Американското министерство за одбрана планира да повлече голем дел од своите војници кои се стационирани во Германија, објави „Вашингтон пост“.

„Засега се разгледува можноста за трајно повлекување на најголем дел од околу 35.000 американски војници во Германија, или нивно преместување во Полска“, пишува „Вашингтон пост“ повикувајќи се на извор во Министерството за одбрана на САД.

Идејата за повлекување на војниците од Германија, како што наведува весникот, претседателот Доналд Трамп ја соопштил за време на состанокот со воените советници во Белата куќа.

Портпаролот на Министерството за одбрана, Ерик Пахон, ги негираше извештаите за повлекување на војници од Германија, но во исто време истакна дека секогаш одново се преиспитува исплатливоста за одржување на воените контингенти во странство. Сепак, тоа не е поврзано со никакво повлекување на војници од Германија, додаде тој.

„САД и натаму стојат заедно со Германија и НАТО алијансата“, рече Пахон.

Европските познавачи на приликите сметаат дека станува збор за притисок на Вашингтон врз партнерите од НАТО, во пресрет на самитот кој треба да се одржи во јули. Трамп, од неговото доаѓање на власт, од земјите-членки на НАТО бара да се држат до договорот за издвојување на средства за одбрана во износ од 2 отсто од БДП. Германија беше посебно на удар во неговите критики.

Американските војници во Германија го сочинуваат најголемиот контингент на американската армија стациониран во странство.