Свет
(Видео) Американскиот Конгрес со аплауз го поздрави обраќањето на Зеленски

Украинскиот претседател Володимир Зеленски го отвори своето обраќање пред американскиот Конгрес пофалувајќи ја храброста на украинскиот народ и рече дека судбината на неговата земја се решава токму сега – среде руската инвазија.
Во пресрет на неговото обраќање тој беше пречекан со аплауз од американските пратеници.
„Главниот град Киев е под ракетни и воздушни напади на руските војници секој ден. Но, тој не се откажува. Украина е во најтешката војна од Втората светска војна“, рече Зеленски.
„Имам чест да ве поздравам во името на украинскиот народ, храбар и слободољубив народ, кој се спротивставува на агресијата веќе осум години. Во моментот се решава судбината на нашата земја. Судбината на нашиот народ. Украинците слободни ќе може да ја зачуваат својата демократија. Не нѐ нападнаa само нас, не само земјата, не само градовите, почна брутална офанзива против нашите вредности“, рече тој.
Тој ги повика САД да направат повеќе за Украина.
„Во најтемното време за нашата земја, ве повикувам да сторите повеќе. Потребни се нови пакети санкции, постојано, секоја недела, додека не запре руската воена машина“, рече тој.
Зеленски, меѓу другото, рече дека САД треба да ги санкционираат сите руски политичари што остануваат на своите позиции и да не ги прекинуваат врските со оние што се против Украина.
Украинскиот претседател Володимир Зеленски директно му се обрати на американскиот претседател Џо Бајден во својот говор пред Конгресот повикувајќи го да биде лидер на мирот.
„Не гледам смисла во животот ако не може да ја спречи смртта. И ова е моето главно прашање до лидерот на народот. Му се обраќам на претседателот Бајден: Ти си лидер на нацијата, твојата голема нација. Сакам да бидеш лидер на светот. Да се биде лидер на светот, значи да се биде лидер на мирот“, рече Зеленски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.