Европа
(Видео) Зеленски: Подготвен сум да заминам во замена за членство во НАТО

Володомир Зеленски рече дека ќе биде подготвен да замине во замена за членството на Украина во НАТО, навестувајќи дека ќе се повлече од функцијата претседател доколку неговата земја може да се приклучи на воената алијанса.
Тој, исто така, навести дека е подготвен да потпише договор за минерали со САД, кој беше ставен на мирување по неговиот тензичен состанок со Доналд Трамп во Овалната соба во петокот.
Володимир Зеленски синоќа разговараше со новинарите по разговорите со другите светски лидери на самитот во Лондон, кој го организираше британскиот премиер Кир Стармер, кој посочи дека коалицијата на европските сојузници може да ја зајакне одбраната на Украина и да гарантира мир.
.@SkyYaldaHakim asked the Ukrainian president how he's feeling about the prospect of elections in his country.
He suggests he will resign if Ukraine is given membership to NATO.https://t.co/D1Is4GKP0L pic.twitter.com/fmzsQnwBC6
— Sky News (@SkyNews) March 3, 2025
Запрашан од „Скај Њуз“ за претходните коментари дека може да поднесе оставка доколку неговата земја стане членка на НАТО, тој одговори: „Можам да заминам поради НАТО“.
Украинскиот претседател додаде: „Реков дека заминувам во замена за членство во НАТО, тоа значи дека ја исполнив мојата мисија. НАТО значи дека ја исполнив мојата мисија“.
Но, тој додаде: „Нема да биде лесно да ме заменат, бидејќи не е доволно само да се одржат изборите. Тие би морале да ми забранат да учествувам. А тоа би било малку потешко“.
Додека војната меѓу Русија и Украина трае веќе три години, Володимир Зеленски ги отфрли повиците на американските претставници да поднесе оставка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.