Свет
(Видео) Маж од САД ја претепал до смрт својата ќерка, нејзиното тело со месеци го криел во торба
Адам Монтгомери од Њу Хемпшир во четвртокот беше прогласен за виновен за убиство на својата ќерка (5-годишната Хармони Монтгомери), манипулација со физички докази, злоставување на телото и незаконско влијание на сведоци.
„Овде не се работи за победа или пораз. Станува збор за 5-годишно девојче кое беше убиено од нејзиниот татко. Не можам да замислам полошо злосторство“, изјави началникот на полицијата во Манчестер, Ален Алденберг.
„Тој е кукавица. Отсекогаш бил кукавица. Затоа и го направил тоа. Ја одзеде од луѓето кои ја сакаа бидејќи не можеше да поднесе да нема контрола. Само за тоа се грижеше, контролата“, изјавила мајката на девојчето, Кристал Сори, како што објави „Ен-би-си Њуз“.
Исчезнувањето на Хармони првпат беше пријавено во декември 2021 година. Полицијата верува дека била убиена во декември 2019 година, иако нејзиното тело никогаш не било пронајдено. Монтгомери веќе отслужува 30-годишна затворска казна за посебен случај поврзан со оружје.
За време на судењето тој ја негираше вината и рече дека безусловно ја сака својата ќерка. Адвокатот на Монтгомери ја обвини неговата сопруга Кајла Монтгомери за смртта на девојчето. Кајла и Адам извесно време не живеат заедно, а таа беше главен сведок на обвинителството. Таа рече дека Адам Монтгомери ја претепал Хармони до смрт откако таа го извалкала автомобилот со кој семејството заработувало пари.
Таа рече дека по убиството, телото на 5-годишното девојче го ставил во торба што ја криел со месеци пред да се ослободи во 2020 година. Наводно во неколку наврати го преместувал телото на девојчето. Извесно време го чувал во багажникот на автомобилот на пријател, во фрижидер во ходникот на станбената зграда на неговата свекрва, во прифатилиште за бездомници и во замрзнувачот во станот, пишува Дејли Мејл.
Мајката последен пат ја виде Хармони во април 2019 година. После тоа, таа се обидела да стапи во контакт со Монтгомери, но тој не и се јавувал. Таа пријавила дека нејзината ќерка исчезнала во 2021. Судот ќе му изрече казна на Монтгомери по 1 април.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.