Израел се очекува утре да ослободи вкупно 602 палестински затвореници од израелските затвори откога палестинската милитантна група Хамас ослободи шест израелски заложници од Појасот Газа, соопшти денеска Канцеларијата за медиуми на палестинските затвореници (АСРА).

Во соопштението се наведува дека утре ќе бидат ослободени 50 палестински затвореници, кои беа осудени на доживотен затвор, 60 осудени на долги казни, 47, кои беа повторно уапсени откога беа ослободени во рамките на размената на затвореници во 2011 година, како и преостанатите 445 затвореници од Појасот Газа, кои беа уапсени по нападот на Хамас на југот на Израел на 7 октомври 2023 година, јави „Ал џезира“, пренесува „Танјуг“.

Размената на заложниците за палестинските затвореници се врши врз основа на трифазен договор за прекин на огнот меѓу Израел и Хамас во Појасот Газа, кој стапи во сила на 19 јануари.

Планирано е во првата фаза да бидат ослободени вкупно 33 заложници.

Фридрих Мерц, кандидатот за иден германски канцелар, денеска изјави дека Европа мора да биде подготвена да се брани без Соединетите Американски Држави.

„Мораме да се подготвиме за можноста американскиот претседател Доналд Трамп веќе безусловно да ја поддржува заемната одбранбена обврска на НАТО“, рече Мерц, пренесе „Политико“. Мерц рече дека, според него, клучно е Европејците да вложат најголеми можни напори за да се уверат дека се способни барем сами да го бранат европскиот континент. Во последните денови се чини дека Трамп сѐ повеќе се согласува со рускиот претседател Владимир Путин обвинувајќи ја Украина, а не Кремљ, за почетокот на војната, која почна со рускиот напад во 2022 година, вели „Политико“.

Тие коментари следуваа по појавувањето на американскиот потпретседател Џеј ди Венс на Минхенската безбедносна конференција, каде што тој ги прикажа главните европски партии, а не Русија, како најголема закана за безбедноста на Европа.

Европските лидери оттогаш станаа сè позагрижени дека повеќе не може да се потпрат на клаузулата за колективна одбрана, која ја обезбеди основата за безбедноста на Европа од Студената војна. Лидерот на централнодесничарската Христијанско-демократска унија (ЦДУ) и на врвот на анкетите пред гласањето во недела рече дека Европа треба колективно да се подготви за можноста администрацијата на Трамп да не го поддржи членот 5 од НАТО, кој ги обврзува членките на алијансата на колективна одбрана.

На прашањето дали верува оти Трамп ќе ја поддржи клаузулата, Мерц рече дека не би се обложувал сѐ што има на кое било прашање што ќе му биде поставено, а секако не на тоа, пренесува „Танјуг“.

На прашањето дали Германија треба да бара заштита под францускиот нуклеарен чадор, Мерц призна дека францускиот претседател Емануел Макрон постојано му давал таква понуда на Берлин, но дека претходните германски влади го оставиле прашањето неодговорено.

Белорускиот претседател Александар Лукашенко изјави дека не ја исклучува можноста САД да се обидат да предизвикаат политички конфликт меѓу Русија и Кина за време на преговорите за Украина.

„Не знаеме што сакаат САД. Ова го велам затоа што сум апсолутно навлезен во овие прашања. Не знаеме што ќе бараат од Русите за крај на војната и слично. Ми се чини дека сега ќе се обидат да ги свртат Русите против Кинезите“, рече Лукашенко, според неговата прес-служба.

Лукашенко порача дека Русите не смее да го дозволат тоа, пренесе „Интерфакс“.

Белорускиот претседател оцени дека на Белорусите ќе им биде тешко да се натпреваруваат економски со американските и европските компании доколку се постигне договор за нивно враќање на рускиот пазар, но посочи дека сите имаат потреба од прехранбени производи.

Кина изрази поддршка за иницијативата на американскиот претседател Доналд Трамп за постигнување договор со Русија за ставање крај на војната во Украина за време на состанокот на Г20 во Јужна Африка, а сојузниците на САД застанаа на страната на украинскиот претседател Володимир Зеленски, објави „Ројтерс“.