Американскиот претседател Доналд Трамп денес изјави дека украинскиот претседател Зеленски може да присуствува на неговиот самит со рускиот лидер Владимир Путин во Алјаска во петок, но изрази скептицизам дека тоа ќе направи разлика во постигнувањето мировен договор, објави денес телевизиската мрежа Си-Ен-Ен.

„Тој (Зеленски) не беше дел од тоа. Би рекол дека може да оди, но беше на многу состаноци. Знаете, тој е таму три и пол години. Ништо не се случи“, им рече Трамп на новинарите во Белата куќа.

„Ќе имаме состанок со Владимир Путин и на крајот од тој состанок, веројатно во првите две минути, ќе знам точно дали може да се постигне договор или не“, рече Трамп.

На прашањето на новинарите „како ќе го знаe тоа“, Трамп одговори: „Затоа што тоа го правам. Склучувам договори“.

Трамп подоцна додаде дека состанокот меѓу Путин и Зеленски ќе биде неопходен.

„На крајот на краиштата, ќе ги ставам двајцата во иста просторија. Или ќе бидам таму, или нема да бидам таму, и мислам дека ќе се среди“, рече Трамп.

Претседателот на САД рече дека „може да има многу дефиниции“ за добар договор, но исто така, според „Си-ен-ен“, се чини дека ги намали очекувањата пред самитот во петок.

„Се радувам на средбата со Путин за која мислам дека ќе биде добра, но може да биде и лоша“, рече Трамп.

Маж кој исчезна пред повеќе од една недела во огромната дивина на Британска Колумбија, Канада, е пронајден жив откако го напишал зборот „Помош“ на карпа и напишал „СОС“ во калта.

Ендру Барбер (39) преживеал девет дена пиејќи вода од локва и градејќи импровизирано засолниште додека спасувачите не го пронашле, пишува „Би-би-си“.

Барбер исчезнал на 31 јули во близина на езерото Меклис, околу 587 километри северно од Ванкувер, откако неговиот камион се расипал. Девет дена подоцна, на 8 август, хеликоптер на Кралската канадска коњаничка полиција (RCMP) го забележал неговото возило на шумски пат, што значително ја стеснило областа за пребарување и на крајот довело до негово спасување.

Полициски хеликоптер набрзо го забележал Барбер во близина на неговото импровизирано засолниште. Пораката „ПОМОШ“ што ја напишал на каменот го привлекла нивното внимание. Тој бил тешко дехидриран и имал повреда на ногата, но сега е „прилично добро“.

„По повеќе од една недела во дивината, тој беше пронајден жив за време на воздушното пребарување денес“, објави локалната волонтерска група за пребарување и спасување Quesnel Search & Rescue на Фејсбук. „Овој исход е резултат на безброј часови на земја и во воздух, користејќи секој ресурс и технологија што ни е достапна“.

Спасувачкиот тим, исто така, сподели фотографија од засолништето што Барбер го изградил од стапчиња и кал, потпрен на карпа на која напишал порака за помош. По спасувањето, тој бил однесен во болница, каде што бил лекуван и отпуштен.

Барбер јадел што можел да најде додека бил во шумата. „Тој буквално сркал валкана вода од езерцето за да остане хидриран“, рече тој. „Човечкото тело може да издржи долго време без храна, но ситуацијата е поинаква со водата.“

Боб Цимерман, претседател на „Кеснел Рискју“, изјави за CBC News дека не е сигурен дали Барбер „ќе издржеше уште 24 часа ако не го пронајдовме ние“.

На летот од Сан Франциско за Канкун, во Мексико, минатата недела се случила необична сцена кога еден од патниците запалил џоинт.

Потоа следел потег на пилотот што сите патници добро ќе го запомнат, пренесува The New York Post.

Пилотот на компанијата „United Airlines“ одбил да полета, што предизвикало речиси четиричасовно доцнење.

Во вирална објава на Reddit, еден патник од летот UA1679 напишал дека несреќното патување прво било „одложено поради технички проблеми“, а потоа повторно откако „некој пушел марихуана во тоалетот“.

„Го исфрлија од авионот, а потоа седевме внатре околу 40 минути додека екипажот не одлучи што ќе прави“, напишал патникот. „Екипажот беше загрижен дека можеби биле изложени на чад од марихуана, па сите излеговме надвор и чекавме нов екипаж.“

Пилотот, наводно, бил загрижен дека изложеноста на чад од марихуана може да доведе до тоа да не помине на случаен тест за дрога.

„Имам уште 30 години кариера, не сакам да ризикувам да ме тестираат за дрога кога ќе стигнам во Хјустон“, им рекол капетанот на патниците.

Надежите на патниците за мирно патување буквално „отишле во чад“.

„Во моментот седам на терминалот на аеродромот SFO, нема ни трага од нов екипаж“, напишал авторот на објавата на Reddit.

Првичното полетување било закажано за 8:50, а новото проценето време било 12:30. Патниците добиле ваучер за оброк од 15 долари и ужинка на гејтот.

Експерти за авионски сообраќај оцениле дека реакцијата на пилотот била малку претерна, но целосно разбирлива.

„Веројатноста некој да биде позитивен на тест поради пасивно вдишување марихуана во добро проветрен авион е смешно мала“, напишал Гери Леф, соработник на порталот View From the Wing.

„Сепак, го разбирам ирационалниот страв поради регулативата на FAA за тестирање на дроги и политиката на нулта толеранција на авиокомпаниите, кои казнуваат дури и ненамерна изложеност ако тестот биде позитивен. Практично, било кое детектибилно ниво на метаболити на марихуана во урината се смета за пад на тестот, без разлика на причината“, додал тој.

Леф предупредил дека позитивен тест би можел да ја заврши кариерата на пилотот поради „долготрајна истрага и губење на лиценцата“, а пилотот во таков случај не би можел да очекува заштита од синдикатот без докази за „пасивна изложеност“.

Корисниците на Reddit жестоко го нападнале неодговорниот патник.

„Мислам дека, ако се случи вакво нешто, таа личност треба да биде казнета со тоа што ќе ја плати цената на картата за секој патник“, напишал друг.

„Треба да постои автоматска доживотна забрана за летање на сите авиокомпании“, изјавил трет.

Многумина изразиле разбирање за одлуката на пилотот да не ризикува.