Свет
(Видео) Најмалку 10 загинати, четири милиони луѓе без струја: поплавите беснеат во јужниот дел на САД

Обилниот дожд ги поплави патиштата и ги затвори аеродромите во Флорида пред ураганот „Хелен“ да стаса на копно. Најмалку десет лица загинаа, пренесуваат светските медиуми.
Според последните информации, ураганот слабее и е насочен кон Џорџија, а потоа кон Јужна и Северна Каролина. Локалните власти известуваат за екстремна штета во делови на Флорида и Џорџија. Поплавите и свлечиштата предизвикуваат проблеми, а спасувачките служби се обидуваат да се пробијат до отсечениот дел.
Just went up with @TampaPD. We’re seeing extensive damage on Davis Islands and waterfront areas. The National Guard has activated to help with rescue efforts. pic.twitter.com/qCBbHa9naf
— Jane Castor (@JaneCastor) September 27, 2024
Официјалните лица стравуваат дека ќе бидат откриени повеќе жртви бидејќи невремето ја пустоши Флорида со ветрови со брзина од 225 км/ч. На пат кон Џорџија ветровите „забавија“ до 120 км/ч.
Националната метеоролошка служба (NWS) издаде предупредување за поплави во централна Џорџија, вклучувајќи ја и Атланта и околината.
Загрозени се повеќе од милион жители, со 246 училишта и 23 болници во областа.
Ураганот „Хелен“ рано утринава навлезе во Џорџија, со постојан ветер од 177 км/ч. Две лица веќе загинаа јавуваат локални медиуми.
Градоначалникот на Атланта, Андре Дикенс, ги повика жителите да останат дома додека спасувачките екипи продолжуваат со операциите за да стигнат до заглавените од поплавите.
Првите интервенции доведоа до десетици спасувања а беа извлечени најмалку 25 луѓе на безбедно, многумина од покривите, рече тој.
Гувернерот на Џорџија Брајан Кемп рече: „Сè уште имаме луѓе заробени во домовите во кои се обидуваме да влеземе. Веќе имаме многу ресурси на теренот, ја повикуваме дополнително Националната гарда и ќе направиме се што можеме“.
Кемп рече дека Атланта изгледа е поштедена од значителна штета од ветерот. Неколку болници во јужна Џорџија останаа без струја откако ураганот „Хелен“ ги оневозможи резервните генератори, рече тој.
По најсилните удари на ураганот „Хелен“ се сумираат штетите предизвикани од силните ветрови и обилните дождови кои доведоа до бројни поплави и активирање на одрони. Досега е потврдена смртта на 10 лица.
Степенот на штетите во Флорида почна да се зголемува по зори. Градот Тампа соопшти дека итниот персонал спасил 78 жители од водата и дека многу патишта се непроодни поради надојдените води. Канцеларијата на шерифот на округот Паско во текот на ноќта спаси повеќе од 65 луѓе.
Официјалните лица ги молеа жителите кои беа на удар на „Хелен“ да ги почитуваат наредбите за евакуација, опишувајќи го „напливот на бура како неодржлив“. Некои, сепак, тврдоглаво одбија евакуација и останаа во местото на живеење. „Имаме наредба, но јас ќе останам дома“, изјави за Ројтерс Кен Вуд пред бурата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Медведев: Русија нема да дозволи историјата да се прекројува

Заменик-претседателот на Советот за безбедност и лидер на партијата Единствена Русија, Дмитриј Медведев, денес изјави дека Русија нема да дозволи обиди за препишување на историјата од Втората светска војна и изедначување на агресорите со ослободителите.
„Благодарение на нашите херои јасно гледаме како историјата ги казнува оние што не ги научиле лекциите, оние што се обидуваат да ги ревидираат резултатите од Втората светска војна. Нема да дозволиме историјата да се прекројува“, рече Медведев за време на отворањето на меѓународната патриотска кампања „Диктатот на победата“, објави „РИА новости“.
Зборувајќи за современиот контекст, Медведев истакна дека денес Русија повторно се соочува со нацизмот, но под нов плашт.
„Нашата земја е повторно на фронтовската линија против истиот нацизам. Војниците и офицерите на специјалната воена операција, како и сите што работат во заднина и му помагаат на фронтот, ја продолжуваат работата на своите големи претходници“, рече тој.
Кампањата „Диктатот на победата“ се одржува на повеќе од 35.000 локации во Русија и во повеќе од 90 земји од целиот свет.
Учесниците, меѓу кои ученици, студенти, членови на јавни организации и други граѓани, имаат 45 минути да одговорат на прашања за големата патриотска војна и тековните воени настани, пренесува „Танјуг“.
Регион
(Видео) Еколошка катастрофа – нафта истече во Јадранското Море

Големи количини гориво истекоа во Јадранското Море на островот Хвар во Хрватска. Неофицијално, инцидентот се случил кога пукнал резервоар на танк на бензинската пумпа ИНА, објави „Далмација данас“.
Полицијата е на терен и се истражува како се случил инцидентот.
„Утрово, околу 9.30 часот, е примена информација дека во градот Хвар, заливот Крижна Лука, имало загадување со нафта во морето. Припадници на Полициската станица Хвар и Поморската полициска станица, пожарникари, Хрватската крајбрежна стража и припадници на Капетанијата на пристаништата се на местото на настанот. Покрај спроведувањето на постапката за санирање на штетите, ќе се спроведе и постапка за утврдување на сите факти и околности на настанот“, соопшти сплитската полиција.
Свет
Орбан: Пристапувањето на Украина во ЕУ може да ја уништи унгарската економија и да донесе војна

Унгарскиот премиер Виктор Орбан денес изјави дека Унгарија не може да го поддржи пристапувањето на Украина во Европската Унија бидејќи, како што изјави, „достигнувањата што се постигнати досега мора да бидат заштитени“.
Во интервју за јавното радио Орбан објасни дека проширувањето на Европската Унија во минатото било корисно за постојните членки, како што е Унгарија, но дека приемот на Украина во блокот би бил штетен за Унгарија, објави МТИ.
„Зошто да губиме кога би можеле да имаме корист или барем да го заштитиме она што сме го постигнале“, праша Орбан.
Тој изјави дека слободниот проток на украинска работна сила може да го загрози целосното вработување во Унгарија, што го смета за најголемо достигнување во последните 15 години.
Тој исто така истакна дека членството на Украина во Европската Унија би можело целосно да ги промени финансиските основи на европското земјоделство, што би ги оставило унгарските земјоделци без средства и би ги ставило стотици илјади семејства во многу тешка положба.
Орбан предупреди дека ако Украина стане членка на Европската Унија, во Унијата ќе влезе војната.
„Доколку го одобриме пристапувањето на Украина, во Европската Унија, која беше создадена како сојуз за мир, ќе има војна“, рече Орбан повикувајќи членството на Украина да биде отфрлено.
Тој додаде дека брзото членство на Украина може да ја уништи унгарската економија и дека неговата земја може да банкротира.
Орбан потсети дека граѓаните на Унгарија имаат право да одлучат за датумот на пристапување на Украина, но дека е многу тешко да се поддржи тој процес.
Тој ја критикува и одлуката на претседателката на Европската комисија, Урсула фон дер Лајен, која објави дека Украина мора да биде примена во Европската Унија до 2030 година нагласувајќи дека, според него, „процесот не може да се запре кога ќе стигне до последната фаза“.