Свет
Кинеската армија го опколи Тајван, почнаа воените вежби: „Ова е казна за сепаратистичките потези“

Источната команда на Народноослободителната војска на Кина соопшти дека почнала заеднички воени вежби во кои учествуваат армијата, морнарицата, воздушните сили и ракетните сили.
Кина почна нови дводневни воени вежби околу Тајван, со цел, како што рекоа, „да ги казнат за сепаратистичките потези“. Сето ова го почнаа неколку дена по заклетвата на претседателот. Вежбите, кои почнаа рано во четвртокот и ќе го опкружат Тајван, се првиот вистински тест за Лаи Чинг во справувањето со екстремно лошите односи со Кина откога тој ја презеде функцијата нов претседател во понеделникот. Кинеската влада тврди дека Тајван е дел од нејзината територија и покрај тоа што никогаш не го контролирала, пренесува Си-ен-ен.
Полковникот Ли Кси, портпарол на командата, ги нарече вежбите „силна казна за сепаратистичките акти на силите за независност на Тајван и сериозно предупредување против мешањето и провокациите на странските сили“.
Лаи, кој го почна својот трет последователен мандат, Пекинг го карактеризира како опасен сепаратист поради застапувањето на суверенитетот и посебниот идентитет на Тајван. Пекинг го осуди инаугуративниот говор на Лаи за време на кој тој ја повика Кина да престане да го заплашува Тајван.
Во соопштението во четвртокот тајванското Министерство за одбрана рече дека испратило поморски, воздушни и копнени сили за да одговорат на кинеските вежби. Тие изразија жалење за „ваквите ирационални провокации и акции, кои го поткопуваат регионалниот мир и стабилност“, пренесува „24 часа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел изрази сочувство три дена по смртта на папата

Израелската влада синоќа изрази сочувство за смртта на папата Франциско, три дена откако почина 88-годишниот поглавар на Католичката црква.
„Државата Израел изразува најдлабоко сочувство до Католичката црква и католичката заедница во светот поради смртта на папата Франциско“, објави канцеларијата на премиерот Бенјамин Нетанјаху.
Односите меѓу Израел и Светата столица значително се влошија од почетокот на израелската офанзива врз Газа. Папата Франциско честопати ги критикуваше постапките на Израел во палестинската енклава, каде што живеат околу илјада христијани.
Израелската влада претходно изрази сочувство за смртта на Франциско во понеделникот, но ја избриша објавата по неколку часа.
За разлика од другите земји кои ќе бидат претставени од највисоките функционери на погребот на папата в сабота, Израел испраќа само амбасадор, објави „Тајмс оф Израел“.
Свет
Зеленски: Русија со ракети од Северна Кореја го нападна Киев

Украинскиот претседател Володимир Зеленски рече дека прелиминарните информации укажуваат дека балистичка ракета произведена во Северна Кореја била употребена во рускиот воздушен напад врз Киев што беше извршен завчера, а во која загинаа најмалку 12 лица.
„Според прелиминарните информации, Русите користеле балистичка ракета произведена во Северна Кореја. Нашите специјални служби ги проверуваат сите детали“, рече тој.
Доколку се потврди дека ракетата е произведена во Северна Кореја, тоа, според него, ќе биде уште еден доказ за криминалната природа на сојузот меѓу Русија и Пјонгјанг.
„Тие убиваат луѓе и уништуваат животи заедно – тоа е единственото значење на нивната соработка. Русија континуирано користи такво оружје – ракети, артилерија. За возврат, Пјонгјанг добива можност да го усоврши своето оружје во реални воени услови“, рече Зеленски.
Тој повика на „вистински притисок“ врз Русија да ги запре нападите врз Украина.
„Дури и покрај меѓународните дипломатски напори за завршување на војната, Русија продолжува да убива цивили“, рече Зеленски. „Тоа значи дека Путин не се плаши од ништo“, додаде тој.
Нагласи дека мора да има целосно и безусловно запирање на нападите и дека Русија мора да се согласи со тоа.
„Оваа војна мора праведно да заврши. А за навистина да ја гарантираме безбедноста на нашите луѓе, мора дополнително да го зајакнеме нашиот противвоздушен штит“, рече украинскиот претседател.
„Државите соработници кои ги ценат луѓето и животот мора да ги спречат убиствените сојузи“, додаде тој.
Свет
Руте: Русија е долгорочна закана за алијансата

Генералниот секретар на НАТО, Марк Руте, вчера, по разговорите со американскиот претседател Доналд Трамп, изјави дека членовите се согласуваат дека Русија е долгорочна закана за алијансата, пренесува ДПА.
„Сите се согласуваме во НАТО дека Русија е долгорочна закана за територијата на НАТО – за целата евроатлантска област“, рече Руте по состанокот во Белата куќа.
На прашањето за можноста за договор меѓу Русија и Украина, поранешниот холандски премиер рече дека во моментов „нешто е на маса“, но дека топката сега е на теренот на Русија. Генералниот секретар на НАТО е уверен дека САД ќе ги предводат напорите за завршување на војната во Украина.
„Не гледам ситуација во која САД ќе си заминат. Гледам ситуација во која, под водство на претседателот Трамп, ова може да се доведе до позитивен крај, а тоа е многу важно“, рече Руте. Лидерите на НАТО ќе се состанат во Хаг кон крајот на јуни.