Свет
(Видео) „Вратете ни го она што ни го украдовте!“: објавена снимка од нападот врз Чарлс III во Австралија, сенаторката викаше по британскиот крал
На вториот ден од неговата официјална посета на Австралија британскиот крал Чарлс III се соочи со непријатност веднаш по завршувањето на својот говор во австралискиот парламент.
Лидија Торп, сенаторка од Абориџините од Австралија, јавно го критикува кралот, а сега се појави и видео од овој настан.
„Ова не е ваша земја! Ти не си мој крал! Вратете ни ја државата! Вратете ни го она што ни го украдовте! Нашите коски, нашите черепи, нашите бебиња, нашите луѓе! Ти не си мој крал! Ја уништивте нашата земја“, извикала Торп облечена во традиционална облека на Абориџините.
Обезбедувањето морало да интервенира и да ја спречи да се приближи до кралот по што била изведена надвор од салата за Чарлс да продолжи со разговорите со австралискиот премиер, Ентони Албаниси.
„Скај њуз“ објави дека Торп е првата Абориџинка од државата Викторија која станала сенатор, а кога положила заклетва во австралискиот парламент, одбила да се заколне на верност на тогашната британска кралица Елизабета Втора, мајка на Чарлс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Земјите од БРИКС имаат повеќе од 20 отсто од светските резерви на злато
Земјите од БРИКС имаат повеќе од 20 отсто од светските резерви на злато, најмногу Русија и Кина, пренесува РИА Новости, повикувајќи се на податоци на Светскиот совет за злато.
Во вториот квартал од 2024 година, вкупните светски резерви на злато изнесуваат 29,03 илјади тони, од кои 6,2 илјади тони или 21,4 отсто се регистрирани во земјите членки на организацијата БРИКС, според медиумот.
Русија има најмногу злато од сите земји на БРИКС, поточно 2,34 илјади тони, што претставува 8,1 отсто од сите светски резерви и 37,6 отсто од резервите на организацијата БРИКС.
На второ место е Кина, која има 2,26 илјади тони злато, односно 7,8 отсто од глобалните резерви и 36,4 отсто од резервите на БРИКС.
Индија, Саудиска Арабија, Бразил, Египет, Јужна Африка и Обединетите Арапски Емирати имаат помалку од три отсто од вкупните златни резерви во светот.
САД, според написитем имаат најголеми резерви на злато, односно 8,1 илјади тони или речиси една третина од сите светски резерви. Следува Германија со 3,35 илјади тони и 11,6 отсто резерви, Италија со 2,45 илјади тони и 8,5 отсто резерви, Франција со 2,44 илјади тони и 8,4 отсто резерви, додека Русија е на петто место, наведува РИА Новости, пренесува Танјуг.
Свет
Америка најави нова воена помош за Украина во вредност од 400 милиони долари
Американскиот министер за одбрана Лојд Остин за време на денешната работна посета на Киев најави нова помош за Украина во оружје во вредност од 400 милиони долари.
Најавата за нова воена помош за Киев доаѓа во пресрет на претседателските избори во САД за две недели, на 5 ноември.
Во фокусот на посетата на Остин на Украина, негова четврта и најверојатно последна како шеф на Пентагон во администрацијата на Џо Бајден, се очекува да бидат американските напори за зајакнување на одбранбените капацитети на Киев, кој се соочува со руски напредок на бојното поле во источна Украина.
Сепак, и покрај солидарноста со Киев, не се очекува промена во политиката на САД во однос на се погласните барања на претседателот Володимир Зеленски да и се дозволи на неговата земја да користи оружје насочено длабоко на руска територија.
„САД разбираат што е тука во прашање“, рече Остин најавувајќи нова помош во муниција, оклопни возила и противтенковско оружје.
Остин ја отфрла загриженоста дека доколку победи републиканецот Доналд Трамп би можел да се откаже од поддршката за Киев.
„Овие две и пол години не видов ништо освен двопартиска поддршка за Украина и очекувам дека ќе продолжиме да ја гледаме во Конгресот“, рече Остин.
Остин дојде во Киев по серијата средби што американскиот претседател Џо Бајден ги имаше во Берлин со клучните европски партнери.
Регион
Потресно сведочење на судењето на масовниот убиец во Белград: „Се преправав дека сум мртва“
Во Специјалниот суд во Белград денеска продолжи судењето на Урош Блажиќ за масакрот во селата Дубона и Мало Орашје. На самиот почеток сведочеше Андријана Митровиќ, која беше тешко ранета во масакрот.
„Јас и мојот пријател таа вечер отидовме во Дубона, Младеновац. Бевме таму десет минути. Во близина се слушаа истрели, не знаевме каде. Далибор Тодоровиќ праша кому му се родило дете. Не поминаа пет минути, Урош застана со автомобилот и влезе во училишниот двор и рече: ‘Раце горе или лежете долу, ќе пукам“. Далибор или Милан му рекоа да почека, но тој почна да пука. Тогаш паднав и се преправав дека сум мртва, потоа изгубив свест, не знам што се случи потоа. Ме разбудија во амбулантата“, изјави Андријана Митровиќ.
Потоа зборуваше Милосав Тодоровиќ, таткото на жртвата Далибор.
„Имам приговор за судењето. Вие сте премногу попустливи како судија, во се. Барам во име на сите родители Блажиќ, кој не се појавија на првото рочиште, да бидат казнети со 150.000 динари за тоа“, рече тој. Родителите на убиецот не се појавија на првото рочиште кога требаше да дадат исказ, а потоа не сакаа да сведочат.
Судењето на Урош Блажиќ за масакрот во селата кај Младеновац и Смедерево почна во мај годинава, но првото рочиште веднаш беше прекинато кога родителите на убиените деца го нападнаа убиецот. По тој инцидент, судењето беше преместено во Белград, во зградата на Специјалниот суд. Досега во постапката сведочеа голем број сведоци, обвинетиот, како и родителите на жртвите и преживеаните од масакрот.
Во масакрот загинаа девет лица, додека неколкумина беа ранети.