Свет
(Видео) Кина: Најдовме геометриски форми под површината на Марс
Кинескиот ровер „Журонг“ има радарски систем, кој може да навлезе под површината на Марс и подобро да погледне во неговата скриена подземна област. Научниците објавија нови резултати од скенирањето на местото на кое слета „Журонг“ и рекоа дека на длабочина од 35 метри забележале неправилни полигонални форми.
Објектите се со големина од неколку сантиметри до неколку десетици метри. Експертите веруваат дека закопаните геометриски објекти се, всушност, формации создадени за време на циклусот на замрзнување и одмрзнување на Марс пред неколку милијарди години, но дека би можеле да бидат и од вулканско потекло, создадени по ладењето на тековите на лавата.

Роверот „Журонг“ слета на Марс на 15 мај 2021 година, со што Кина стана втората земја во историјата, која успешно слетала ровер на Црвената планета. „Журонг“, именуван по кинескиот бог на огнот, по слетувањето, ја истражи околината, ја проучуваше топографијата на Марс, направи мерења со својот радар и дури испрати селфи на кое позира со својот лендер.
Требаше да биде функционален три месеци, но успешно работеше нешто повеќе од една година, а потоа влезе во планирана хибернација. Ништо не се слушна од него од мај 2022 година до сега кога беа објавени новите резултати од скенирањето, пишува „Јуниверс тудеј“.
Утопија Планитија е голема рамнина во рамките на Утопија, најголемиот познат слив на Марс и во Сончевиот систем. Се проценува дека има дијаметар од 3.300 километри. Кинескиот ровер за време на својата мисија патувал 1.921 метар.
Кинеските научници известуваат дека радарот на роверот открил шеснаесет полигонални формации на растојание од околу 1,2 километар, што покажува дека овој тип на подземен терен може да биде широко распространет под Утопија Планитија.
Пронајдените геометриски форми, веројатно, биле формирани пред 3,7 до 2,9 милијарди години за време на доцната хеспериска и раната амазонска епоха на Марс, при што теренот последователно бил покриен со подоцнежни геолошки процеси. Иако на површината на Марс веќе се забележани полигонални геолошки формации, ова е прв показател дека тие се наоѓаат и во подземјето на Црвената планета.

Претходните студии на радарските податоци на „Журонг“ покажаа дека повеќекратните поплави во иста временска рамка создале неколку слоеви под површината на Утопија Планитија. Затоа научниците веруваат дека големите климатски промени на Марс се одговорни за овие необични форми.
„Контрастот на карактеристиките над и под длабочина од 35 метри укажува на значајна трансформација на активноста на водата или термалните услови, што имплицира дека поголеми климатски промени се случиле на ниски до средни географски широчини“, објаснуваат научниците.
Истражувањето наречено „Закопан палео-полигонален терен откриен под Утопија Планитија на Марс од радарот ‘Журонг‘“ беше објавено во списанието „Нејчр“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хрватска наскоро целосно ќе ги забрани мобилните телефони во училиштата
Наскоро се очекува нова регулатива, со која ќе се воведе забрана за употреба на мобилни телефони во основните училишта, и за време на часовите и за време на одморите.
Тотална забрана во основните училишта, олеснети правила во средните училишта
„Можете многу наскоро да очекувате регулатива во училиштата што дефинитивно ќе ја забрани употребата на мобилни телефони во основните училишта, и за време на часовите и надвор од нив“, изјави Фукс за RTL.
Тој објасни дека забраната нема да може да се спроведува толку строго во средните училишта. „Секако ќе биде забранета за време на часовите, освен ако професорите не го користат уредот за наставни цели, но за време на одморите не е толку едноставно“, додаде тој.
Министерот ја спомена и можноста за законско решение што би го ограничило користењето на мобилни телефони од страна на малолетници, по примерот на забраните за алкохол и цигари, но нагласи дека таков чекор бара поширок општествен консензус. „Правните решенија се релативно едноставни за пропишување, но ни требаат повеќе дискусии и договори“, рече тој.
Проблемот не се само уредите, туку и социјалните мрежи
Зборувајќи за сопственото искуство, Фукс призна дека не е лесно да се постават граници дури ни во неговото семејство. „Имам внуци тинејџери и, за жал, тие поминуваат премногу време на своите телефони. Се обидувам да влијаам на нивните родители, но ситуациите се многу различни; некои имаат поголема контрола, некои помалку.“
Тој истакна дека проблемот не лежи само во уредите, туку и во социјалните мрежи, каде што е клучната улога на родителите. „Постојат ограничувања во возраста, на пример, TikTok е веќе 13 години, но прашањето е кој го контролира. Ако родителите не учествуваат, тешко е да се спроведе нешто“, рече тој, предупредувајќи за загрозување на менталното здравје на децата.
Нови правила и за оправдувањата
Покрај забраната на мобилните телефони, министерот најави и промени поврзани со оправдувањата. Поради ненадејното зголемување на оправданите отсуства, се разгледува ограничувањето на родителските изговори на два до три пати по полугодие.
„Забележавме огромен број часови со отсуство, особено за време на најавените тестови. Многу е веројатно дека ќе се воведе комбинирана варијанта, но сè уште ги разговараме деталите со Министерството за здравство“, објасни Фукс.
Свет
По 2.000 долари на сите американски граѓани, им ветува Трамп
Американскиот претседател Доналд Трамп изјави дека владата ќе им исплати на повеќето граѓани „дивиденда“ од најмалку 2.000 долари по лице, објави тој денеска на својата платформа Truth Social.
Тој напиша дека само граѓани со високи приходи ќе бидат исклучени од оваа мерка, без да наведе точно кои се тие нивоа на приходи или кога ќе почне исплатата, пренесе ДПА.
Во својата објава, Трамп ја пофали американската економија, наведувајќи дека царините ќе донесат „трилиони долари“ кои наскоро ќе можат да се искористат за намалување на огромниот државен долг.
– Луѓето кои се против царините се будали! напиша тој, додавајќи дека Соединетите Држави се „најбогатата и најпочитуваната земја во светот“, со „речиси никаква инфлација и рекорден берзански индекс. „
Американскиот претседател и претходно ја спомена идејата за исплата на пари на граѓаните, но тогаш не ја реализираше.
Свет
Русија прогласија воздушна тревога и пријавија прекини на струја и греење поради украински напади со дронови и ракети
Неколку региони во Русија прогласија воздушна тревога и пријавија прекини на струја и греење поради украински напади со дронови и ракети.
Во Белгородската област, која се граничи со Украина на запад, гувернерот Вјачеслав Гладков денеска на Телеграм напиша дека еден напад ја оштетил енергетската и грејната инфраструктура на градот. Тој додаде дека се вршат поправки, а пријавени се и оштетувања на објекти и возила.
Во соседната Воронежка област, која се граничи со Белгород на исток, гувернерот Александар Гусев исто така пријави ракетни и напади со дронови, наведувајќи дека противвоздушната одбрана пресретнала дел од дроновите.
Пожар во едно општинска постројка бил брзо изгаснат, иако непотврдени извештаи на социјалните мрежи тврдат дека била погодена градската комбинирана термоелектрана.
Гусев предупреди дека делови од Воронеж би можеле привремено да останат без струја и да имаат прекини во греењето. Тој исто така пријави оштетувања на објекти на една градежна компанија и неколку возила. На жителите им беше препорачано да се засолнат во бункери како мерка на претпазливост.
Во градот Таганрог во Ростовската област исто така имаше извештаи на социјалните мрежи за експлозии и прекини на електрична енергија.
Во меѓувреме, Украина соопшти дека претрпела десетици напади, нарекувајќи ги едни од најжестоките руски ракетни и напади со дронови врз нејзината енергетска инфраструктура од почетокот на војната.
Од 69 напади со дронови, 34 биле одбиени, според украинските власти. Ден претходно, Русија изврши напади со 458 дронови, 45 ракети и крстосувачки проектили.
Народот на Украина и понатаму е сериозно погоден од прекини на струја, греење и топла вода, пренесе ДПА.

