Свет
(Видео) Големи поплави во Бразил, амазонските реки достигнаа рекордни нивоа
Реките околу бразилската амазонска метропола Манаус достигнаа рекордни нивоа и предизвикаа поплави по обилните дождови.
Рио Негро, која се влева во Амазон во близина на Манаус, го забележа највисокиот водостој од 1902 година, со ниво на водата од 29,98 метри, објави во вторникот мрежата Г1.
Нивото на реката се искачи на 29,97 метри во големата поплава од 2012 година. Нивото означено како „сериозна поплава“, од страна на властите, е поставено на 29 метри, а овој пат се очекува висината на водата да надмине 30 метри.
Погодени се повеќе од 24.000 семејства и 15 области на Манаус, а многумина морале да ги напуштат своите домови, пренесува Г1.
Повеќе од 9.000 метри дрвени мостови, познати како маримба, се изградени во најтешко погодените области.
На фотографии кои ги објавуваат локалните медиуми се гледа како луѓето одат преку нив, а некои се фотографираат покрај надојдената река.
Делови од пристанишната област и историскиот центар на Манаус се под вода. Вода влегла и во продавниците и го поплавила главниот пазар.
Кај некои жители кои останале во своите домови, рибите буквално допловиле во нивните кујни, пренесува Г1.
Поплави ја погодија речиси целата сојузна држава Амазон.
60 од 62 општини пријавиле штети, а погодени се околу 450.000 луѓе. Реката Амазон исто така ги достигна највисоките нивоа на водостој во градовите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.
Свет
Британските разузнавачи: Русите се’ побрзо напредуваат во Украина
По заземањето на источноукраинскиот град Авдијевка, руските трупи напредуваат побрзо во областа, објави денеска британското Министерство за одбрана во своето секојдневно известување.
„Руските копнени сили навлегоа и создадоа тесен коридор на украинска територија со цел да влезат во градот Очеретин, приближно 15 километри северно од центарот на Авдијивка“, пишува на профилот на Министерството за одбрана.
Оцеретин во областа Доњецк имал околу 3.500 жители пред почетокот на војната.
И по заземањето на Авдијивка во средината на февруари, Русите се уште сметаат дека освојувањето на таа област е една од клучните операции, оценува британското Министерство за одбрана.
„Иако претрпуваат големи загуби, многу е веројатно дека руските копнени сили се во позиција континуирано да ги гаѓаат украинските позиции во областа и дека презеле контрола врз неколку помали населби“, додаваат тие.
Украина се брани од руската инвазија повеќе од две години. Британското Министерство за одбрана редовно објавува информации за напредокот на војната. Москва го обвинува Лондон за ширење дезинформации.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.