Свет
(Видео) Мајка на млад човек со српско потекло киднапиран од Хамас: Ги качија на камион и ги однесоа

Во терористичкиот напад на Хамас врз Израел на 7 октомври киднапиран е 22-годишниот млад човек со српско потекло Алон Охел. Мајка му се надева дека Србија ќе помогне да се ослободи Алон.
„Алон е невин млад човек. Ние сме како секое друго семејство. Нашето секојдневие е целосно превртено наопаку од оваа страшна реалност со која се соочуваме. Не спиеме, се будиме од кошмари“, изјави мајката на младиот човек, Идит Охел, за „Косово онлајн“. Алон бил киднапиран на музичкиот фестивал.
„Тој е музичар, отиде на мировен музички фестивал, каде што имало околу 2.500 луѓе. Околу шест часот наутро имаше масовен ракетен напад на областа каде што се одржуваше фестивалот. Тој и неговите пријатели се возеле до засолниште, каде што се скриле од ракетите“, вели Охел, која дознала што се случило од пријателите на својот син.
Во тоа засолниште имало 27 луѓе кога дошле милитантите од Хамас и се обиделе да ги убијат.
„Мојот син и еден од неговите пријатели се обидоа со голи раце да ги фатат гранатите и да ги исфрлат од засолништето за да спасат луѓе. Едната експлодира во засолништето и повреди многу луѓе. По детонацијата, терористите влегоа и го извадија син ми. Беше жив и го киднапираа со уште три лица. Ги качија на камионот и ги однесоа“, рече мајката и додава.
„Сето тоа го виде неговиот најдобар пријател. Тој беше повреден и се преправаше дека е мртов со својата девојка, додека терористите пукаа во другите во засолништето. Кога беше донесен во болница, тој ни кажа дека Алон бил киднапиран и однесен во Појасот Газа“.
Со оглед на тоа дека Алон е српски државјанин, мајката побарала помош и од српската амбасада во Израел. Таа додаде дека нејзиното семејство од страната на мајка ѝ е по потекло од Нови Сад, каде што е роден дедо ѝ, а побегнал на почетокот на Втората светска војна кога имал 15 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сестрата на Ким го отфрла дијалогот со Сеул: „Ако се надеваат дека ќе ја свртат ситуацијата со неколку слатки зборови, нема полоша грешка од тоа“

Пјонгјанг „нема причина“ да го продолжи дипломатскиот дијалог со Сеул, изјави денес сестрата на севернокорејскиот лидер Ким Џонг-ун, и покрај изразената желба на новиот јужнокорејски претседател Ли Џе Мјунг да ја смири ситуацијата, објави севернокорејската агенција КЦНА.
„Уште еднаш, го разјаснуваме официјалниот став, а тоа е дека без оглед на политиката што ја усвојува Сеул или каков предлог е даден, ние не сме заинтересирани за тоа и нема причина за средба со Република Кореја или за каков било разговор со неа“, рече Ким Џо Џонг, која е исклучително влијателна личност во севернокорејската дипломатија.
Сестрата на Ким Џонг-ун зборуваше за „неповратната“ некомпатибилност меѓу двете земји, кои технички сè уште се во војна. Нивниот конфликт заврши во 1953 година со примирје, но не и со мировен договор.
Нејзината изјава доаѓа откако јужнокорејскиот претседател Ли Џе-мјунг, кој дојде на власт на почетокот на јуни, вети дека ќе го контактира Пјонгјанг, тврдејќи дека „без разлика каква е цената, мирот е подобар од војната“.
Сеул оттогаш престана да емитува антисевернокорејска пропаганда преку звучници по должината на границата. Набргу потоа, Северна Кореја престана да емитува вознемирувачки звуци што ги вознемируваа жителите на југот во близина на границата дење и ноќе.
Сепак, ова ублажување на тензиите не значи дека Јужна Кореја може да верува во дипломатско ублажување на притисокот, предупреди Ким Џо Џонг. Ако Сеул се надеваше дека ќе ја сврти ситуацијата „со неколку слатки зборови, нема полоша грешка од тоа“, додаде таа.
Новиот претседател на Јужна Кореја изјави дека сака прекуграничен дијалог без предуслови.
Фото: принтскрин
Свет
(Видео) Неидентификуван дрон влезе во воздушниот простор на Литванија

Неидентификуван дрон влезе во литванскиот воздушен простор утрово, најверојатно од правец на Белорусија, објави литванската јавна телевизија ЛРТ.
„Според добиените извештаи, дронот е забележан на висина од околу 200 метри и последен пат е виден во близина на Вилнус. Не е јасно за каков дрон станува збор, ќе ги ажурираме информациите“, изјави Дариус Бута, претставник на литванскиот Национален центар за управување со кризи.
🇱🇹 UAV from Belarus has again flown into Lithuania, spotted near the capital Vilnius, — LRT. pic.twitter.com/LE5CjMIFSz
— MAKS 25 🇺🇦👀 (@Maks_NAFO_FELLA) July 28, 2025
Литванските власти објавија дека сите надлежни служби работат на лоцирање на можното место каде што се урна дронот и ги предупредија жителите да не се приближуваат кон дронот под никакви околности.
„Денес времето е поволно за метеоролошки балони, кои шверцерите ги користат за транспорт на својата стока. Сè уште не можеме да прецизираме за каков вид предмет или предмети станува збор“, нагласи литванскиот министер за одбрана Довиле Сакалиене.
Министерот, исто така, истакна дека претстојните воени вежби во Белорусија ја зголемуваат веројатноста за инциденти, дури и ненамерни. Во вежбите „Запад-2025“, кои се очекуваат кон средината на септември, ќе учествуваат околу 13.000 војници и се меѓу најголемите заеднички вежби организирани од Русија и Белорусија.
Белорусија, според написите во медиумите е важен сојузник на Русија за време на војната во Украина. Руските сили ја користеа белоруската територија како појдовна точка за инвазија. Украинската разузнавачка агенција неодамна предупреди дека Минск ги засили своите хибридни операции со насочување на нелегални мигранти кон границите на Европската Унија.
Руски беспилотни летала залутаа на територијата на Полска, Молдавија и Романија за време на претходните напади врз Украина. Покрај тоа, руски беспилотен авион со боева глава се урна во Латвија во септември минатата година, пишуваат медиумите.
Фото: принтскрин
Свет
Гутереш: Гладот никогаш не смее да се користи како воено оружје

Гладот никогаш не смее да се користи како воено оружје, изјави денес генералниот секретар на Обединетите нации, Антонио Гутереш, алудирајќи конкретно на тековните конфликти во Појасот Газа и Судан.
„Конфликтите продолжуваат да шират глад во Појасот Газа, Судан и пошироко. Гладот ја поттикнува нестабилноста и го поткопува мирот“, рече Антонио Гутереш за време на видеоконференција на Самитот на ОН за прехранбени системи во Етиопија.
Тој додаде дека светот „никогаш не смее да го прифати гладот како воено оружје“.
Светската здравствена организација (СЗО) вчера предупреди дека стапката на неухранетост во Појасот Газа достигнува алармантни нивоа, со висока стапка на смртност во јули.
Од 74 смртни случаи поврзани со неухранетост регистрирани од почетокот на годината, 63 се случиле во јули, вклучувајќи 24 деца под пет години, едно дете над пет години и 38 возрасни, соопшти организацијата на ОН.
Израел, кој го држи Појасот Газа под опсада од почетокот на војната против Хамас на 7 октомври 2023 година, воведе строга блокада на територијата на почетокот на март, која беше само делумно ублажена кон крајот на мај, што доведе до сериозен недостиг на храна.
Од април 2023 година, во Судан беснее војна меѓу армијата предводена од генералот Абдел Фатах ел Бурхан, де факто владетел на земјата од пучот во 2021 година, и паравоените Сили за брза поддршка (RSF) предводени од неговиот поранешен заменик, генерал Мохамед Хамдан Дагло.
Војната предизвика една од најлошите хуманитарни кризи во светот, според ОН.