Мексиканската претседателка Клаудија Шејнбаум на прес-конференција во Мексико Сити ја осуди американската интервенција во Венецуела и соборувањето на претседателот Николас Мадуро, нагласувајќи го цврстиот и историски став на Мексико против мешање во внатрешните работи на други држави.

„Ставот на Мексико за каква било форма на интервенција е цврст, јасен и историски“, изјави Шејнбаум. „Мексико повторно го потврдува принципот кој не е ниту нов ниту подложен на двосмисленост: категорично ја отфрламе интервенцијата во внатрешните работи на други земји.“

Осврнувајќи се на историјата на регионот, таа додаде: „Историјата на Латинска Америка е јасна и убедлива. Интервенцијата никогаш не донела демократија. Само народите самите можат да ја градат својата иднина, да одлучуваат за својот пат, да го остваруваат суверенитетот над своите природни ресурси и слободно да го дефинираат својот облик на владеење“, порача таа.

Шејнбаум истакна дека суверенитетот за Мексико нема алтернатива. „За Мексико – и како што треба да биде за сите Мексиканци – суверенитетот и самоопределувањето на народите не се ниту опција ниту предмет на преговори. Мексико цврсто го застапува ставот дека Америките не ѝ припаѓаат на ниту една доктрина или сила. Американскиот континент им припаѓа на народите на секоја од своите земји“, заклучи таа.

Претседателката се осврна и на обвинувањата на американскиот претседател Доналд Трамп дека Мексико не прави доволно во борбата против картелите за трговија со дрога.

„Мексико соработува со Соединетите Американски Држави, вклучително и од хуманитарни причини, за да се спречи фентанилот и другите дроги да стигнат до неговото население, особено до младите“, изјави Шејнбаум.

„Не сакаме фентанилот или која било дрога да се приближи до ниту едно младо лице – било во Соединетите Американски Држави, во Мексико или каде било на друго место во светот“, додаде таа.

Францускиот претседател Емануел Макрон на состанок на владата изјави дека Франција ниту ја поддржала, ниту ја одобрила методата што Соединетите Американски Држави ја употребиле за да го заробат и приведат венецуелскиот претседател Николас Мадуро, соопшти владината портпаролка.

„Го браниме меѓународното право и слободата на народите“, изјавил францускиот претседател, а на прес-конференција пренесе портпаролката Мод Брежон. Шефот на државата додава дека Николас Мадуро е диктатор и дека неговото заминување е добра вест за Венецуелците.

„Тој му ја одзеде слободата на својот народ и ги украде изборите во 2024 година“, изјавил Макрон.

„Трето, Франција го поддржува народниот суверенитет, а тој народен суверенитет јасно беше изразен во 2024 година“, на претседателските избори на кои, според Париз и дел од меѓународната заедница, победил опозицискиот кандидат Едмундо Гонзалез Урутија, иако победата ја прогласи Мадуро.

„Доколку дојде до транзиција, победникот од 2024 година треба да одигра централна улога“, ја пренесе Брежон изјавата на Макрон.

Во саботата, по приведувањето на венецуелскиот лидер за време на американска воена операција, францускиот претседател повика на „мирна и демократска“ транзиција во Венецуела, наведувајќи дека венецуелскиот народ може само „да се радува“ што се „ослободил од диктатурата на Мадуро“.

Претходно, францускиот министер за надворешни работи Жан-Ноел Баро изјави дека Соединетите Американски Држави со својата операција го „прекршиле“ меѓународното право.

Пораките на претседателот на Републиката и на министерот треба да се анализираат во рамки на „континуиран контекст“, изјави Брежон, прецизирајќи дека Макрон се „консултирал“ со шефот на француската дипломатија и дека ги одобрува неговите изјави.

Поранешниот руски претседател и заменик на Владимир Путин во Советот за безбедност на Руската Федерација, Дмитриј Медведев, изјави дека по неодамнешните настани во Венецуела, може да замисли слична операција за апсење на лидерите на други земји, вклучувајќи го и германскиот канцелар Фридрих Мерц.

Во својот коментар, Медведев го нарече Мерц „неонацист“ и рече дека нема да му биде жал ако Мерц биде киднапиран, објави руската државна новинска агенција ТАСС.

„Киднапирањето на истиот неонацист Мерц може да стане одличен заплет во оваа карневалска серија. Малку што може да изненади тука. Во такво сценарио има елемент на реализам. Има нешто што го прогонува дури и во Германија. Затоа нема да ми биде жал за него. Особено затоа што граѓаните страдаат залудно“, рече Медведев како одговор на прашања од ТАСС.

Изјавата на Медведев доаѓа по драматичните настани во Јужна Америка. Венецуелскиот министер за надворешни работи, Иван Гил Пинто, на 3 јануари изјави дека САД нападнале цивилни и воени објекти во Каракас, нарекувајќи ги постапките на Вашингтон воена агресија. По нападот, во Венецуела беше прогласена вонредна состојба.

Кратко потоа, американскиот претседател Доналд Трамп потврди дека САД извршиле напади врз Венецуела и дека венецуелскиот претседател Николас Мадуро и неговата сопруга се уапсени и изнесени од земјата.