Нападите на продавниците на „Тесла“ ќе бидат означени како домашен тероризам, а сторителите „ќе поминат низ пекол“, изјави американскиот претседател Доналд Трамп во знак на поддршка за главниот извршен директор на производителот на електрични автомобили и неговиот сојузник Илон Маск.

Акциите на „Тесла“ се зголемија за речиси 4% во вторникот, враќајќи се од најголемиот еднодневен пад во последните четири и пол години претходниот ден. Претседателот Трамп се појави со Маск во Белата куќа за да избере нова „Тесла“ за неговиот персонал.

Активистите неодамна ги организираа таканаречените „Протести за рушење на Тесла“ за да го изразат незадоволството од улогата на Маск во огромното намалување на федералната работна сила наредено од Трамп и откажувањето на договорите за финансирање за хуманитарни програми ширум светот. Маск, најбогатиот човек во светот, раководи со Одделот за владина ефикасност (DOGE) во администрацијата на Трамп.

„Тие ѝ штетат на големата американска компанија“, рече Трамп во Белата куќа, мислејќи на демонстрантите.

„Да ви кажам, ако го направите ова на Тесла, и ако го направите ова на која било компанија, ќе ве фатиме и… ќе поминете низ пеколот“, додаде американскиот претседател, придружуван од Илон Маск, стоејќи покрај неколку паркирани автомобили на Тесла.

Портпаролот на Белата куќа Харисон Филдс рече дека „грозоморните акти на насилство врз Тесла од страна на радикалните левичарски активисти не се ништо помалку од домашен тероризам“.

Околу 350 демонстранти демонстрираа пред застапништвото за електрични возила на „Тесла“ во Портланд минатата недела, додека девет лица беа уапсени за време на бурните протести пред застапништвото на „Тесла“ во Њујорк на почетокот на март.

Исто така, имаше извештаи во медиумите за вандализам врз возилата и салоните на „Тесла“ кои се под истрага. Групата која соопшти дека го организира „Протестот за рушење на Тесла“ во изјава на социјалната мрежа „Блускај“ одговори дека е мирољубива и се спротивставува на насилството.

Во сила стапија царините наметнати од американскиот претседател Доналд Трамп за увоз на челик и алуминиум. Оваа мерка ја зголемува рамната царина за челик и алуминиум што влегуваат во САД на 25% и ги елиминира исклучоците за одредени земји.

Овој потег може да ги ескалира тензиите меѓу САД и нивните најголеми трговски партнери. Неколку земји, вклучително и Обединетото Кралство и Австралија, неуспешно се обидоа да обезбедат исклучок. Други, вклучително и Канада и Европската унија, најавија дека ќе возвратат.

Трамп се надева дека царините ќе го зголемат производството на челик и алуминиум во САД, но критичарите велат дека тие ќе ги зголемат цените за американските потрошувачи и ќе го загрозат економскиот раст.

Американскиот институт за железо и челик (AISI), група која ги претставува американските производители на челик, ги поздрави царините, нагласувајќи дека тие ќе создадат работни места и ќе го зголемат американското производство на челик. Претседателот на групата, Кевин Демпси, рече дека овој потег го затвора системот на исклучоци, исклучувања и квоти што им овозможи на странските производители да ги избегнат царините.

„AISI ги поздравува активностите на претседателот за враќање на интегритетот на царините за челик и спроведување силна и зајакната програма за справување со нефер трговските практики“, рече Демпси.

САД се главниот увозник на алуминиум и челик, а Канада, Мексико и Бразил се меѓу најголемите добавувачи на метали. Царините значат дека американските компании кои сакаат да внесат метали во земјата ќе мора да платат данок од 25 проценти за нив.

Ова најверојатно ќе доведе до повисоки трошоци за широк опсег на индустрии во САД, вклучително и воздушната, производството на автомобили и градежништвото.

Американскиот министер за трговија Хауард Лутник потврди дека Белата куќа нема да воведе царина од 50 отсто за канадскиот челик и алуминиум, пренесува „Си-Би-Ес Њуз“.

Претходно и високиот трговски советник на администрацијата, Питер Наваро, им рече на новинарите пред Белата куќа дека промената на одлуката дојде откако премиерот на Онтарио, Даг Форд го повлече планот за воведување дополнителна такса за електрична енергија, што, според мислењето на Наваро, можеше да предизвика проблеми.

„Мислам дека (Даг Форд) сфати дека ова не е борба што вреди да се бори“, рече Наваро, додавајќи дека ги повикал канадските власти да ја ублажат реториката.

Американскиот претседател Доналд Трамп во текот на денот објави дека Соединетите држави ќе ги удвојат тарифите за челик и алуминиум од Канада на 50 отсто поради одлуката на канадската покраина да воведе давачка од 25 отсто за извозот на електрична енергија во САД. Но, премиерот на Онтарио Даг Форд ја суспендираше таа одлука и најави разговори во Вашингтон.

И покрај повлекувањето на двојниот тарифен план, постојните царини од 25 отсто за канадскиот челик и алуминиум ќе останат на сила и ќе стапат на сила во среда, потврди Лутник.