Европа
(Видео) Германска телевизија објави снимка од руски војници кои убиваат цивил што се предава
Германскиот јавен сервис ЗДФ во емисијата „Фронтал“ објави видео снимено со дрон, на кое се гледа како во предградието на Киев руски војници убиваат украински цивил кој се обидел да се предаде. ЗДФ наведува дека станува збор за воено злосторство.
„Фронтал“ доби снимки од дрон од анонимен извор во Украина, велат тие.
„Тоа беа два одделни клипа, едниот трае 2 минути, а другиот речиси 4 минути. Она што го прикажуваат е шокантно. Украински дрон за набљудување го снима експресниот пат Е-40 неколку километри западно од Киев“, објави ЗДФ.
— frontal (@ZDFfrontal) March 16, 2022
Снимката покажува момент од раните попладневни часови на 7 март.
„Северно од автопатот Русите ја презеле контролата врз некои предградија на Киев. Тие напредуваат кон патот. Дронот ја снима позицијата на руски тенк на неколку метри од бензинска пумпа, тенкот има една од типичните бели ознаки за идентификација на руските сили во Украина. А во шумата до тенкот: мали, но видливи силуети на вооружени војници“, ја опишува ситуацијата ЗДФ.
Клучното прашање е дали снимката е оригинална.
„На крајот на краиштата, вистината прва умира во војна, а сите вклучени страни користат пропаганда за свои цели. Снимките може да бидат такво оружје“, истакнува ЗДФ.
Тие успеале да ја потврдат автентичноста на снимката од дронот. Дошле до човекот што им го испратил видеото, тој моментно се крие во подрум во главниот град на Украина.
Пред војната продавал електрична стока. ЗДФ ги знае неговото вистинско име и возраста, но решиле да не ги објавуваат од безбедносни причини.
Дронот што го снимил овој настан е „мавик III“, кој има професионална филмска камера, но не е воена направа. Снимките содржат временски печат, кој е автентичен.
На снимката од 7 март потоа се гледа како руските војници го влечат телото на мажот од автомобилот во ров.
„Со него патувале и жена и дете. Подоцна војниците ги однесоа во блиската шума. На снимките не се гледа што се случило со нив“, забележува ЗДФ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.