Свет
(Видео) Иран ја засилува репресијата врз граѓаните: Егзекуции, апсења и враќање на моралната полиција

Со погубување на осуденици, апсење дисиденти и враќање на полициските патроли за спроведување на задолжителните правила за хиџаб, Иран ја засилува репресијата додека се зголемуваат тензиите со неговиот најголем непријател Израел, велат активистите.
Иранците во Исламската Република се соочуваат со зголемена репресија откако избија протести низ целата земја по смртта во септември 2022 година во притвор на 22-годишната Махса Амини, која беше уапсена поради наводно кршење на правилата за облекување на жените.
Но, задушувањето на опозицијата влезе во нова фаза бидејќи се зголемија стравувањата од регионален конфликт, откако Израел го нападна Иран во петокот.
Активистите забележаа дека белите комбиња на „моралната полиција“ се вратија на градските плоштади низ целата земја, грабнувајќи ги жените за кои сметаат дека го прекршиле правилото за задолжителен хиџаб кое е на сила од Исламската револуција во 1979 година.
Шефот на полицијата во Техеран Абас Али Мохамадијан јавно ги објави најновите мерки на 13 април, а локалните медиуми објавија дека тие биле наречени „Нур“ („светлина“ на персиски јазик).
Неколку видеа објавени на социјалните мрежи, со клучни зборови „jang aliyeh zanan“ („војна против жените“), прикажуваат жени како се туркаат во комбиња од полицајци придружувани од полицајки кои носат чадор – исламска облека за жени.
„Исламската Република ги претвори улиците во бојно поле против жените и младите“, напиша добитничката на Нобеловата награда за мир и затворена активистка за човекови права Наргес Мохамади од затворот Евин во Техеран, како што нејзините поддржувачи објавија на социјалните мрежи.
Едно видео, снимено во близина на станицата на метрото во северен Техеран, прикажува жена како паѓа на земја откако полицијата ја привела, кажувајќи им на случајните минувачи кои се обиделе да ѝ помогнат дека ѝ бил одземен телефонот.
🚨In the wake of intensified crackdowns on the hijab in Iran, multiple women have been subjected to harsh arrests and beatings. In a distressing incident captured on video, a young woman appears to suffer a nervous breakdown or panic attack following a heated confrontation with… pic.twitter.com/kG0LG0Tvhj
— Bonjour (@imromec) April 17, 2024
Во друго видео, се слуша звукот на, како што изгледа, полицијата која користи електрични шокови против жени набиени во комбе.
„Во услови на зголемен домашен отпор и меѓународно внимание фокусирано на регионалните тензии, Исламската Република ја користи можноста да ја засили својата кампања на репресија против опозицијата“, рече Хади Гаеми, директор на Центарот за човекови права во Иран со седиште во Њујорк.
„Без силен меѓународен одговор, Исламската Република ќе биде охрабрена да го зголеми насилството врз жените и нејзините срамни прекршувања на човековите права“, рече Гаеми.
Стотици луѓе се убиени, според групите за човекови права, а илјадници уапсени, според Обединетите нации, во задушувањето на протестите во 2022 година, кои беа најголемиот предизвик за Исламската Република.
Меѓу уапсените во последните денови е и Аида Шахкарами, сестра на 16-годишната Ника Шахкарами, која загина за време на задушувањето на протестите во 2022 година, напиша нејзината мајка Насрин на социјалните мрежи.
Аида е приведена „затоа што не носела задолжителен хиџаб“, напиша Насрин на социјалните мрежи.
Ника Шахкарами беше пронајдена мртва за време на протестите, а некои членови на семејството ги обвинија безбедносните сили за нејзиното убиство.
Дина Галибаф, новинарка и студентка на Универзитетот Шахид Бехешти во Техеран, беше уапсена откако ги обвини безбедносните сили на социјалните мрежи за врзување со лисици и сексуално вознемирување за време на претходното апсење на станицата на метрото, според норвешката група за права Hengaw.
Егзекуциите, за кои активистите велат дека Техеран ги користи за тероризирање на општеството, исто така продолжија, со најмалку 110 егзекутирани луѓе оваа година, според норвешката група за човекови права во Иран, ИЧП.
Меѓу егзекутираните во последните денови се и брачната двојка 29-годишниот Есмаил Хасаниани и неговата 19-годишна сопруга Марјан Хаџизадех, кои беа осудени на смрт поради обвиненија поврзани со дрога во заедничко судење. и тие беа обесени во затворот Занјан на 11 април, според ИЧП.
„Без сомнение, режимот ќе ја искористи оваа можност да ја заостри контролата врз земјата“, рече шефот на ИЧП Махмуд Амири-Могадам.
„Тие сè уште не успеале да ја воспостават контролата што ја имаа пред септември 2022 година. Сега можеби ќе имаат можност да го сторат тоа доколку целото меѓународно внимание е насочено кон ескалацијата на тензиите со Израел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан ја нарече Парадата на гордоста одвратна и обвини дека Брисел стои зад неа

Премиерот на Унгарија, Виктор Орбан, остро ја осуди Парадата на гордоста што вчера се одржа во Будимпешта, нарекувајќи ја „одвратна и срамна“. Во објава до своите поддржувачи, тој го обвини Брисел дека стои зад организацијата на настанот, кој, според него, прераснал во антивладин протест.
„Брисел издаде наредба дека треба да има Парада во Будимпешта. Нивните марионетски политичари ја извршија наредбата“, напиша Орбан во порака до затворената онлајн група на своите приврзаници.
Орбан порача дека парадата е јасен показател за тоа што би се случувало во Унгарија доколку неговата партија ФИДЕС не беше на власт. Тој тврди дека, иако на Парадата имало многу луѓе, тие не можат да се споредат со 3,7 милиони учесници на референдумот за родова еднаквост во 2022 година.
„Од вчера, знаеме уште повеќе со сигурност дека на овие луѓе не треба да им се дозволи да го преземат кормилото на Унгарија. И ние нема да им дозволиме“, истакна Орбан.
Премиерот го осуди и визуелниот дел од Парадата, коментирајќи дека на сцената имало „шоу на ‘драг’ кралици“, „мажи во високи потпетици“ и „брошури за хормонска терапија“. Според него, тоа не е прашање на гордост, туку на срам.
Во своето обраќање Орбан ја поврза Парадата и со други горливи теми како миграцијата, намалувањето на комуналните трошоци и ставовите кон Украина и војната.
На крајот, тој испрати порака: „Се бориме за вистината! Борба против лагите!“
Регион
Приведени 77 лица по протестите, 48 полицајци повредени, Вучиќ вети дека нема помилување за насилство

Претседателот на Србија, Александар Вучиќ, денеска порача дека нема да потпише никакво помилување или аболиција за оние кои учествувале во насилствата по студентските протести во Белград. Тој најави дека ќе следуваат нови апсења, бидејќи, како што рече, сѐ уште се врши идентификација на осомничените.
„Ова не е крај, лицата се идентификуваат, на тоа работи БИА“, изјави Вучиќ, додавајќи дека Србија не може да се победи со насилство: „Неа не можете да ја победите со насилства, таа не запре и нема да застане“.
Тој оцени дека повиците на крајот од протестот, особено изјавата „имате зелено светло“, претставуваат директен повик за граѓански конфликти и напади врз полицијата.
„Ги повикувам надлежните обвинителства да си ја работат својата работа, да не се преправаат дека се неспособни и наивни. Доаѓа време на одговорност, почитувани граѓани“, додаде Вучиќ.
На заедничката прес-конференција, министерот за внатрешни работи Ивица Дачиќ информираше дека по протестот се приведени 77 лица, од кои 38 се задржани, а меѓу нив има и едно малолетно лице.
„Против 35 лица ќе бидат поднесени кривични пријави, а против 26 лица ќе се води прекршочна постапка“, изјави Дачиќ, додавајќи дека се повредени 48 полицајци, од кои еден со тешки повреди на главата, а уништена е и значителна количина заштитна опрема.
Премиерот на Србија, Ѓуро Мацут, остро го осуди насилството и побара сите страни да се воздржат од дополнително разгорување на тензиите.
„Србија е демократско општество во кое мислењата мора да се изразуваат на мирен и цивилизиран начин, без загрозување на безбедноста на граѓаните и јавниот ред и мир“, изјави Мацут.
Тој им се заблагодари на припадниците на полицијата и безбедносните служби за брзата и професионална интервенција.
Своја реакција имаше и претседателката на српското Собрание, Ана Брнабиќ, која обвини дека студентите на протестот упатиле повик за граѓанска војна.
„Блокаторите не го завршија својот митинг на Видовден со зборовите ‘Да живее Србија’, туку со морничав повик за убивање на Србија – монструозен и отворен повик за граѓанска војна. Памти Србијо“, напиша таа на мрежата Икс.
Блокадери свој скуп на Видовдан нису завршили речима – Живела Србија. Завршили су језивим позивом на убиство Србије, монструозним и отвореним позивом на грађански рат. Памти Србијо. pic.twitter.com/IiOiU3A0Kl
— Ana Brnabic (@anabrnabic) June 28, 2025
Свет
Италијанец снимал деца на Истра со камери скриени во пенкала

Истарската полиција заврши кривична истрага против 67-годишен италијански државјанин, осомничен за сериозно кривично дело поврзано со злоупотреба на техничка опрема и нарушување на приватноста на малолетни лица.
Според соопштението на Полициската управа на Истра, инцидентот се случил на 26 јуни, околу 15 часот, кога гостин во туристички објект забележал лице како недозволено снима малолетници. Лицето било задржано до пристигнување на полициски службеници, кои веднаш постапиле согласно законските надлежности.
По судска наредба, биле извршени претреси на неколку уреди со скриени камери, вклучувајќи техничка опрема со интегрирани снимачки механизми, мемориски уреди, мобилен телефон и возилото на осомничениот. Полициската управа информира дека се пронајдени материјали кои ќе бидат предмет на понатамошна истрага.
Осомничениот е уапсен и вечерта на 27 јуни предаден во притворската единица на Полициската управа на Истра со поднесена кривична пријава.