Свет
(Видео) Маж во САД уби 6-годишно момче бидејќи е муслиман, било избодено 26 пати

Маж во САД е обвинет за убиство и други злосторства од омраза откога избол 6-годишно момче и 32-годишна жена само затоа што биле од муслиманска вероисповед. Џозеф Чуба (71) со нож нападнал две лица во Плејнфилд, Илиноис, при што усмртил малолетник и повредил една жена.
Полицијата соопшти дека нападот бил поттикнат од тековниот конфликт меѓу Хамас и Израел. Американскиот претседател Џо Бајден рече дека му се гади од овој напад врз мајка и син, кои биле Палестинци-Американци.
„За ваков ужасен чин на омраза нема место во Америка. Тоа е спротивно на нашите основни вредности. Како Американци ние мора да ја отфрлиме исламофобијата и сите форми на нетолеранција и омраза“, рече Бајден.
Чуба е обвинет за убиство од прв степен, обид за убиство од прв степен, злосторства од омраза и тежок напад. Во саботата наутро полицијата добила повик од жена која рекла дека била нападната од сопственикот на станот во кој живеела, во Плејнфилд, и дека истрчала во бањата.
Кога полицајците пристигнале на местото на настанот, затекнале жена и момче со повеќе убодни рани во градниот кош, торзото и горните екстремитети. Двете жртви биле пренесени во болница, но момчето починало. Подоцна било утврдено дека детето било избодено 26 пати. Мајката има сериозни повреди, но лекарите очекуваат таа да преживее, пишува Би-би-си.
Полицијата го пронашла Чуба како седи на земјата во близина на патеката на станбената зграда, се вели во соопштението.
„Детективите утврдија дека двете жртви во овој брутален напад биле цел на осомничениот бидејќи биле муслимани. Нападот бил поттикнат од конфликт во кој биле вклучени Хамас и Израел“, додаваат од канцеларијата на шерифот.
Убиеното момче Вадеа ал-Фајоме е родено во САД, а мајка му Ханаан Шахин, по потекло од Западниот Брег, дошла во земјата пред 12 години. Вадеа имаше роденден пред неколку недели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.