Свет
(Видео) Маск за лансирањето: Преплавен сум со емоции, тешко е да се зборува
Елон Маск не можел да опише како се чувствува откако неговиот SpaceX во соработка со НАСА прв пат испрати астронаути во вселената.
Околу 15.22 часот, по локално време од центарот во Флорида, лансирана е ракетата, која двајцата астронаути Боб Бенкен и Драг Харли ги одведе во вселената на 19 часовниот лет до Меѓународната вселенска станица.
Ова е прв пат комерцијално летало да одведе луѓе во вселената и прв пат по девет години Американците да заминат во вселената од сопствената земја.
„Немам зборови, не можам да опишам колку сум среќен“
„Навистина сум преплавен со емоции. Искрено, тешко е да се зборува. Поминав 18 години работејќи за ова, тешко е да се поверува дека навистина се случи. Во овој момент не сум начисто со емоциите. Се надевам дека ова е прв чекор на патот кон цивилизацијата на Марс, кон мултипланетарниот живот, база на Месечината и проширување вон границите на Земјата”, вели Маск.
Тој откри и како се чувствувал кога лансирањето било одложено за една недела поради лошото време.
„Чудно, но се чувствував добро, не бев нервозен. Како да се совпаднаа судбините. Како во обичен ден да идам на работа, вели тој.
„Ова не е победа, вистинската работа допрва доаѓа“
На прашањето дали чувствува одговорност кон човечките животи кои ги испрати во вселената, тој вели дека ова е само почеток на мисијата.
„Многу работа има пред нас. Астронаутите треба да пристигнат во вселенската станица, да живеат таму 110 дена, а потоа да се спуштат со бродот низ Земјината атмосфера и да се вратат дома, на брегот на Флорида. Враќањето е многу поопасно од ова, и затоа не сакам да прогласам победа, рекол тој и додал:
„Се гушам, простете. Не можам да одговорам на тоа прашање“.
Маск заклучи дека човештвото треба да биде гордо и возбудено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Мадуро: САД измислуваат нова војна, носачот на авиони „Џералд Р. Форд“ испратен на Карибите
Претседателот на Венецуела, Николас Мадуро, ја обвини администрацијата на Доналд Трамп дека „измислува нова војна“, откако САД испратија воен носач на авиони во Карипското Море.
Според „Би-Би-Си“, најголемиот американски носач на авиони, USS Gerald R. Ford, кој може да носи до 90 летала, претставува значително зголемување на американското воено присуство во регионот.
Вашингтон тврди дека операцијата е насочена против трговијата со дрога и дека веќе се изведени неколку воздушни напади врз криминални организации. Трамп го обвини Мадуро дека е лидер на нaрко-картел, што венецуелскиот претседател категорично го негира.
Мадуро предупреди дека САД бараат нов вечен конфликт и потсети дека ветиле дека нема да се впуштаат во нови војни. Аналитичарите наведуваат дека толку големо воено присуство не е потребно за операции против дрога и го толкуваат како обид за притисок врз режимот во Каракас.
Американскиот Конгрес, вклучително и дел од републиканците, изразија загриженост за законитоста на нападите и овластувањата на претседателот, предупредувајќи дека Белата куќа ја узурпира контролата врз употребата на воена сила.
Свет
Трамп подготвува нови санкции за Русија
Администрацијата на американскиот претседател Доналд Трамп подготвила пакет нови санкции насочени кон клучни сектори на руската економија, подготвен за активирање доколку Владимир Путин продолжи да одолговлекува со завршувањето на војната во Украина, објави „Ројтерс“.
Според американски извори, санкциите би можеле да ги погодат рускиот банкарски сектор и инфраструктурата за транспорт на нафта. Идејата е да се зголеми економскиот притисок врз Москва, додека Вашингтон размислува и за користење замрзнатиот руски имот во корист на Украина.
Трамп, кој минатата недела за првпат по враќањето на функцијата воведе санкции против Русија, изјавил дека сака да се позиционира како „глобален мировник“, но призна дека прекинувањето на војната е потешко од очекуваното.
Во претходниот пакет, санкции беа воведени против нафтените компании „Лукоил“ и „Роснефт“, што доведе до раст на цените на нафтата за повеќе од два долара по барел.
Иако Трамп не е подготвен да ѝ испорача на Украина ракети Томахок, американските и европските партнери оценуваат дека Вашингтон зазема поцврст став кон Москва.
Според „Ројтерс“, Трамп најверојатно ќе почека неколку недели за да ја процени реакцијата на Русија пред да одлучи дали ќе ги активира новите санкции.
Свет
Турист загина кај Пантеонот во Рим
Јапонски турист, на околу 70 години, починал во Рим откако паднал кај Пантеонот, објави Анса.
Според информациите на италијанските медиуми, човекот не бил на самиот објект, туку на периферниот дел — кај оградениот археолошки простор што го опкружува Пантеонот. Тоа место има камен ѕид висок неколку метри, кој дели рамна површина (каде минуваат туристите) од понизок археолошки дел, нешто како ров.
Се претпоставува дека туристот се потпрел или се наведнал над ѕидот, изгубил рамнотежа и паднал во тој понизок простор, длабок околу 7 метри.
Спасувачките напори не успеале, а пожарникарите морале насилно да ја отворат влезната порта пред Пантеонот за да стигнат до телото.
Полицијата и локалните власти биле на местото на настанот, додека причината за несреќата сè уште не е утврдена.

