Зеленски би можел да присуствува на средбата меѓу Доналд Трамп и Владимир Путин во Алјаска во петок.
„Да, дефинитивно мислам дека е можно“, рече американскиот дипломат во НАТО кога беше прашан од Си-ен-ен за можната посета на украинскиот претседател на Алјаска, каде што Трамп и Путин треба да се сретнат на 15 август.
„Не може да има договор освен ако сите вклучени страни не го потпишат. И, очигледно, апсолутен приоритет е да се стави крај на војната“, рече Витакер. Лидерите на Европската Унија и европските сили вчера инсистираа дека и официјален Киев треба да учествува во разговорите меѓу САД и Русија.
И Володимир Зеленски ги повика своите европски сојузници, вклучувајќи ги Франција, Германија и Велика Британија, кои исто така се исклучени од овие преговори, да дефинираат заеднички пристап. „Итен состанок“ меѓу министрите за надворешни работи на ЕУ и нивните украински колеги преку видеоконференција е закажан за понеделник.
Но, на крајот, одлуката дали Зеленски ќе учествува во разговорите ќе ја донесе Доналд Трамп, предупреди американскиот амбасадор.
„Ако мисли дека поканата на Зеленски е најдоброто сценарио, тогаш ќе го стори тоа“, рече Витакер. Но, „сè уште не е донесена никаква одлука“, нагласи американскиот дипломат.
фото: принтскрин
Свет
Австралија ќе ја признае палестинската држава

Австралија планира многу наскоро да признае палестинска држава, откако Франција, Велика Британија и Канада веќе ја објавија својата намера да го сторат тоа, објави „Сиднеј морнинг хералд“.
Премиерот Ентони Албанез би можел да го потпише признавањето во рок од неколку дена од денешниот редовен состанок на кабинетот, објави „Сиднеј морнинг хералд“, повикувајќи се на неименувани извори.
Канцеларијата на премиерот Албанез не одговори на барањето за коментар.
Франција и Канада минатиот месец соопштија дека планираат да признаат палестинска држава, додека Велика Британија изјави дека ќе го стори истото доколку Израел не ја реши хуманитарната криза на палестинските територии и не постигне прекин на огнот.
Израел ги осуди одлуките на земјите да поддржат палестинска држава, велејќи дека овој потег ќе го награди Хамас, кој владее со Газа.
Нетанјаху вчера им изјави на новинарите дека мнозинството израелски граѓани се против формирањето палестинска држава бидејќи веруваат дека тоа ќе донесе војна, а не мир.
Албанез повика на решение со две држави, а неговата влада од левиот центар го поддржува правото на Израел да постои во безбедни граници и правото на Палестинците на сопствена држава.
„Реков дека е прашање кога, а не дали“, им рече Албанез на новинарите во Нов Зеланд во саботата за ставот на неговата влада за палестинска држава.
фото: принтскрин
Свет
(Видео) Израелската армија: Убивме новинар на Ал Џезира

Израелската војска вчера објави дека го убила новинарот на Ал Џезира, Анас Ал Шариф (28), во напад врз градот Газа, обвинувајќи го дека раководел со ќелија на Хамас.
„Анас Ал Шариф служел како водач на терористичка ќелија во рамките на терористичката организација Хамас и бил одговорен за ракетни напади врз израелски цивили и војници на ИДФ“, соопшти вчера израелската војска.
Four Al Jazeera staff, including reporter Anas Al Sharif, were killed in an Israeli attack on a tent for journalists outside the main gate of Gaza's al-Shifa hospital https://t.co/MMKatjgeAa pic.twitter.com/OBgVFrn0ax
— Al Jazeera English (@AJEnglish) August 10, 2025
Ал Џезира објави дека новинарите биле убиени во она што се чини дека е насочен израелски напад врз нивниот шатор пред болницата Ал-Шифа. Дописникот на Ал Џезира, Мохамед Крејкех, и снимателите Ибрахим Захер и Мохамед Нуфал, исто така беа убиени во нападот.
Израелската војска уби повеќе од 200 новинари и медиумски работници од почетокот на бомбардирањето, вклучувајќи неколку новинари на Ал Џезира и нивни роднини.
фото: принтскрин