Свет
„Вашингтон пост“: Министерството за правда има нови докази дека Трамп ја попречувал истрагата
Американското Министерство за правда и агентите на ФБИ собраа нови докази што укажуваат дека поранешниот американски претседател Доналд Трамп можеби ја попречувал истрагата за доверливите документи пронајдени во неговиот имот на Флорида, објави „Вашингтон пост“.
Агентите на ФБИ заплениле неколку илјади владини документи минатиот август, некои од нив високо доверливи, од имотот на Трамп во Мар-а-Лаго.
Ова е само една од двете кривични истраги што специјалниот обвинител Џек Смит ги води против поранешниот американски претседател, пренесува „Ројтерс“.
Трамп, кој беше обвинет во четвртокот во посебен случај, негира дека сторил нешто незаконско и ги нарече истрагите политички мотивирани.
„Вашингтон пост“ додава, повикувајќи се на извори запознаени со истрагата, дека откако неговите правни советници добиле судска наредба да ги вратат доверливите документи, Трамп поминал низ некои од кутиите со владини документи што биле во неговиот дом во очигледен обид да задржи одредени работи.
„Пост“ додаде дека иследниците имаат и докази што укажуваат дека Трамп им рекол на соработниците да ги доведат во заблуда владините претставници на почетокот на 2022 година пред да стигне поканата кога американската Администрација за национални архиви и записи работеше на враќање на документите од Трамп од времето кога тој беше претседател.
ФБИ упати прашања до американското Министерство за правда, кое веднаш не одговори на барањето за коментар.
Во изјава за „Вашингтон пост“, портпаролот на Трамп, Стивен Чеунг, вели дека „гонењето на поранешниот претседател Трамп нема никаква фактичка или законска основа“ и ги обвини специјалниот советник Смит и Министерството за правда дека се обидуваат да манипулираат со јавното мислење со објавување информации до јавноста.
Покрај случајот против него во Њујорк, Трамп се соочува со испрашување во државата Џорџија за тоа дали тој наводно се обидел да ја сврти својата загуба од ривалот Џозеф Бајден во своја корист по претседателските избори во ноември 2020 година.
Трамп во вторник ќе се појави пред судот во Њујорк, каде што ќе одговара на прашањата дали ја подмитил порноѕвездата Сторми Даниелс да не зборува за наводна врска со него.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Привремениот либански премиер Микати: На Либан му треба итен прекин на огнот
Привремениот премиер на Либан, Наџиб Микати, денеска изјави дека на неговата земја и е потребен итен прекин на огнот меѓу Израел и милитантите на организацијата Хезболах и најави дека околу 1,2 милиони луѓе се раселени поради израелските напади.
„Запрете ги борбите. Не ни треба повеќе крв. Не ни треба повеќе уништување“, рече Микати на онлајн конференција организирана од Американската работна група за Либан, непрофитна организација со седиште во САД, пренесува Ројтерс.
Тој нагласи дека „итно е потребно прекин на огнот“.
Свет
Бајден: Не поддржувам напади врз иранските нуклеарни постројки како одговор на нападот
Американскиот претседател Џозеф Бајден изјави денеска дека не поддржува напади врз иранските нуклеарни постројки како одговор на ракетниот напад врз Израел.
„Ќе разговараме со Израелците за тоа што ќе направат, но сите седуммина (земјите од Г7) се согласуваме дека имаат право да одговорат, но тие треба да одговорат пропорционално“, им рече Бајден на новинарите, пренесе Ројтерс.
Бајден одговори дека ќе бидат воведени нови санкции кон Иран и додаде дека наскоро ќе разговара со израелскиот премиер Бенјамин Нетанјаху.
„Очигледно е дека Иран отстапи далеку од курсот“, нагласи тој.
Иран вчера лансираше повеќе од 180 балистички ракети кон Израел, потег што Бајден претходно го опиша како „неефикасен“.
Израелскиот премиер Бенјамин Нетанјаху вети дека Иран ќе плати за нападот.
Некои аналитичари наведуваат дека одговорот на Израел овој пат веројатно ќе биде поостар, што укажува на тоа дека Израел би можел да ги таргетира иранските нуклеарни или нафтени постројки, пренесува Танјуг.
Свет
Претставникот на Израел во ОН: Итно да се воведат санкции кон Иран поради неговиот ладнокрвен напад врз Израел
Претставникот на Израел во ОН Дени Данон побара денеска на итната седница на Советот за безбедност на Обединетите нации посветена на кризата на Блискиот Исток, веднаш да се воведат санкции кон Иран поради, како што наведе, ладнокрвнниот ракетен напад врз Израел.
„Ова е напад врз милиони израелски цивили. Тоа се жени и деца, муслимани, христијани, Евреи, луѓе од сите вери. Во овој невиден чин на агресија, Иран истрела речиси 200 балистички проектили“, рече Данон, ОН, соопшти Советот за безбедност.
Тој изјави дека милиони луѓе се во засолништа и посочи дека нападот на Иран е обид да се нападне срцето на израелското општество и дека на мета биле најсветите места – џамиите, црквите и синагогите.