Москва ќе одговори соодветно ако Киев продолжи со обидите да ја нападне Русија за време на денот на примирјето во чест на 80-годишнината од победата во Втората светска војна, изјави портпаролот на рускиот претседател, Дмитриј Песков.

„Секако, иницијативата на претседателот Владимир Путин за привремен прекин на огнот за време на празниците е актуелна. И соодветните инструкции ги даде врховниот командант. Но, тука сакам да ве потсетам на нашата позиција. Огнот ќе престане, но ако режимот во Киев не пружа реципроцитет, а обидите за напад на нашите позиции или наши објекти продолжат, тогаш веднаш ќе следи соодветен одговор – рече Песков на прес-конференцијата.

Тој додаде дека соработката на Русија со Соединетите Американски Држави во преговорите за мирно решение на украинската криза продолжува.

Песков истакна дека Русија ги поздравува сите земји кои се подготвени да вложат напори за насочување на конфликтот во Украина кон мирно решение.

Тој оцени дека режимот во Киев продолжува да демонстрира став насочен кон продолжување на војната со Русија.

– Киевскиот режим продолжува да го демонстрира својот пристап, својата позиција. Овој став е насочен кон продолжување на војната – рече Песков.

Русија, со одлука на претседателот на Руската Федерација, прогласи прекин на огнот во текот на деновите на 80-годишнината од Победата. Во овој период, сите воени операции ќе бидат суспендирани, соопшти Кремљ.

Францускиот претседател Емануел Макрон, испрати честитка до новоизбраниот германски канцелар Фридрих Мерц, на германски јазик.

„Од нас зависи да го направиме француско-германскиот мотор посилен од кога било и да ја забрзаме нашата европска агенда за суверенитет, безбедност и конкурентност“, рече Макрон.

Макрон потврди дека двајцата ќе се сретнат утре, како дел од првото странско патување на Мерц во Париз и Варшава.

Украинскиот претседател Володимир Зеленски беше меѓу првите светски лидери што упатија официјални честитки до Фридрих Мерц.

Во објава на социјалните мрежи, тој изрази надеж дека во иднина ќе види поголемо германско лидерство во европските и трансатлантските прашања.

Претседателката на Европската комисија, Урсула фон дер Лајен, го нарече Мерц докажан пријател и експерт за Европа, велејќи дека тие ќе работат заедно за посилна и поконкурентна Европа.

Претседателот на Европскиот совет, Антонио Коста, се приклучи на честитките на германски јазик – додавајќи дека се радува на заедничката работа на амбициозна европска програма.

Политиката со царини на Доналд Трамп ќе предизвика „ценовен шок“ и евентуален недостиг и ќе доведе до јавен притисок за промена на неговиот пристап, изјави поранешниот потпретседател на САД, Мајк Пенс.

Во еден од неговите најобемни настапи против политиките на претседателот на кого некогаш му служеше, Пенс ја критикуваше „недоследната“ поддршка на Белата куќа за Украина во интервју за Си-Ен-Ен и изјави, директно спротивставувајќи се на тврдењата на Доналд Трамп, дека рускиот претседател Владимир Путин не сака мир.

Зборувајќи за царините што Трамп ги направи централна политика во својот втор мандат, воведувајќи 90-дневна пауза за повеќето земји по превирањата на меѓународните пазари, Пенс нагласи дека тие „не се победа за американскиот народ“ и предупреди дека најлошите последици допрва доаѓаат.

– Загрижен сум дека царините на претседателот, воведени и против пријателите и против непријателите, значат дека администрацијата всушност спроведува политика која не е насочена кон земјите кои ги злоупотребиле нашите трговски односи, туку се однесува на нова индустриска политика која ќе доведе до инфлација, ќе им наштети на потрошувачите и ќе ѝ наштети на американската економија – рече тој.

Дури и администрацијата призна дека може да има ценовен шок и евентуален недостиг во економијата по паузата – рече Пенс.

Тој предупреди дека Белата куќа ризикува да предизвика политичка реакција, осврнувајќи се на неодамнешната изјава на Доналд Трамп дека царините би можеле да доведат до тоа „американските деца да имаат две кукли наместо 30“ и дека тие кукли би можеле „да чинат неколку долари повеќе“.

– Одржувањето на играчките по прифатливи цени за нашите деца е навистина дел од американскиот сон – рече тој.

– Мислам дека американскиот народ ќе ги види последиците од ова. Мислам дека ќе бараат поинаков пристап.

Тој, исто така, ја критикуваше администрацијата за заканата дека ќе ја повлече поддршката за Украина, чиј претседател, Володимир Зеленски, беше јавно обвинет од Трамп за руската инвазија, додека тој постојано го фалеше Путин. Дури неодамна ја промени својата реторика, откако рускиот претседател ги отфрли понудите за мир и наместо тоа нареди ракетни напади врз Киев.

Пенс рече: „Ако последните три години нè научија нешто, тоа е дека Владимир Путин не сака мир, туку ја сака Украина. Фактот дека Украина се согласи на прекин на огнот, додека Русија одложуваше и нуди изговори речиси два месеци, ја потврдува таа изјава. Според мене, недоследната поддршка на администрацијата во последните месеци само дополнително ја охрабри Русија.“

Тој беше подеднакво остар и кон ставот на Доналд Трамп кон Канада, за која воведе трговски царини и изјави дека би ја сакал како 51-ва федерална држава на САД. Пенс ја нарече Канада „голем сојузник чии војници се бореле и умирале рамо до рамо со Американците во секоја војна од Првата светска војна“.