Свет
(Видео) Најмалку 10 загинати, четири милиони луѓе без струја: поплавите беснеат во јужниот дел на САД

Обилниот дожд ги поплави патиштата и ги затвори аеродромите во Флорида пред ураганот „Хелен“ да стаса на копно. Најмалку десет лица загинаа, пренесуваат светските медиуми.
Според последните информации, ураганот слабее и е насочен кон Џорџија, а потоа кон Јужна и Северна Каролина. Локалните власти известуваат за екстремна штета во делови на Флорида и Џорџија. Поплавите и свлечиштата предизвикуваат проблеми, а спасувачките служби се обидуваат да се пробијат до отсечениот дел.
Just went up with @TampaPD. We’re seeing extensive damage on Davis Islands and waterfront areas. The National Guard has activated to help with rescue efforts. pic.twitter.com/qCBbHa9naf
— Jane Castor (@JaneCastor) September 27, 2024
Официјалните лица стравуваат дека ќе бидат откриени повеќе жртви бидејќи невремето ја пустоши Флорида со ветрови со брзина од 225 км/ч. На пат кон Џорџија ветровите „забавија“ до 120 км/ч.
Националната метеоролошка служба (NWS) издаде предупредување за поплави во централна Џорџија, вклучувајќи ја и Атланта и околината.
Загрозени се повеќе од милион жители, со 246 училишта и 23 болници во областа.
Ураганот „Хелен“ рано утринава навлезе во Џорџија, со постојан ветер од 177 км/ч. Две лица веќе загинаа јавуваат локални медиуми.
Градоначалникот на Атланта, Андре Дикенс, ги повика жителите да останат дома додека спасувачките екипи продолжуваат со операциите за да стигнат до заглавените од поплавите.
Првите интервенции доведоа до десетици спасувања а беа извлечени најмалку 25 луѓе на безбедно, многумина од покривите, рече тој.
Гувернерот на Џорџија Брајан Кемп рече: „Сè уште имаме луѓе заробени во домовите во кои се обидуваме да влеземе. Веќе имаме многу ресурси на теренот, ја повикуваме дополнително Националната гарда и ќе направиме се што можеме“.
Кемп рече дека Атланта изгледа е поштедена од значителна штета од ветерот. Неколку болници во јужна Џорџија останаа без струја откако ураганот „Хелен“ ги оневозможи резервните генератори, рече тој.
По најсилните удари на ураганот „Хелен“ се сумираат штетите предизвикани од силните ветрови и обилните дождови кои доведоа до бројни поплави и активирање на одрони. Досега е потврдена смртта на 10 лица.
Степенот на штетите во Флорида почна да се зголемува по зори. Градот Тампа соопшти дека итниот персонал спасил 78 жители од водата и дека многу патишта се непроодни поради надојдените води. Канцеларијата на шерифот на округот Паско во текот на ноќта спаси повеќе од 65 луѓе.
Официјалните лица ги молеа жителите кои беа на удар на „Хелен“ да ги почитуваат наредбите за евакуација, опишувајќи го „напливот на бура како неодржлив“. Некои, сепак, тврдоглаво одбија евакуација и останаа во местото на живеење. „Имаме наредба, но јас ќе останам дома“, изјави за Ројтерс Кен Вуд пред бурата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Разбиена најголемата педофилска мрежа: апсења и во соседството

Баварската полиција и Европол објавија дека во голема меѓународна операција е разбиена една од најголемите педофилски мрежи досега откриени на мрачната мрежа.
Платформата наречена „KidFliks“, активна од 2022 година, собра 1,8 милиони корисници ширум светот.
За разлика од досега познатите случаи, оваа мрежа беше фокусирана на видео-стриминг, а не само на преземање содржини. Платформата содржеше повеќе од 91.000 видеа за експлицитна злоупотреба на деца, со вкупно времетраење од над 6.000 часа. Во просек, три и пол нови видеа се прикачуваат на платформата секој час.
Според „Индекс“ пред неколку дена во Хрватска бил уапсен маж осомничен за детска порнографија. Извесно е, според написите, дека неговото апсење било дел од оваа акција.
Според Баварската канцеларија за криминалистичка истрага (BLKA), пристапот до мрежата бил можен по регистрацијата и плаќањето со криптовалути, вклучително и валути дизајнирани за максимална анонимност. Сепак, иследниците можеа да ги следат трансакциите со криптовалути, дури и кога се користеа услуги за криење идентитет, и ги поврзуваа плаќањата со корисниците. Досега се идентификувани 1.393 осомничени, а 79 лица се уапсени.
Во рамките на акцијата, која беше спроведена под името „OP flow“, беа претресени 96 локации во Германија, а само во Баварија беа извршени девет претреси на девет лица на места како Минхен, Нирнберг, Розенхајм и други. Во Баварија биле вкупно 12 осомничени, а истрага се води во Германија против 103 лица.
Во Германија, според БЛКА, биле идентификувани и жртвите – меѓу другото, децата биле спасени и безбедно сместени во Северна Рајна Вестфалија и Бранденбург.
Се истакнува случајот со 36-годишен маж од Кемниц кој е осомничен дека преку „КидФликс“ активно барал деца за сексуална злоупотреба. По приведувањето, неговиот малолетен син е предаден на надлежните социјални служби поради сомнение дека е загрозен.
Во друг случај, 30-годишен маж е осомничен дека гледал детска порнографија на платформата. Бидејќи во домаќинството живееле две малолетни деца, по извршениот претрес веднаш биле пренесени на згрижување на центарот за социјална работа.
Повеќекратниот сексуален насилник, кој е осомничен дека систематски злоставувал дете што лично го познавал, е уапсен во САД, благодарение на информациите добиени од Германија. Постои можност да има повеќе жртви.
На 10 март 2025 година, 52-годишен маж беше уапсен во Хановер, пронајден со повеќе од 70 дигитални уреди, кукла дизајнирана да имитира тело на девојка, разни лекови и индиции што укажуваат дека тој водел трговија со дрога преку мрачната мрежа.
Еден ден подоцна, на 11 март, со помош на холандските власти беше запленет сервер со околу 72.000 видеа. Страницата е затворена и сега го прикажува официјалното известување за заплена.
Акцијата ја подготвија Центарот за борба против детска порнографија и Државното правобранителство во Бамберг, во соработка со Баварската истражна канцеларија. Европол ја презеде координацијата на операцијата на меѓународно ниво, вклучително и иницијативата за идентификување на жртвите, а во операцијата учествуваа 38 земји. Меѓу нив е и Хрватска каде, како што е спомнато, е уапсено едно лице.
Во рамките на акцијата запленети се големи количини дигитални докази – компјутери, мобилни телефони, сервери и други електронски медиуми. Истрагата продолжува бидејќи, според официјалните информации, се уште не е познат идентитетот на луѓето кои управувале со платформата „КидФликс“.
Свет
Кристин Лагард: Царините на Трамп ќе имаат негативни последици во светот

Царините планирани од американскиот претседател Доналд Трамп ќе имаат негативни последици во светот, изјави денеска претседателката на Европската централна банка (ЕЦБ), Кристин Лагард.
Во интервју за ирското радио Newstalk, Лагард изјави дека штетата предизвикана од царините на Трамп зависи од нивниот обем и од времетраењето, како и од тоа дали тие ќе доведат до успешни преговори.
Според неа, трговските конфликти често се штетни за страната што ги почнала, па често водат до преговори, при што каде ќе бидат укинати некои царини, пренесува „Ројтерс“.
Пазарите денеска очекуваат нова рунда царини на Трамп, вклучително и 25 отсто царина за сите автомобили произведени надвор од САД, кои најверојатно ќе бидат објавени по затворањето на европските пазари.
Администрацијата на Трамп го прогласи 2 април за ден на ослободувањето, а се очекува американскиот претседател да ја искористи оваа можност да го објави својот план за реципрочни царини, објави Си-ен-ен.
Белата куќа наводно размислува за воведување универзални царини од 20 отсто за повеќето увозни производи, но други опции, како што се реципрочните царини за секоја земја, сè уште се на маса, пишува „Вашингтон пост“ повикувајќи се на три анонимни информирани извори.
Францускиот министер за индустрија, Марк Фераси, изјави дека Европа ќе одговори пропорционално на очекуваното воведување царини од страна на Соединетите Американски Држави, но дека во никој случај тензиите нема да ескалираат.
„Европа отсекогаш била за преговори и намалување на тензиите бидејќи трговските војни носат само губитници“, изјави Фераси за радиото RMC, пренесуваат медиумите, а пренесува „Танјуг“.
Свет
Макрон по осудата на Ле Пен: Судството е независно, сите граѓани имаат право на жалба

Францускиот претседател Емануел Макрон денеска изјави дека судството е независно и дека сите граѓани имаат право на жалба, пренесува БФМ ТВ.
Макрон потсети на три факти поврзани со убедувањето на лидерката на крајнодесничарската партија Национален собир (РН) Марин Ле Пен, изјави владината портпаролка Софи Прима по завршувањето на Советот на министрите.
Макрон посочи дека судството е независно, потоа дека заканите упатени кон судиите што ја изрекле пресудата против Ле Пен се апсолутно неприфатливи и, конечно, дека секој има право на жалба и дека законот е ист за сите.
Судството веќе нагласи дека ново судење во Апелацискиот суд може да се одржи во роковите што оставаат можност за евентуална претседателска кандидатура на лидерот на екстремната десница во 2027 година, објави „Фигаро“.
Судијата Бенедикт де Пертуи претседаваше со тричлена комисија, која по судењето за проневера на средства од Европскиот парламент, во понеделникот донесе контроверзна пресуда против Ле Пен и ја осуди на четири години затвор, од кои две може да ги издржи во домашен притвор, пренесуваат медиумите.
Покрај тоа, Ле Пен е казнета со 100.000 евра и забрана за учество на избори во следните пет години.
По пресудата, сојузниците на Ле Пен во Европа и во Америка ја осудија одлуката на францускиот суд како недемократска, Марин Ле Пен рече дека Де Пертуа донела политичка одлука и дека го прекршила законот, пренесува „Танјуг“.