Кина ќе направи се за да придонесе за палестинско-израелското помирување, му рекол кинескиот министер за надворешни работи на својот израелски колега во телефонски разговор, пренесуваат кинеските државни медиуми.

Кина цврсто ќе ја поддржи секоја резолуција што води кон мир, му рече Ванг Ји на израелскиот министер за надворешни работи Елио Коен, нарекувајќи го конфликтот „голем избор меѓу војна и мир“, објавија во вторникот кинеските државни медиуми.

Ванг, исто така, го повика Израел да преземе ефективни мерки за заштита на безбедноста на кинеските граѓани и институции на Блискиот Исток, додавајќи дека „сите земји имаат право на самоодбрана, но треба да се придржуваат до меѓународното хуманитарно право и да ја заштитат безбедноста на цивилите“.

Кина го осуди насилството и нападите врз цивилите во конфликтот, но додека Ванг оцени дека акциите на Израел отишле „надвор од опсегот на самоодбрана“, тој не го именуваше Хамас во своите коментари.

Во одвоен телефонски разговор со палестинскиот министер за надворешни работи Ријад ал-Малики, Ванг рече дека „длабоко сочувствува“ со луѓето во Газа и дека она што им е најпотребно се безбедноста и напорите за запирање на војната и промовирање на мирот, а не оружје или геополитички калкулации.

Кина повикува на свикување на „поавторитативна, посеопфатна и ефективна меѓународна мировна конференција“ што е можно поскоро за да се промовира продолжувањето на мировните преговори меѓу Израел и Палестинците, рече Ванг.

„Советот за безбедност на ОН треба ефикасно да ја преземе својата одговорност, меѓународната заедница мора да дејствува итно, а земјите надвор од регионот, особено големите сили, треба да бидат објективни и непристрасни“, рече тој.

Кина и Русија го делат ставот дека легитимните национални права на палестинскиот народ не се исполнети, а САД го осудија нападот на Хамас, целосно поддржувајќи го правото на Израел да се брани.

Кина, која постојано повикува на прекин на огнот, исто така јасно стави до знаење дека нејзините воени бродови на Блискиот Исток се дел од рутински мисии за придружба и пријателски посети, а не интервенција во конфликт, објави кинескиот државен весник Глобал тајмс.

Весникот наведува дека портпаролот на кинеската амбасада во САД повикал да се стави крај на „неоснованото пренагласување“ на испраќањето кинески воени бродови на Блискиот исток по извештаите за неколку воени бродови стационирани во регионот.