Свет
(Видео) Врие на Лонг Ајленд, поради опасните пожари е прогласена вонредна состојба

Гувернерката на државата Њујорк, Кети Хокул, прогласи вонредна состојба во округот Сафолк поради пожарот кој ја зафати популарната дестинација Лонг Ајленд. Пожарот не попушта, а силниот ветер го отежнува гаснењето на огнената стихија која, според прогнозите, ќе продолжи да се шири до доцните вечерни часови.
„Сите мерки се преземени и координираме со локалните органи и Њујоршката Национална гарда за да ја обезбедиме безбедноста на нашите граѓани. Пожарот е сериозен, но ние ќе направиме се што е во наша моќ за да го спречиме неговото натамошно ширење“, изјави Хокул на прес-конференција.
Според извештаите, патиштата на Лонг Ајленд се затворени поради густата магла и чад што се шири над островот. На местото на настанот се наоѓаат хеликоптери кои обезбедуваат воздушна поддршка за гасење на пожарот, додека жителите се на готовс и подготвени за евакуација ако е потребно.
❗️State of Emergency Declared on Long Island Near New York 🇺🇸 – Forest 🔥 Inferno
Flames are spreading at a speed of up to 56 km/h, according to ABC. pic.twitter.com/GcNvsWN1c1
— RT_India (@RT_India_news) March 9, 2025
Пожарот започна во саботата и се прошири со голема брзина
„Првиот пожар избувна во саботата околу 13:00 часот, а потоа се случија уште три пожари во текот на денот“, изјави директорот на округот Сафолк, Ед Ромен, додавајќи дека ситуацијата се влошила поради силните ветрови. Пожарите зафатија делови од природниот резерват во близина на аеродромот Францис С. Габрески, од каде што се евакуирал персоналот, додека пожарникарите продолжуваат да се борат со огнот.
Во меѓувреме, пожарникар беше повреден при гаснењето и пренесен во болница поради изгореници од втор степен на лицето. Според локалните власти, пожарот не се очекува да се прошири кон населените места, кои се оддалечени околу четири километри од резерватот, но ситуацијата е сериозна и бара внимание.
Прогнозата за вечерва: борба со време и ветер
Пожарот се оценува како „повеќедневен настан“, а се очекува дека со зголемените ветрови ситуацијата ќе стане уште потешка за контрола. Иако бројни ресурси се ставени на располагање за гасење на пожарот, вистинската борба се води со природата која, за жал, не попушта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски остро им одговори на Трамп и Путин: Украинците нема да му ја дадат својата земја на окупаторот

Украинскиот претседател, Володимир Зеленски, остро ја отфрли секоја можност за територијални отстапки во замена за мир, нагласувајќи дека суверенитетот на земјата е несомнен. Неговата изјава доаѓа како реакција на најавата за средба меѓу американскиот претседател Доналд Трамп и лидерот на Кремљ Владимир Путин, пишува Правда.
Зеленски беше експлицитен во врска со територијалното прашање.
„Одговорот на украинското територијално прашање е веќе во Уставот на Украина. Никој нема да отстапи од него – и никој нема да може. Украинците нема да му ја дадат својата земја на окупаторот“, рече тој.
Сепак, тој истакна дека Украина е подготвена за вистински решенија што можат да донесат мир, но под јасни услови.
„Но, сите партнери мора да разберат што е достоинствен мир. Оваа војна мора да заврши – и Русија мора да ја заврши. Русија ја започна и ја одолговлекува, игнорирајќи ги сите рокови, и тоа е проблемот, а не нешто друго“, рече Зеленски.
Украинскиот претседател предупреди дека сите договори постигнати без учество на Украина се „мртви одлуки“ што нема да донесат вистински мир. Тој ја нагласи својата подготвеност да соработува со Трамп и другите меѓународни партнери за да се постигне мир што „нема да пропадне поради желбите на Москва“.
Трамп вчера за време на брифингот во Белата куќа рече дека мировниот договор за војната меѓу Русија и Украина треба да вклучува „некои размени на територии“. Средбата меѓу Трамп и Путин е закажана за 15 август во Алјаска, а двете страни го потврдија датумот и локацијата.
Свет
Кина речиси ги престигна САД, станува главен трговски партнер на Германија

Во првата половина од 2025 година, Кина речиси ги престигна САД како главен трговски партнер на Германија, покажаа прелиминарните податоци од Германскиот федерален завод за статистика, бидејќи германскиот извоз во САД се намали под влијание на повисоките царини.
Во периодот од јануари до јуни, вредноста на германската трговија со САД изнесуваше 126,5 милијарди евра, додека вредноста на трговијата со Кина достигна 125 милијарди евра, покажуваат сезонски и календарски прилагодените податоци од Дестатис.
„Иако САД успеаја да ја одбранат својата позиција како најважен трговски партнер на Германија, предноста во однос на германската трговија со Кина е исклучително мала“, рече Винсент Стамер, економист во германската Комерцбанк.
САД ја презедоа улогата на најголем трговски партнер на Германија во 2024 година, симнувајќи ја од тронот Кина, која ја држеше таа позиција осум години по ред. Промената се случи во време кога Берлин се обидуваше да ја намали својата зависност од Кина, наведувајќи ги политичките разлики и обвинувајќи го Пекинг за нефер практики.
Сепак, трговската динамика повторно се промени на почетокот на оваа година кога Доналд Трамп се врати во Белата куќа и повторно воведе царини. Според трговскиот договор постигнат меѓу САД и ЕУ во јули, повеќето производи увезени во САД ќе бидат предмет на царина од 15 проценти.
„Германскиот извоз во САД веројатно ќе продолжи да опаѓа во остатокот од годината, можеби дури и поостро од претходно“, рече Јирген Матес, раководител на меѓународната економска политика во Германскиот економски институт во Келн.
Вредноста на германскиот извоз во САД во првата половина од годината изнесуваше 78,9 милијарди евра, што е намалување за 3,1 процент во однос на истиот период минатата година, покажуваат сезонски и календарски прилагодените податоци.
Свет
„Волстрит џурнал“ го објави планот за мир на Путин

Рускиот претседател, Владимир Путин, наводно му презентирал сеопфатен предлог за прекин на огнот на американскиот претставник Стив Виткоф, нудејќи прекин на војната во замена за источните региони на Украина. Оваа информација, повикувајќи се на европски и украински претставници, беше објавена од „Волстрит џурнал“ и од „Киев индепендент“.
Иако американскиот претседател Доналд Трамп тврдеше дека разговорите меѓу Виткоф и Путин не донеле пресвртница во мировните преговори, тој истиот ден објави дека ќе се сретне со рускиот лидер на 15 август во Алјаска, што ќе биде нивна прва средба лице в лице.
Според европските претставници информирани за разговорот, Путин му рекол на Виткоф дека Русија ќе се согласи на целосен прекин на огнот ако Киев ги повлече своите сили од регионот Донецк. Ова би обезбедило целосна контрола на Москва врз регионите Донецк и Луганск, како и врз Крим.
Европските претставници запознаени со предлогот наводно изразиле сериозни сомнежи, плашејќи се дека Путин ги одложува разговорите за да избегне казнени секундарни санкции што ги објави Трамп. Дополнителна загриженост е неизвесноста околу судбината на делумно окупираните територии во регионите Запорожје и Херсон, бидејќи не е јасно дали фронтовската линија ќе замрзне на своите сегашни позиции или руските сили ќе се повлечат.
„Волстрит џурнал“ наведува дека предлогот на Путин се состои од две фази. Првата би вклучувала повлекување на украинските сили од Донецк и замрзнување на фронтовската линија. Во втората фаза, Трамп и Путин би се согласиле за конечен мировен договор, кој потоа би се преговарал со украинскиот претседател Володимир Зеленски.
Самиот Трамп се чини дека е отворен за таква можност. Тој на прес-конференција рече дека мировниот договор веројатно би вклучувал „некаков вид размена на територија“.
„Гледате територија за која се води борба три и пол години… Значи, ние го разгледуваме тоа, но навистина сакаме да добиеме нешто назад“, рече Трамп. „Некаков вид размена, комплицирано е. Ќе добиеме нешто назад. Ќе размениме нешто. Ќе има некаков вид размена на територија што ќе им користи на двете страни“, додаде тој, без точно да прецизира што мисли под „размена“.
Трамп рече дека Зеленски „ќе мора да биде подготвен да потпише нешто“, без да елаборира за можните услови. Во меѓувреме, Блумберг, исто така, објави дека американските и руските претставници работат на територијален договор насочен кон замрзнување на конфликтот.
Канцеларијата на украинскиот претседател сè уште не коментирала, но украински функционер кој разговарал со Виткоф изјави за „Волстрит џурнал“ дека Киев не е против ниту еден од предлозите, но нагласи дека прекинот на огнот е предуслов за какви било понатамошни чекори. Русија претходно постави максималистички барања, барајќи Украина да се повлече од НАТО и да ги повлече трупите од четири региони.