Свет
(Видео) Камерите ги снимија последните моменти од суперјахтата во која беа милијардерите: набргу потона на дното

Безбедносните камери ги снимија последните моменти на суперјахта што потона поради силните ветрови крај Сицилија во понеделникот. Меѓу другото, на јахтата бил и милијардерот Мајк Линч.
Очевидци тврдат дека суперјахтата потонала за не повеќе од 60 секунди.
„Јасно можеше да се види што се случува. За тој брод немаше излез, исчезна за многу кратко време“, изјавиле очевидци за агенцијата „Анса“.
На луксузната јахта Bayesian, долга 56 метри и вредна милиони евра, во моментот на потонувањето имало 10 члена на екипажот и 12 гости, од кои 15 биле спасени.
Италијанската крајбрежна стража вчера соопшти дека телото на готвачот Рекалдо Томас е извлечено од водата.
Сѐ уште се трага по шест лица, а меѓу нив е и сопственикот на јахтата, британскиот тајкун Мајк Линч и ќерка му Хана (18). Сопругата на Личн, Анѓела Бакареш, беше спасена.
Потрагата продолжува по Џонатан Блумер, претседателот на Morgan Stanley International, Крис Морвило, адвокат во големата фирма „Клифорд Ченс“, и нивните сопруги – Џуди Блумер и Нед Морвило.
Спасувачките тимови непрекинато трагаат веќе два дена, а во потрагата се вклучени и припадници на крајбрежната стража, пожарникари, специјални нуркачи, како и пилоти што летаат со хеликоптери над областа.
Ник Слоун, инженерот што ја водеше операцијата за спасување на потонатиот брод „Коста конкордија“ во 2013 година, вчера изјави дека нуркачите што трагаат по преживеани влегле во критичните 24 часа и дека доколку некој останал жив во воздушните џебови внатре во бродот, има сѐ помалку време за негово извлекување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.