Свет
(Видео) Наставничка ги охрабрувала учениците да му удрираат шамари на ученик кој бил муслиман во Индија

Полицијата во Индија истражува наставничка откако видеото на кое ги охрабрува учениците да му удираат шлаканици на нивен седумгодишен соученик, кој бил муслиман, стана вирално, според медиумите во регионот. Ова видео предизвикало бес негодување во земјата.
На видеото од инцидентот, кој се случил во областа Музафарнагар во северната држава Утар Прадеш, се гледа како момчето исплашено стои пред своите соученици додека наставничката ги повикува учениците да му удрат шамар, пренесуваат локалните медиуми.
Момчето плаче додека неговите соученици наизменично му удираат шлаканици, а наставничката им вели на учениците да го направат тоа „на вистински начин“, стои во написите.
Шефот на полицијата во Музафарнагар, Сатјанарајан Праџапат, изјавил дека наставничката им кажала на учениците да му удрат шамар на момчето „бидејќи не се сеќава на табелата за множење“. Шефот потврди дека наставничката ја спомнала и религијата на момчето.
Во тек е истрага, но наставничката не е официјално обвинета, пренесуваат медиумите. Инцидентот предизвикал широк гнев и немири во Индија од 1,4 милијарди луѓе, каде што хинду националистичката политика на владејачката партија Бхаратија Џаната (БЈП) ги продлабочи тензиите во заедницата во земјата и создаде, како што велат групите за права и владините критичари, атмосфера на страв и отуѓување меѓу малцинските групи, пишува CNN.
Истакнатиот опозициски политичар Рахул Ганди ја обвини наставничката дека „сее отров на дискриминација во главите на невините деца“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Земјотрес со јачина од 6,0 степени според Рихтеровата скала вчера го погоди индонезискиот остров Сулавеси

Земјотрес со јачина од 6,0 степени според Рихтеровата скала вчера го погоди индонезискиот остров Сулавеси, пренесоа светските агенции, повикувајќи се на Агенцијата за метеорологија, климатологија и геофизика на Индонезија.
Од Агенцијата нагласија дека нема опасност од цунами.
Според Европско-медитеранскиот сеизмолошки центар, земјотресот бил со јачина од 5,9 степени според Рихтеровата скала, и се случил на длабочина од 109 километри.
Регион
Денес се одбележуваат 45 години од смртта на претседателот на СФР Југославија, Јосип Броз Тито

Пред 45 години на денешен ден, на 4 мај 1980 година, почина Јосип Броз Тито (88), претседател на Социјалистичка Федеративна Република Југославија (СФРЈ) и на Сојузот на комунисти на Југославија (СКЈ), врховен командант на вооружените сили на Југословенската народна армија (ЈНА) и еден од основачите на Движењето на неврзаните.
Тито е роден во Кумровец, место на словенечко-хрватската граница, во мај 1892 година, а 25 мај е означен како датум на неговото раѓање, кој е прогласен за Ден на младоста и за време на кој штафетна екипа дошла во Белград, на стадионот на ЈНА, и привремено ја обиколувала цела Југославија.
Тој беше на чело на федералната држава, составена од шест републики, помалку од 35 години, од ослободувањето на земјата по Втората светска војна во 1945 година, па сè до неговата смрт.
Тој ја изведе Југославија од Источниот (советскиот) блок и спроведе реформи, по што опустошената и сиромашна земја стана средно развиена, со современ образовен и социјален систем.
Тито почина на 4 мај 1980 година, во 15:05 часот, во Клиничкиот центар во Љубљана, по компликации од ампутација на ногата и други акумулирани здравствени проблеми.
Денес, на годишнината од неговата смрт, Музејот на Југославија ќе биде отворен од 10 до 18 часот, а влезот ќе биде бесплатен за посетителите.
Регион
Состојба на Вучиќ е стабилна, порача дека нема да се предаде и дека ќе продолжи да работи

Првиот потпретседател на Владата на Србија и министер за финансии Синиша Мали изјави дека претседателот на Србија, Александар Вучиќ попладнето ја напуштил Воено-медицинската академија (ВМА) и дека негова желба била да ѝ ги пренесе на српската јавност своите зборови дека му е подобро.
Мали изјави дека разговарал со Вучиќ и дека им порачал на граѓаните дека нема да се предаде и дека ќе продолжи да работи.
„Тој е силен човек, тоа е важно за граѓаните на Србија, ми рече дека е подобро. Еден ден, два, три му беше наредено да лежи, да се одмора, што е проблем само по себе, како што знаете, но овој пат ќе биде дисциплиниран. И се надевам на негово брзо закрепнување“, рече Мали.
Претходно началникот на управата за воено здравство, кардиологот Драган Динчиќ изјави дека здравствената состојба на Вучиќ моментално е стабилна и задоволителна и дека не е реално да се врати на редовните активности во следните неколку дена.
Тој рече дека за време на престојот во САД, претседателот Вучиќ почувствувал силна болка во градите што траела неколку секунди, и дека тоа не се согласувало со сведоштвото на другите кои биле во истата просторија со него.
„Испил дополнителна терапија и по 45 минути, кога го измерил крвниот притисок, тој бил 165 со 98, што значи дека пред терапијата, притисокот бил повисок. Лекарите од Америка направиле сè и тој решил да се врати во земјата и покрај противењето на лекарите“, додаде Динчиќ.