Украинскиот претседател Володимир Зеленски ја обвини Русија за проширување на војната по нарушувањето на воздушните простори на Полска и Романија.

„Русија точно знае каде летаат нејзините дронови – ова не е грешка на пониски команданти. Очигледно ja шират војната“, порача Зеленски на Телеграм, додавајќи дека тоа бара превентивно дејствување на Западот.

Тој повторно повика на заострување на санкциите и тарифите кон руската трговија и намалување на увозот на руска нафта. Зеленски го поздрави предлогот на американскиот претседател Доналд Трамп за координирано дејствување и апелираше: „Не чекајте десетици дронови и проектили за да донесете одлуки. Престанете да барате изговори.“

Обединетото Кралство и САД во наредните денови ќе потпишат значаен технолошки договор во рамките на државната посета на американскиот претседател Доналд Трамп на Лондон, соопшти британската амбасада во Вашингтон.

Договорот е насочен кон зајакнување на соработката во сектори како вештачка интелигенција, полупроводници, телекомуникации и квантно компјутерство, вредни трилиони долари.

Посетата на Трамп ќе трае три дена и ќе ја придружува делегација од водечки американски бизнис-лидери, меѓу кои директорите на Nvidia и OpenAI.

Според Sky News, инвестицискиот гигант BlackRock планира да вложи 700 милиони долари во британски дата-центри како дел од пакет договори што ќе бидат објавени за време на посетата.

Американскиот претседател Доналд Трамп упати ултиматум до сојузниците во НАТО, барајќи воведување „големи“ санкции кон Русија и целосен прекин на купувањето руска нафта. Тој најави дека САД ќе воведат нови мерки само кога сите земји од Алијансата ќе се обврзат на истото.

„Подготвен сум да воведам големи санкции кон Русија кога сите земји членки на НАТО ќе се усогласат и ќе престанат да купуваат нафта од Русија. Во секој случај, јас сум подготвен да ‘тргнам’ кога и вие ќе бидете. Само кажете кога,“ порача Трамп во писмото објавено на социјалните мрежи.

Покрај тоа, тој побара и зголемување на царините кон Кина, меѓу 50% и 100%, како демонстрација на сила, оценувајќи дека таквиот чекор би помогнал побрзо да заврши војната меѓу Русија и Украина.

Европската унија веќе воведе забрана за увоз на руска сурова нафта и нафтени деривати по море, но некои земји и понатаму купуваат руски фосилни горива, особено течен природен гас. Според аналитичарите, исполнувањето на условите на Трамп би значело голема промена во рамките на Алијансата, но останува неизвесно дали постои колективна волја за такви мерки.

Иако Трамп претходно бараше и санкции за Индија, во најновата порака до НАТО таа не беше спомената. Аналитичарите оценуваат дека тоа е поврзано со фактот што ЕУ е во завршна фаза на преговори за трговски договор со Индија, што ја прави малку веројатна согласноста на Брисел за дополнителни царини.

Со обраќањето до НАТО, а не до ЕУ, Трамп во условите ја вклучи и Турција – трет најголем купувач на руска нафта по Кина и Индија, што дополнително ја нагласува тежината на неговите барања.

Во меѓувреме, романското министерство за одбрана соопшти дека во саботата пресретнало дрон кој влегол во нивниот воздушен простор за време на руски напади врз Украина.

Украинскиот претседател Володимир Зеленски изјави дека дронот летал во воздушниот простор на НАТО „околу 50 минути“, додавајќи дека тоа е свесно ширење на конфликтот.

„Руската армија точно знае каде одат нивните дронови и колку долго можат да останат во воздухот. Нивните рути се секогаш пресметани. Ова не може да биде случајност или грешка. Тоа е очигледно проширување на војната,“ напиша Зеленски.

Инцидентот дојде по слични упади на руски дронови во полскиот воздушен простор претходно оваа недела, по што НАТО најави засилување на безбедноста на источниот фронт. Американскиот државен секретар Марко Рубио упадот во Полска го оцени како неприфатлив, несреќен и опасен развој на настаните.